"Nikum ahcun chuah ka rak duh ko nain tukum cu ka chuak lai lo, tiah ka chungkhar he biachahnak fekte in kan tuah mi a si" tiah a donghnak Barcelona chungkhar hmai media he tonbiaruahnak ah a mithli he a chim.
Zei ruang dah a chuah?
Messi hi vawlei cung club rum pawl nih man tam taktak in cawk an timh ko zong ah Barcelona nih an zuar sian bal lomi a si. Nikum ah khan chuah ka duh tiah a chim nain Barcelona nih an chuahter siang lo. Cu bu i, tukum a contract a dih hnu in man ngei lo i chuahter ding cu Club ngeitu caah thil harsa taktak a si.
Nain Barcelona nih tuah khawh mi hlei an ngei lo.
Spain ah Covid-19 zawtnak karh hram ai thawk hnu i, mipi nih stadium ah bawlung chuih an zoh kho ti lo. Mah nih hin phaisa an hmuh dingmi tamtuk an sung. An chawlehnak dangdang zong Covid-19 ruang ah tampi a tla. An player lahkhah le an pek peng hna. An leiba $ 1.4 billion tiang a karh. Covid-19 hi a dih taktak rih fawn lo caah an chawlehnak i remh than nakding ruahchannak a tlawm.
Barcelona nih leiba tam tuk a ngeih ruang le an sipuazi a tlak ruang ah an 'salary cap' a tla. 'Salary cap' cu Club pakhat nih a leiba le a sipuazi zoh in player dihlak lahkhah caah a tam bik hmannak nawl, La Liga nih rule a chiahmi a si. Barcelona nih hin € 671 million salary cap an ngei tawn nain tukum in cun € 382.7 million ah a tla.
Messi lahkhah an pekmi hi kum khat ah $ 83 million a si. Hi a lahkhah zatceo thumh bu hmanh ah player dang pawl lahkhah pek ding ah an ‘salary cap’ nih a nguh ding a si lo. Cucaah an siang lo tuk ko bu ah an chuahter mi hi a si.
Aguero, Depay, Garcia tbk player thar an cawk mi hna zong kha Pique, Busquet tbk player hlun le lahkhah sang deuh pawl lahkhah an thumh piak dih hna hnu lawng ah an lahkhah ca register an tuah khawh ceo khi a si.
PSG ah Messi angki man nih a lahkhah a rul lai maw?
France ram i Club rum bik PSG ah Messi a phan. Signing bonus ah $ 30 million an pek. Kum khat ah lahkha $ 41 million an pek lai. Pumpululh chuihtu lak ah lahkhah tam bik a si rih.
PSG le Messi nih kum hnih contract min an thut dih cangka in Messi nih ai hruk dingmi keng number 30 cu zapi hruk ding in zuar hram an thawk. Online in an hun zuar i, minute 7 chung ah 150,000 an zuar. Minute 30 chung ah a voi khatnak an chuah cia mi an zuar dih. Atu tiang an zuar mi hi 830,000 a si tiah Marca nih a tial. Nain hi zahzah hi cu a tling rih lo, tiah PSG lei nih an ti.
A angki hi 115 man, 158 man, 165 man tiin an i dang cio. A buaktlak in zun khat ah €146 nih a ciah. Marca thanh mi zatnak tlawm deuh 700,000 hrawng khi an zuar khawh mi hei si selaw Messi angki man lawng in an hmuh mi hi a tlawm bik € 100 million hrawng a si tinak a si. Wow tam bak hih.
Nain hi vialte hi PSG nih a hmuh dingmi a si lo. Angki a chuahtu taktak hi Sport company Nike a si i, an miak mi in 10% lawng PSG nih a co lai. Zeitin si khawh?
Club paohpaoh nih hin anmah nih angki an chuah bal lo. Atu bantuk sport company (Adidas, Puma, Nike tkb) he khin contract an tuah i, kum khat chung an herhmi paoh an chuah piak tawn hna. Kha contract caah (lumpsum in) Club ngeitu nih aa tlak ning in a man an i hauh tawn. PSG le Nike nih contract an ngeih mi hi kum khat ah $ 70 million a si.
Cun, player thar an cawk i, jersey (uniform) an zuarmi chung in a miak zatuak (%) cu kaphnih hnatlak in an i then than. PSG nih hin 10% an i hauh. Liverpool khi 20% an i hauh i, a tam bik a si.
Messi angki hi € 100 million man an zuar khawh ahcun zatuak 10% a simi € 10 million lawng PSG covo a si lai tinak a si.
Cucaah a angki zuar man lawng in a lahkhah an pek dingmi le signing bonus rulhter ding cu thil har taktak a si. Nain Messi ruang ah Nike he kumvui an contract man [$ 70 million] kha tam deuh an i hauh khawh.
Barcelona sungh ding le PSG hmuh chap ding
Barcelona nih a contract a dih hnu ah an chuahter caah man loin an chuahter i tam tuk man an sung cia cang. Nikum ah khan rak zuar hna selaw a tlawm bik $ 200 million an hmuh lai.
Messi chuah ruang ah Barcelona brand value 11% paoh cu a tla lai tiah Brand Finance nih an tuak. Messi ruang ah Barcelona a tlawng tawn mi tourists pawl le stadium ah pumpululh chuih zohtu an zor lai. Messi angki zuarnak in an hmuh ding mi a um ti lai lo. Messi ai telnak in advertisement pawl a um ti lai lo. TV rights man a tla lai. Cu vialte cu Brand Finance nih an hun tuak i, Messi chuah ruang ah an sungh dingmi hi € 137 million a si lai, ti a si.
Barcelona nih an sungh mi vialte cu PSG lei caah an hmuh chap dingmi a hun si lai. An ngah bal lomi Champions League hrai hna teinak a lakpi khawh hna ahcun a let tampi PSG income a karh lai.
TV rights man, tourist le audience kong te pawl ah khin cun PSG lawng siloin Ligue1 club vialte nih an rak i hlawkpi chih cio ding a si.