 |
| Photo- Pu Ramkhar Facebook |
Ram buaibai le poipang ton paoh ah a kan tawlreltu le kan i bochan mi cu caan tampi ah kan Pastor hna hi an si. A hlan lio Kawl ralkap uknak chan, Thantlang peng i Khin Maung Zi chan, NAZI le Hitler bang an rak kan sual hnawh lio te khan kan Pastor te hi a tem-ing bik an rak si. Chuih le bengh le hren tiang zong a tong mi an rak tampi.
Tutan kan ram buainak zong ah sa le ral lak i, a kan tawlreltu an hun si. Tlikzamnak kong zong ah zaran nih cun Khrihfabu member an tlik dih hlan cu tlik ve thiang lo ah kan ruah hna. Ralhrang kut in thi kho, tuar kho cio an si. Pakhat lebang a nunnak tiang kan sung cang.
Nizan nai Hakha kong belte a hun linsa ngai. Kan pastor cheukhat nih Kawl ralkap he i tonnak in, khuachung ah raltuk hrial ding le Khual-riak cazin pekding, tiah hnatlaknak kan ngei ti a si. Ruah awk a um lengluang.
CNA pasaltha Uk Lian Thang te hna an rak thih hlan chan te khan Kawl ralkap nih biaknak lei upa hmang in CNF/A cawnpiak le hriamnam tiang chiahter ding in lemsoinak a rak um bal cang.
A thatnak lei ruah hramhram ahcun biaknak lei upa hna hi daihnak ser khotu ah [Kawl ralkap nih] an ruah hna, ti awk te si. Nain cucu an thinlung taktak a si bal lo. Caan tampi ahcun tei an kan duh ruang ah, an "khur" chung i luhter ding ah kan biaknak lei hruaitu an hman hna khi a si. Mah cu lungfak ngai a si.
Nai tan Chin pastor pawl cheukhat laksawng pek len lio zong ah khan kan rak chim bal ko. Rap-satarh bantuk khi a si.
Laimi tam-u cu Khrifa kan si dih ko caah biaknak lei kan upa pawl hi kan ’miphun hruaitu’ an si ve ko.Poipang ton paoh ah kan herh fawn hna. Hmeilei zong kan herh peng rih hna lai. Ralhrang hmaichon in an um tikah an bia lonh awk a tha lomi thil tampi lai. Kan theihthiam piak ngai ve hna hau.
Khat lei in, Kan pastor te belte nih tawlreltu dirhmun an um tik ah kan miphun dirhmun hi ruahchih ngai cu a herh ve. Kawl ralkap zong nih daihnak taktak maw an duh, hmanrua ah dah ser a kan timh, ti zong ruahcia ngai hau hnga. An ruahcia cio mi a si ko lai.
Zei dirhmun (position) ah dah kan dir awk a si, ti kha biapi bik a si. Mizapi "aiawhtu" in maw kan um lai, "karlak tlangtlatu" sawhsawh in dah, ti kha a biapi ngai. A kan hruaitu nih cun a kan aiawh deuh awk ngai cu a si. “Karlak tlangtlatu (mediator)“ sawhsawh phun i kan um ahcun kaphnih ca thiltha ti khi solution kawl a si tawn.
Cu bantuk zawn ahcun namneh cia mi caah zeitik hmanh ah hlawknak a chuak kho lo. Atu lio kan dirhmun he hrim cun aa keih lo ngaimi a si. Mediator a herh mi dirhmun ah kan um rih lo. Tawlreltu kan herhnak tu cu a um ko lai. Cu bantuk caan ahcun kan “leitang“ tawlreltu asiloah aiawhtu an si ding a biapi.
Zero-Sum-Game ahcun khat lei miak mi poah kha khat lei caah sungh a si. Cucu atu lio kan khel mi dothlennak a si. Kan i celhcia mi game ah kan rak sungh cang caah tutan game tal cu "tei/miak" ve a hau - "i tluk" a ngah lo.
Kaphnih caah thiltha kawl caan nakin tei nakding khuakhan caan a si deuh, ti kha tial hnawhchan a si. Tazi (i tluk) hrawng lawng kan i timh ahcun sungh i thim cia he aa khat ko.
Champions League puai bantuk in voi hnih chuih mi fonh in biachahnak tuah zong a si lo. Phekah bantuk in "sungh-cun-pek, miak-cun-lak, tei-cun-laam“ timi dothlennak game a si.+++