Nizan nai August 2, 2021 ah KNU Concerned Group nih statement a chuah i, "NCA hi a rawk cang tiah kan ruah" an ti. CNF Vice Chairman Dr. Lian Sakhong zong nih "NCA cu ramkhel rilipi tuanbia ah a pil cang mi tilawng bantuk a si" tiah June 6, 2021 ah a rak chim bal ve.
Khat lei ah, NCA minthu mi hriamtlai phu dang pawl belte an ruah ning ai dang ngai. A rawk cang tiah phung ning in a thanh mi ngaingai an um rih lo. Nain anmah karlak lila ah NCA cung i an hmuh ning a hun i dang cio cang.
Nationwide Ceasefire Agreement (NCA) a rawk cang, a timi pawl nih zeidah an i tlaih? A rawk rih lo, a timi pawl nih teh zeidah an i tlaih? NCA a rawk le rawk lo tahfung ah zeidah a si timi kan hun zoh lai.
NCA kong ah NUG dirhmun
CRPH nih March 31, 2021 ah 2008 Cosntitution cu a rawk cang tiah an thanh. Kawl ralkap nih uknak an lak ruang ah a rawk, ti khi a si.
NCA kong ah, "Kawl ralkap nih uknak an lak ruang ah NCA zong san a tlai ti lo" tiah April 2, 2021 ah CRPH nih an rak thanh. 2008 Constitution an hlawt bantuk in "Kan hlawt cang" ti khi cu a si lo.
[Relchih]
NUG Minister Dr. Lian Hmung Sakhong nih zeidah a chim?
Dr. Lian Hmung Sakhong cu CNF ah Vice Chairman a si. Peace Process tungtlang ah a biapi taktak mi UPDCJ zong ah khan Vice Chairman a rak si. NUG minister rian a lak hlan deuh, PPST meeting (14/2021) a dih thaizing, 5 April 2021 ah NCA kong ah interview an tuah i, "NCA cu a rawk rih lo. NCA tang in kan kalpi mi ramkhel biaruahnak belte kalpi awk a tha ti lo. Ceasefire kong tu ahcun kalpi awk a tha rih ko" a ti.
CRPH nih April 16, 2021 National Unity Government (NUG) cozah an hun ser. Dr. Lian Hmung Sakhong cu Federal Union Affairs Minister ah an thim. June 6, 2021 ah media he tonnak an ngeih lio ah "NCA cu ramkhel rilipi tuanbia ah a pil cang mi tilawng bantuk a si" a hun ti hi a si. NUG nih NCA dotla a si ti lo, an tinak kong cu fiang deuh in a hun hrilhfiah.
"NCA timi cu a hramthawk tein hriamtlai le cozah karlak ah mithut mi a si. Atu cozah a um ti lo. Min Aung Hlaing nih a hren hna. Cucaah tuanchuah awk a tha ti lo. Cun, NCA nih ai tinh mi cu 2008 Constitution remh nakding caah priciple ser ding a si. CRPH nih 2008 Constitution cu an hrawh cang. Cucaah NCA lam i kal khi a herh ti lo. Kawl ralkap nih NCA in kan kal rih ko lai tiah an ti len mi khi hlen a kan timh mi a si", a ti. Dr. Lian nih hin a riantuannak cozah nih an kalpi mi policy zulh in a chim kan ti lai.
[Cabia hlun relchih]
NCA minthu mi phu pawl dirhmun
Hi ca ka tial tiang ahcun NCA minthu mi phu (10) komh PPST nih "NCA a rawk cang asiloah kan hlawt cang" tiah an thanh mi a um rih lo. An statement chuah mi lak ah a hnu bik NCA kong ai tel hi July 7, 2021 ah khan a si i "Atu lio ramkhel buainak hi NCA Essence hmang in dihter kan i zuam lai" an ti.
"Zei set khi dah NCA essence cu a si?" tiah hal khawh a si. Hi kong PPST chung ah fekte in i tlaih mi an ngei rih lo. Nain a tlangpi in i fian awk a tha mi cu; NCA nih "a dik mi Federal Democracy ram ser ding" ti kha a biapi in ai tinh mi a si. Mah principle a cohlang mi paoh nih ram caah a thatnak lei in khuakhan i zuam ding, ti khi an saduhthah a si.
Hi phu (10) chung ahhin NCA kong ah an hmuh ning cu ai lo dih lo. Nain atu tiang ah NCA kan chuahtak tiah statement in si seh, media sin ah si seh a chimmi phu pakhat hmanh an um rih lo. CNF nih NUG he riantuanti ding hnatlaknak (MoU) an thut lio ah khan zaraan (public) chung in "NCA an chuahtak he ai khat ko" tiah a ruatmi zong an rak um.
Nain atu chun tiang ahcun CNF nih NCA kan kaltak, PPST in kan chuak timi thanhnak le media sin an chim kan hmu rih lo. Cun, NUG he naihniam tein a ummi le PDF tampi zong training a pemi KNU lila zong nih khin cu bantuk thanhnak an tuah lo. An phu hnih [KNU, CNF] ning in August 4, 2021 ah tuah mi PPST meeting (18/2021) zong ah an kai rih ko.
 |
| PPST Meeting (04.08.2021) Photo - NCA-S EAO Facebook page |
NCA kong ah an hmuh ning ai dang timi zawn belte khi pahnih thum in then khawh a si. NCA hi 'tool' ah hman a duh mi le, 'shield' ah hman a duhmi an um.
"Tool" timi cu NCA hnatlaknak chung ah aa telmi pawl hmang in Kawl ralkap kha pressure kan pek lai, ti khi a si. Tahchunhnak ah "mizapi innlo, ngeihchiah, le an humhimnak kha kilven ding" tiah NCA ah aa tel. Mah tihin min nan thut i mipi nan thah-nawn mi le inn lo nan hrawh mi, siizung sianginn tibantuk ah ralkap nan i dor mi hi NCA nan buar a si, tuanvo nan lak hrimhrim a herh tiah pressure hei pek khawh khi a si. "Shield" timi cu Kawl ralkap he kan i kah tik ah fak tuk in a kan den lo nakhnga ding ah NCA minthu mi kan sinak hi solhphehnak ah kan hman lai, timi ruahnak khi a si.
Phu cheukhat belte cu NCA tang in ramkhel biaruahnak hi pehzulh awk a si ko, tiah a ruatmi zong an rak um rih ve.
Mahti hmuhning dang lengluang in an um ko nain PPST tu ahcun hmunkhat te ah an um peng rih. Thla chiarte caanhman in tuahmi meeting zong a kal peng rih.
Third Party le mizapi hmuhning
September 7, 2021 nithla khenh in KNU Concerned Group phu nih "NCA hi a rawk cang tiah kan ruah" tiah statement in an hun thanh. Cu hlan zong ah CSOs le Activists cheukhat nih NCA a rawk cang tiah CRPH asiloah NUG nih an thanh awk a si, tiah forhfialnak a tuahmi an um len cang. Nain catlap he phung ning tein "a rawk cang tiah kan ruah" a hun ti tu cu KNU Concerned Group hi a si.
KNU min ai tel caah KNU hriamtlai he pehtlaihnak an ngei maw ti kha mipi nih hun ruah ngaimi a si.
KNU Concerned Group cu 2017 KNU Congress ah hruaitu thimnak i a tling ti lomi cheukhat nih, cu kum lila ah, an rak dirhmi a si. KNU Central Committee he pehtlaihnak kan ngei lo, anmah lungtho te a ummi an si ko tiah Pado Saw Hla Tun nih 2018 ah khan a rak chim bal.
CRPH nih NCA hrawhnak thanh ding in forhfialnak a tuah hmasa bik tiah kan theihmi hi U Aung Htoo a si. Anih hin KIO nih NCA minthut an rak i timh lo lio te khan NCA a tlamtling lonak kong a rak chim lengmangtu a si. Upadi thiamsang a si i, Legal Aid Network dirhtu le KIO nih an ngeih mi Federal Law Academiy ah pricipal a tuanmi a si. 2008 Cosntitution hrawhnak kong zong kha zapi theih in CRPH a rak forhtu hna a si – Amah ruang theng ah an hrawh tinak cu a si lo.
NCA minthut an thawk cu kum 2015 in a si i, kum 5 chung chung ramkhel biaruahnak ah hlawhtlin lonak tampi a um caah NCA hnatlaknak cu a soisel mi an hun karh deuhdeuh. NCA minthu lomi hriamtlai pawl nih NCA hnatlaknak a tlamtlin lonak point out an hun tuah pah lengmang fawn. Kawl ralkap nih uknak an hun lak hnu chinchin cun mi tampi nih NCA cung ah ruahchannak a tlawm chinchin.
Biafunnak
NCA hi 2008 Constitution nih a hrinmi a si lo. 2008 Constitution nih temtawnak (binding) a tuahmi zong a si lo. NCA hnatlaknak hrim ah khin "2008 Constitution" biafang a um lo. 2008 Constitution le NCA hi pehtlaihnak an ngei lo. 2008 Constitution a rawh zong ah NCA a rawk tinak a si lo, ti kha NCA a dirkamh rih mi nih argument an tuah mi a si.
NCA hlawt a duhmi pawl nih phun dang in an chim ve. NCA nih ai tinhmi cu Pyidaungsu Accord in Constitution remh ding a si. Hi zawn ah zei constitution dah timi aa tial lo nain 2008 Constitution kha principle in cun a sawh duhmi a si. CRPH nih 2008 Constitution a hrawh cang i, a thar tial ding in a timhtuah. Cucaah NCA nih ai tinh mi kha tuanchuah a hau ti lo, an ti.
An i tlaih mi cu a kaphnih ning in a dik veve ko. Anmah duh ning hoih in an hun kuaih veve khi a si.
Kawl hruaitu pawl nih Panglong Agreement kaltak riangmang in Constitution an rak ser ruang ah kan ram buainak a rak i thawk mi a si. Phun dang chim ahcun kan duhmi Constitution a chuah ko ahcun a buai ding khi kan si hnga lo. Cucaah CRPH le NUG nih NCA kaltak in Constitution a thar tial nakding tu khuakhan an hun i timh mi cu lam dik a si ve ko.
Constitution tial (draft) cu an i fawih ko lai. Amahbelte, zapi lungtling ding in an tial kho taktak lai maw? Zapi awiawh kho ding in zeitin dah fehternak an tuah khawh lai? Fehter nakding ah NUG nih legitimacy ai tlaih thai kho taktak lai maw, ti kha khat lei phu [NCA a rawk rih lo a timi] caah lunghrinhnak an ngei rih. Cucaah NCA kha hnuchit dih awk a tha ve rih lo.
Khat lei in NUG lila zong hi self-confidence an ngei lo ti a lang. Dothlennak kan tei lai, tiah an i zumh taktak ko i Constitution thar he ramthar kan ser khawh hrimhrim ko lai tiah an i zumh ko ahcun "NCA cu kan hlawt cang" tiah an thanh ngam ding a si. NCA cu Cozah le Hriamtlai [kaphnih] karlak ah minthut mi a sinak ka langhter cang. Cozah taktak cu kanmah hi kan si, an ti ko ahcun hlawtnak nawl zong ngei ko cu mu...
Zei dirhmun ah dah NCA a thih lai?
NCA a thi, a rawk tiah zapi nih pom khawh ding ahcun thil si kho (scenario) pali in ka hun then lai.
- NCA cu cozah le hriamtlai karlak ah kaphnih hnatlaknak in minthut mi a si caah kap khatkhat nih kan hlawt an ti ahcun a rawk ti khawh a si lai.
- Hriamtlai leikap ahhin phu (10) an um. Phu pakhathnih nih an hlawt ruang ah NCA a rawk ti khawh a si lo. Amahbelte, phu ngan deuh [RCSS, KNU tbk] nih an hlawt ahcun phu hme deuh pawl caah tongta tlaih in i tlaih len awk a tha ti hnga lo.
- Cozah leikap ah khin atu dirhmun ahcun phu (2) in an i then kan ti khawh. NUG nih a rawk cang tiah an thanh i, legitimacy an i tlaih thai khawh ahcun hmual a ngei lai. An tlaih khawh lo belte ahcun Kawl ralkap nih an pehzulh than khawh lai. Khat lei in, Kawl ralkap khuaruahnak belte ah NCA hlawt ding ai tel rih lo.
- NCA minthu hriamtlai phu chung in aho hmanh nih "kan hlawt, kan hrawh" tiah an thanh hnga lo. Nain, NCA minthu lomi hriamtlai pawl [KIA, KNPP, AA tbk] nih NCA nakin a tha deuhmi hnatlaknak an hun chuahpi khawh i, zapi hun i hrawm cio mi dirhmun a phanh khawh ahcun Panglong Agreement (1947) bantuk phun in NCA hi hnuchit khawh a si hnga.
[Relchih]