Kawl ralkap cozah nih an huat mi hna le an caah ral ah an ruahmi hna thah ding khuakhannak hi cuhlan zong ah an rak um tawnmi a si. Bogyoke Aun San lila zong kha timh ciammam te thah-nawn-nak in a rak thi kha mu. Kum 1962 hnu in tuanbia ah a langsaar deuhmi thahnak le thahtimhnak pawl kan hun zoh lai.
Captain Kyaw Zwa Myint
Pu Ne Win nih uknak a lak hnu in thah timh hmasa bikmi a si. Kyaw Zwa Myint hi Pu Ne Win i, a personal assistant (PA) a rak tuan balmi a si. Mi raltha, cathiam le thil tuak kho ngai mino a si. Khrifa a si fawn i, diknak a tanhmi ralkap a si.
Ne Win nih uknak a lak hnu in, Thailand ah a zam. Ne Win nih Kawlram uknak phung caah ruahnak a chuahmi Socialist phung kha a dohkalhtu a si. Kawl ralkap belte nih cun Thai ralkap sin ah US $ 35,000 in Kawl ralkap biathli a zuar tiah an puh. Kawl ralkap nih Kawlram i Khrifa namnehnak an tuah mi lehrulhnak ah Ne Win kha poison in thah a timtu a si, ti zong in bia a chuak.
A si khawh nak lam paoh in thah ding ah Ne Win nih nawlpeknak a rak chuah. A chungkhar zong an hren piak hna.
Bangkok rawldawr i rawl a ei lio ah Kawl ralkap nih an fialmi pakhat nih thah a timh nain a luat manh than. Thah an timh lio ahhin kum (34) a si. A hnu ah Australia ah a zam i, 1981 ah khan kum (49) a si ah cancer zawtnak in vawlei a chuahtak.
U Win Ko le U Hla Pe
Annih pahnih hi 1990 kum ah Kawl ralkap nih election result an cohlan lo i, teitu NLD party kut ah uknak an rak pek duh lo hnu in ramleng ah an rak sermi National Government of the Union of Burma (NCGUB) ah a rak i telmi an si. (NCGUB cu atu NUG bantuk khi a si).
Annih pahnih hi Pu Than Shwe nawl peknak in an rak thahmi hna an si.
U Win Ko hi 1990 thimnak ah NLD in a rak i cuh i, teinak a rak co. Aung San Suu Kyi a upa (cousin) Dr. Sein Win nih a hruaimi NCGUB ah cun Finance Minister rian a rak tlai. Anih hi Tuluk ram Yunan ramkulh khualipi Kunming a phanh lio ah ai thumhnak hotel ah an rak thah. A thih lio ah kum (58) a si.
U Hla Pe zong hi 1990 Election ah NLD thiam in teinak a rak hmu ve mi a si. NCGUB ah minister a rak tuan ve tiah Irrawaddy nih an tial nain kha lio cozah min cazin ka hun zoh than i a min bel ka hmu lo. Anih hi Bangkok a um lio ah an rak thah. A thih ah kum (54) a si.
Aung San Suu Kyi
Aung San Suu Kyi lila zong hi thi seh ti an duhmi ah ai tel nain Kawl ralkap nih a tuahto ning an i harh.
May 30, 2003 ah Sagaing Ramthen Thabayin khua a tlawng i, khua a phak lai ah Kawl ralkap nih misual le thongtla chuak pawl an hlan mi nih an rak bawh hna. Aung San Suu Kyi le a zultu pawl cu an den hna i, minung 70 hrawng an thi. Vanthat ah Daw Suu tu cu a luat. Hi lio a driver pa a thiam ruang ah a si tiah an thangthat.
Pu Khin Nyunt nih a cauk i a tial ning ah Aung San Suu Kyi kha Thabayin a luh lo nakding ah a herh ning paoh in nan rak kham lai tiah Soe Win sin ah Than Shwe nih nawl a pek, a ti. Soe Win cu 2007 ah khan pum dam lo zawtnak in a thi.
Padoh Mahn Sha Lah Phan
Anih hi Karen hriamtlai KNU ah General Secretary a rak tuanmi a si. Karen mipi lawng si loin Kawlram ramkhel upa deuh pawl zong nih an upatmi a si.
February 14, 2008 (Valentine Day) ah Thai-Kawlram ramri khua Mae Sot i a inn ah meithal tlai pakhat nih a luh hnawh i, a kah. A thih ah kum (65) a si.
Amah thahnak kong ahhin KNU in a rak i thenmi phu DKBA le KNLA-PC pawl an i tel tiah an mawhchiat hna. Atu lio Kawl ralkap lutlai minlang Major General Mya Tun Oo khi a biapi in a phen ah khuakhangtu a si. Mya Tun Oo cu atu Min Aung Hlaing kuttang ah Defense Minister rian a tlai.
U Ko Ni
Anih kong cu zapi nih kan hun theih ngai theo lai. January 29, 2017 chun lailing ah Yangon International Aiport ah Kyi Lin nih meithal in a lu ah a kah i, a hmun lila ah a liam.
Anih hi upadi thiamsang a si i, NLD zong nih an i bochan taktak mi a si - Legal Advisor ah an hman. Aung San Suu Kyi lila zong nih ai bochan ngaimi a si. 2008 Phunghrampi nih Aung San Suu Kyi president tuan kho loin a kham bu ah cozah lutlai si thiam kho ding in State Counselor post an ser mi zong kha U Ko Ni ruahnak pekmi a si. 2008 Constitution a that lonak le a thazaang dernak kong a thei biktu le zapi hmai ah a chimtu bik a si.
U Ko Ni a thattu Kyi Lin cu thihdan an pek i, Rangoon Insein thonginn ah a um rih ko.
U Kyaw Moe Tun
Anih hi NLD cozah nih Kawram aiawh UN palai rian an rak khinhmi a si. Kawl ralkap nih uknak a lak hnu i, Kawl ralkap aiawh duh loin CDM a tuah i, NUG cozah lei tu ah a tang. Kawl ralkap nih a rian an phuah, a aiawh zong thlen an timh len nain an tuah kho rih lo.
Thah a timtu hi Phyo Hein Htut (kum 28) le Ye Hein Zaw (kum 20) an si. Hi thah timhnak kong ah Thailand ram in hriamnam le sumdawng U Aye Ko timi pa hi a phen in ai tel i, an herh mi phaisa a kuatu hna zong a si. Anih hi Thai ralbawi le Kawl ralbawi pawl he naihniam tein a ummi an si. Thailand in Kawl ralkap pawl caah hriamnam a zalhpiak tu hna a si, ti zong in thawngpang a chuak. Cucaah hi thahnak phen ah Kawl ralkap an i tel ko tiah hun zumh khun cio nak a si.
U Kyaw Moe Tun humhimnak cu US palek nih tuanvo an lak lio a si. A ralai mi September [2021] thla ah UN General Assembly a um lai i, a rian a peh khawh le peh khawh lo ceih piak a si lai.+++
Cherhchanh –
Irrawaddy nih Mirang ca in a tialmi cabia “A Look at Myanmar’s Long History of Political Assassinations” hrambunh in tialmi a si.