“Kanmah khangh mi si lo, PDF khangh mi si”. Kawl ralkap biachimtu Zaw Min Tun bia nih hin anmah chung ah zeitluk in dah rawhralnak a um cang timi zeimawzat a hun kan hmuhsak. Anmah kutneh bak a si komi aa pheh maw si, asiloah amah hrim nih thil sining hngal taktak loin dah a chim?
Lih le lih in thawng an thanh tawnmi khi timh ciammam tein an thanh mi ti cu a dik ko. Nain kha lih kha khoika in dah aa thawk ti balte a um ve.
CDF-CNA nih Lungler sakhan an kah lio ah khan Thantlang a ummi ralkap pawl kha “va kal hnawh hna u” tiah Hakha hrambunh Deputy Northwestern Commander nih order a pek hna. Nain, an kal hnawh ngam hna lo. “Kan kal zong ah kan thi thiam ko lai i nan duh cun hika hin rak kan that ko u” an ti tiah a chunglei thawng a theimi [min langhter awk a tha lo] nih a ti.
Mah bantuk in cung le tang bia an i ngaih piak lo nain Mungzua i an Northwest Command Headquarter ah report an hei tial tu ahcun lih le lih in an tial, tiah Hakha in CDM a tuahmi nih khan an chim.
Caan tlawmpal a rauh hnu ah Thantlang sianginn sang inn khangh le Pastor Biak Kolh an kah tan kha a hun si.
“CDF ralkap vial pakhat zong thah khawh tung lo. Innlo lawng khangh piak, aa san lomi pastor tu hna va thah. Santlaih lo tuk bia – raltuk khuakhan thiam lo a si. Chin mipi tu an lung an i rual chin leh lam”.
Mah hi anmah Kawl ralkap pawl nih anmah le anmah an i mawhchiatnak bia si. Phuahchom mi a si loin; Kan hawile le Kawl palek bawi i chawnhnak in a chunglei thil sining a chimmi a si.
Caan tlawmpal lawng a rau. Chinram le Sagaing ram chaklei a tlaitu Northwest Commander Phyo Thant cu a rian an thial.
Hriamtlai nih controlled area zong an ngeih bal lonak hmunhma ah dawhceo tuk in raltuk a hruai ruang ah a si, tiah hi pa kong he pehtlai in thawngpang a rak chuak. Cucu atu ka hun langhter mi Thantlang kong he zong a hun i pehtlai dih.
CDF/CNA nih Lungler sakhan an lakmi, Mindat lei ah Kawl ralkap nih zei ngaingai eibar an chuahpi lo hlei ah anmah mi tampi an thihnak, Kalay-Kabaw le Magwe chaklei hrawng ah PDF tei khawh an si lomi tbk ruang ah Northwest Commander hruaitu cung ah mawhchiatnak le minung reshuffle a hun um cu a si.
𝗠𝗮𝗵 𝗹𝗲 𝗺𝗮𝗵 𝗶 𝗵𝗹𝗲𝗻
Mah vialte hnu ah Thantlang cu atutan ah an khangh than i lih le lih in Zaw Min Tun nih media sin ah thawngpang a hun chim hi a si.
A fiang mi cu Naypyidaw lei nih timh ciammam in instutional propaganda caah lih an tawnmi zong cu a um tawn ko nain lih aa thawknak cu a tang lei tu in a si. Phun dang chim ahcun anmah le anmah an i hleng kan ti lai.
Thangtlang a ummi nih Hakha sin ah report an pek. Mawhchiat lai phan ah anmah lei thatnak lawngte an hei kuaih. Hakha nih a hun tamhmoih hnu ah Nortwest Command Headquarter Mungzua ah a kuat chin, Mungzua nih a tamhmoih chap mi cu Naypyidaw a hei pek chin. Mah cucu Zaw Mee Lung tiah auh mi Zaw Min Tun nih a chim tawn mi khi a si.
International law le code of conduct thate a zul lomi ralkap phu an si. A hmun i thil a can ning tein Naypyidaw phanh ding cu thil si kho lo a si.
Cucaah Zaw Min Tun nih mahti a chim tawnmi khi khuaruahhar tuk cu a si lo. Tialcia zohchom le byheart deuh in press briefing a pe tawnmi caah cun “thil dik le dik lo“ khi a caah zeihmanh a si lo.
Propaganda caah cun lih a chim hramhram mi a um ve ko lai. Nain ground ah thil a cangmi le, an chimmi cheukhat zohchia khenhru/ nihchuak thil hna a si tawnmi khi cu anmah le anmah an rak i hlen ruang ah a si bik ko.
𝗛𝗹𝗲𝗻𝗻𝗮𝗸 𝗽𝗵𝗼𝘇𝗮𝗿
Tuzing ah Kayah ramkulh lei i CDM in a zaam mi captain pa interview ka ngai. “Kawl ralkap chung ah pakhat le pakhat i zumhnak zong a um ti lo” a ti.
Hi pa telh in CDM major le caption pawl nih zeitluk in dah ralkap chung ah “lih in an i cawnpiak” timi kha tam tuk an hun phozar cang hna. Naite ah Hakha in a zaam cheukhat zong nih lih in an cawnpiaknak le lih in report an i peknak cu a hun phozar ve. Anmah chung in a zaam mi nih an hun phozar mi ko hi hmual a ngei khun.
Khat lei in social media, drone camera le media phun kip chan ah kan um. A hmun ah a cang mi thil kha fawi zaang tein mipi lei kap nih phozar khawh colh lengmang a si. Mah hi thil a sining tein langhter nak caah advantage nganpi a si.
Cu bantuk caan ah ram pumpi le vawleipi theih in phozar piaktu kan ngeih mi CHRO le rinhcanh tlak Chin media cheukhat kan rak ngeih zong hi kan miphun thluachuah phun khat a si.+++