Phun dang chim ahcun ram rum pawl nih ram siifak deuh pawl kan ngandamnak caah a kan siaherhnak program a si. Bawmh mi lak ah Kawlram zong kan i tel ve.
WHO nih a tuanchuahmi Covid-19 rai dohnak “Access to Covid-19 Tools” program i a tungtlang pakhat a si.
Sii min si loin program min a si. India nih vaccines an chuahmi Covaxin he khin a min an palh sual tawn, pehtlaihnak an ngei lo.
Aho nih dah a tuanchuah?
Phu thum fonh nih an tawlrel; World Health Organization (WHO), Global Alliance for Vaccines and Immunition (GAVI), le Coalition for Epidemic Preparedness Innovations (CEPI) hna an si. A kuatnak le luhchuahpinak lei ah UNICEF zong nih a bawmh hna.
WHO cu UN tang ummi a si.
GAVI hi Switzerland hrambunh public-private phu a si. Kum 2000 ah rak dirhmi a si i, UK, US le Norway nih chawva lei in an dirkamh. Bill and Melinda Gates Foundation [Mirum pa Bill Gates le a nupi hlun nih tuahmi] zong nih khin tam lak te a bawmh ve.
CEPI hi Norway hrambunh [public-priavte] a si. Kum 2017 ah an dirh. Vawlei ah rai a um lo nakhnga ka-kuai-sii chuah nakding ah research project a tawlrel mi an si. Hi bu dirhnak zong ahhin Bill and Melinda Gates Foundation ai tel - Wellcome Trust bu, Norway le India zong a ram in an i tel ve.
COVAX Program ah hodah aa tel?
Cheukhat ram nih phaisa an thawh i, cheukhat ram nih vaccines he phaisa he an i thawh. Atu tiang ah ram 35 an i tel.
US nih $ 3.5 billion a thawh i, a thawh tam bik a si; midang vialte thawh mi dihlak fonh [9.8 billion] i zatuak 30% hrawng a si. Trump nih cozah a tlaih lio ah khan WHO nih Tuluk nan tanh tuk ti ruang ah a nuar hnawh hna i, an rak i tel duh lo. Biden cozah thar ah atu bantuk an hun i tel hi a si.
Phaisa thawh tam bik ah khin US hnuzulh in Japan le Germany nih 1 billion veve an si. Covid-19 ai thawknak ram tiah theih mi Tuluk nih $ 100 million a thawh ve. Southeast Asia ramchung [ASEAN] in Singapore, Philippines le Vietnam khi an i tel ve.
NGO, ngandamnak lei foundation phu le commercial company cheukhat zong an i tel.
Zei sii dah an hman?
World Health Organization nih zapi hman awk tlak a si ko tiah theihpinak a ngeihmi vaccines pawl kha hi progam chung ah telh a si. Atu tiang ah WHO nih theihpinak a tuah cangmi hi sii phun 10 a si. Kawlram lei zapi nih kan hun theih mi India sii Covishield le Tuluk chuahmi Sinopharm le Sinovac zong khi an i tel. Hika hin WHO nih zohfelnak a tuah dih cangmi zoh.
Khoika ram ah dah a kal?
COVAX program in vaccines cohlan a duhmi hi ram 156 an si. August 30, 2021 tiang ah ram 139 ah dur 224 million a phan cang tiah GAVI webisite nih a langhter.
Kawlram zong ah GAVI le WHO tawlrelnak in COVAX program hi tuanchuah a si ve. Nain sii a phanh taktak hi Kawl ralkap nih uknak an lak laite a si caah an duh ning tluk le lang-hngan in an tuan kho lo. An tawlrel mi hi Covishield a si ti vial khi kan theih. Zeizah dah a phan, milu zeizah dah an chunh khawh cang hna ti belte theih a si rih lo.+++
[Relchih]