July [2021] thla dih lai hrawng thawk in India nih chuahmi Covishield le Covaxin cu Kawlram ah man tam taktak in black market ah an zuar i, atu tiang an i chun cuahmah.
Ai thawkka hi ram pumpi ah Covid-19 thirdwave in kan tuar i mi tampi zong an thih lio a si caah Ks. 400,000 hna in an i chun. Zawtnak a hun zor deuh. Khat lei in Kawl ralkap tawlrelmi Tuluk sii chunh ding hna a hun tam deuh caah duhsah in a man a tla in atu ahcun voi khat chunh ah Ks. 75,000 mang zong a um cang.
Covidshield cu zeidah a si?
Atu Kawlram black market ah a vakvai cuahmah mi hi a tam-u cu India company Serum Institute of India (SII) nih an chuahmi Covishield a si. A hmualngeihnak (effectiveness) hi 75% tiah kan theih nain BBC nih cun 85% a si, tiah a tial.
Anih hi Oxford-AstraZeneca (UK) a chuahtu company nih khan India ah chuahnak nawl a pek hna caah technology i hlan in an rak chuah ve mi a si. April 2020 ah hnatlaknak an tuah i, a hmaithla ah chuah hram an thawk colh. India ah January 16, 2021 ah chunh hram an thawk.
Kawlram ah zeitik, zeizah dah a phak?
Ministry of External Affiars (MEA) website (India cozah) i an langhter ning ah India nih Kawl cozah sin ah voi hnih a kuat cang. NLD cozah chan January 22, 2021 ah sing 15 a man loin an pek hna. Kawl ralkap nih uknak a lak hnu February 11, 2021 ah sing 2 an pek chap hna.
Webiste an langhter ning ah hi tan [Feb 11] ahhin a cawk in an cawk mi sing 10 ai telchih (Ministry of External Affairs, 29 May 2021). Nain Kawl ralkap nih cawk mi kong cu media sin ah an chim lo.
Zeitin dah black market ah a chuah khawh?
India cozah nih a ramchung chuak vaccines pahnih cu diplomacy caah biatak tein hman a timh caah a pahnih ning in private nih zuar le cawk khawh ding in a tuah.
May 29, 2021 tiang ah ram kip in an bawmh cang mi hna hi 10.7 million a si. A zuarh i an zuarh mi hna hi 35.8 million a si. COVAX program 19.8 million an i thawh.
Mahti India cozah nih biatak tuk in private kut ah a phanhter in amah [cozah] lila nih diplomacy le sipuazi ca i a hman tuk caah black market ah fawite in a chuahnak hi a si.
Nain India cozah nih amah ramchung mizapi papek deuh duh ruang ah ramdang kuat cu March thla dongh ah khan a phih i, tukum chung cu kan phih rih lai an ti.
Kawlram ah zeitin dah a phak?
July thla dih hrawng in khan nichiarte ti awk in nikhat ah bawm (vial) 1000 hrawng lengmang Moreh-Tamu ramri in a lut. Bawm khat ahcun dur 10 ai tel i a bawm ning ahcun Ks. 1,300,000 in Ks. 2,000,000 karlak an hauh. Chunh a duh mi sin ah dur khat Ks. 200,000 in Ks. 500,000 tiang an hauh.
Kawl ralkap he ai naihniam mi cheukhat nih cun online tiang in an zuar.
"Kawl ralkap ah theihhngalh mi ka ngei hna. India ah sianginn a kai balmi Defense Service Academy (DSA) siang inn i doctor le professor cheukhat zong ka theih mi an um i, mah nih cun an ka cawk piak khawh" tiah August 11 ah Htoo Thiri Khit timi nu nih Facebook ah a zuarnak kong Myanmar Now nih a tial.
Hi nu a zuar lio ahhin India cozah nih ramleng ah phung ning in vaccines kuat (export) a khapnak thla (4) a rau cang. Cucaah Kawl ralkap lei in naihniam nih an India ah an cah piakmi si loin an kutchung ah a phan ciami kha lunghrinh bik mi a si (a fekmi evidence tu cu a um rih lo).
Ziah tiahcun -
NLD cozah chan January 22 i a phan cang mi le Kawl ralkap chan February 11 i a phanmi Covishield hi a zate sing 27 [2.7 million] a si cang nain zaran chunh awk ah Kawl ralkap nih an tawlrel mi kan hmu lo.
August 25 ah rampi huap in Kawl ralkap nih mipi a chunhter mi hna cazin an thanh. Milu 4.54 million kan chunh cang hna, an ti. Cu chung ah milu 1.8 million hi voi 2 ai chun cang mi an si i, 2.7 million hi voi khat lawng ai chun rihmi an si.
Minung cu zat sin ah cu sii cu zat ti an langhter lo. An cazin ning ahcun Tuluk sii an ngah ciami lawng hmanh nih a nguh ding si.
Covishield hi ralkap chungkhar le naihniam lawng i chun hmanh hna selaw tam tuk a hlei ding a si. Mah cu khoika dah an chiah hnga?
Black Market sii chuntu ahhin Non-CDM doctor cheukhat an i tel. Khoika in dah sii a rat an chim duh lo.
Hto Thiri zuar mi cu dur khat Ks. 260,000 a hauh. Sii chunh a duhmi minung 600 hrawng nih a kan pehtlaih tiah Myanmar Now ah a chim.
Atu lio belte hi black market zong ah a tam lawng siloin Kawl ralkap nih zapi caah Tuluk sii chunhnak a tawlrel cuahmah caah black market man zong a hun tla deuh ngai. Nain voi khat chunh ah Ks. 75,000 cu a si thiam rih.
Zumh awk tlak a si maw?
July thla canceo hrawng ah khan [India ah] Vaccines deu an zuar tiah thawngpang a chuak. Palek nih an tlaih mi zeimawzat zong a um i, mah cu SII nih an chek i, 'a deu a si ko' tiah an fehter. Nain kha Vaccines deu kha khoika hmun tiang dah an zuar manh cang ti kha theihfian a si lo. Mawreh, Tamu hrawng ah a deu an zuar timi thawngpang tuthla cenceo hrawng ah a chuak ve nain a fekmi source ka van kawl than kho rih lo.
Mawreh-Tamu ramri lonh in cawkzuarhnak a tuahtu pahnih nih Myanmar Now i an chim ning ah "a sii dur ahhin "Not for sale" and "Use in India Only" [zuar lo ding, India ram chung lawng ah hman ding] tiah aa tial, an ti.
Vaccines lei ah a theihngal mi siibawi le sii lei thiamsang pawl nih sii phurh tik ah sii nih a herh mi a kih-lum (cold chain) ning tein phurh lo ahcun san a tlaih lo lawng siloin i chunh tikah tih a nung tiah an chim lengmang.
Sii a chuahtu Serum Istitute hi India ram nichuah lei a deng Maharashtra ramkulh Pune khua ah a ummi a si. An factory belte khoika dah an chiah cu kan hngal kho dih lo. Pune le More-Tamu ramri cu meng 3000 lengkai ai hlat. Hi karlak hi zeitin an ratpi hngalh a si lo. Tamu in ramchung an luhpi ning le an tawlrel ning fiang tein hngalh a si lo.
Covishield nih a herhmi kih-lum cu 6-8 degree Celcius a si. Cu cung a kai sual ahcun a sii hmualngeihnak zor asiloah a thi kho tinak a si.
Mah kong ahhin Mawreh-Tamu ramri lonh in sii cawkzuarhnak a tuahtu pahnih nih cun 'kanmah nih cun tha tein kan tawlrel ko nain kan cawknak lei si seh kan zuar chinnak lei nih tha tein an tawlrel le tawlrel lo cu kan chim kho lo' an ti. Cheukhat a zuartu nih cun inn ah an hman mi zi-khe-tet-ta (refrigerator) chung hna ah an hei chiah mei ko, a ti chap.
Bia donghnak
Atu lio kan ram ah phung ning tein zaran i chunh khawh mi cu Tuluk vaccines lawng a si. Mah cu Kawl ralkap tawlrel mi a si caah mi tampi nih cun phunglut ah an chiah lo pakhat, Tuluk sii a sinak ruang i an duh lo pakhat, ai chun duh lomi an tampi. Black market lehlam tu hna ai thim deuhmi an hun um.
Tuluk vaccines, Kawl ralkap tawlrelmi - kan i chun lai maw kan i thloh lai dah?
Meng tampi hlat in ramri lonh in hun luhpi mi kha a phurhnak kih-lum kong ah zeitin dah an tawlrel ti fiang in kan hngalh lo caah hun i ralrin ngai a haumi a si.
Ramri lonh sii dah lo cu Kawl ralkap kutchuak lawng a tang fawn cang. Mah hi ngandam nak lei hoih in tuak ahcun risk a tlawm deuhmi a lo. Nain, khat lei in cucu Kawl ralkap eihmuar thil a si.
A poi ngaimi tu cu [black market cu si ve kaw] a zuartu nih an zuar tikah an luhpi ningcang tha tein an chim duh lo. A chuntu doctor te lila zong nih khoika in dah a rat ti kha an chim duh lo. Cucaah mi tampi nih an i chunh mi khi ramri lonh in private nih luhpi mi maw a si, (ningcang tein tawlrel mi a si maw) asiloah Kawl ralkap kutchuak cu dah a si, ti kha fawite in hngalh khawh a si lo.
Khat lei in, NUG nih kan tawlrel ve ko, an ti nain Kawl ralkap lungtluanh phot lo ahcun fawi dawh a si lo. Van hngak deuh rih ko ulaw, van i ti awk zong a tha fawn lo.
Khat lei in UN lei nih an tawlrel mi COVAX program a um ve nain Kawl ralkap nih anmah tlangtlaknak lawng in an duh caah ruahning tluk in a tlamtling kho lo.
Cucaah atu lio Kawlram cu vaccines kong ah thim ding tlawm tuk lawng kan ngei. I thloh ngam le i fial ngam zong kan si lo. Zeiti tha, kan dirhmun nih a pe fam lo. Mah le siarem ning, ai chun ngam mi le ai chun duhmi paoh nih a lam kawl cio a si.
Chirhchanh-
"WHO confirms fake Covishield vaccines in India, Africa; says it could 'pose serious risk'" August 19, 2021. India TV. https://www.indiatvnews.com/
"At Rs 700-Rs 1,500, price of Covid vaccine in India’s privat...". May 10, 2021. https://timesofindia.indiatimes.com/
"Brokers sell Covishield vaccine on Myanmar’s black market for millions of kyat". August 21, 2021. https://www.myanmar-now.org
"Covishield: A timeline of the Covid-19 vaccine manufactured by Serum Institute of India". January 16, 2021. https://www.hindustantimes.com/
"Made-in-India COVID19 vaccine supplies so far (In lakhs)". May 29, 2021. https://mea.gov.in/
"India Suspends Covid-19 Vaccine Exports to Focus on Domestic Immunization". March 25, 2021. https://www.wsj.com/