Federal Army le R2P hei ti hrawng khi thal tireu hngah in kan hngahnak ah CDM kong zong kan ruat tuk ti rua hna lo. Kawl ralkap nih fak tuk in a hun kan den i violence phun deuh in kan hun i mer ruang zong ah si kho.
A taktak ahcun ruahchannak a rak kan pe hmasa bikmi kha CDM a si. Atu tiang zong thi loin a thawng peng rihmi hi CDM a si. Atu hnu zong ah hmual a ngei bik rih dingmi cu CDM a si. Federal Army cu a chuak ve te ko lai nain CDM he an thil ti khawh nak aa dang lai caah kan daithlanh hrimhrim lo a hau.
CDM kong ah NUG cozah an dirh hlan tein CRPH hrim nih khan biatak tein dirkamh le thawnter a rak i hmaithlak cang. Federal Democracy Charter (FDC) an hun thanh mi ah biatak thlak in dirkamh le thawnter a hun i tim than. National Unity Government (NUG) cu FDC ning in an hun dirh i, an i hmaithlak mi vialte cu NUG nih a hun tuanchuah ding khi a si.
FDC hrambunh in NUG nih zeitin dah CDM thawnter aa timh? zei tluk tiang ah a tuah khawh lai timi kan hun zoh lai.
NUG aa tinhmi le a tuah khawh dingmi
FDC Part-2/Section-4 ah NUG cozah nih ai hmaithlakmi tuanvo cu phun (6) in an langhter; uknak chuttu Kawl ralkap hrawh khawh nakding ah ramkhel, siipuazi, lu-hmuh-zi, diplomacy, humhimnak le runvennak a lam kip in tuanchuah ding. Cu pin ah CDM hi a dangte in an hun langhter chih.
NUG nih aa tinhmi hi CDM nih ralkap uknak va thlak khawh tiang lawng si loin CDM ah aa telmi caah humhimnak, dirkamhnak pin ah conglomhnak, caan sau zohkhenhnak tibantuk aa tel. CDM kong he pehtlai in Charter ah phun (7) an langhter. Mah ning tein kan hun leh lai i, ka hmuh ning ka hun telh chih hna lai.
(1) Uknak a chuttu Kawl ralkap (SAC) nih a tlaihmi uknak tungtlang (mechanism) vialte a cawl khawh lo nakding ah Civil Disobedience Movement (CDM) cawlcanghnak cu thawnter chin ding.
CDM hi ralkap nih hramhram in uknak an lak a thaizing Februar 2 ni in a rak i thawk cang. An rak thawkka tein CDM aa tinhmi cu atu Charter nih a langther bang, ralkap uknak cawl kho loin tuah hi a si. NUG nih CDM thawnter chin an hun timh tikah dothlennak tungtlang vialte lak ah a biapi bik ah an chiah ti a lang.
(2) CDM ah aa telmi cozah riantuan vialte hna caah zohkhenh bawmhchanhnak pek ding.
Mah hihi cozah an dirh hlan te khan CRPH nih a rak i hmaithlakmi a si. CDM Support Committee zong an dirh. Cu nih an rak chimmi cu; CDMers pawl lahkhah pekding, an humhimnak (security) ca bawmh ding, vuanthan umnak inn in dawi mi hna caah thut tonak bawmh ding.
Hi pathum chung ah an tuah khawh bikmi cu lahkhah phun in phaisa bawmhnak pek a si. Anmah CRPH CDM Support Team facebook page ah phaisa an bawmhmi hna pawl an langhter lengmang mi hmuh khawh a si. Amah belte ruah ning tluk thil kal khawh dawh a si rih lo. Ka pehtlaih hna i caleh ka tong lo tiah a chimmi an um pah len.
CDMer an tam tikah an tei rih lo a si kho. Cun hi Support Team lila zong an mawh lonak a um. Pakhatnak ah anmah hrimhrim hi i thuhhnawk le zam pah bu in riantuanmi a si. Pahnihnak ah, online deuh in riantuan a si tik ah, Kawl ralkap nih mobile internet le wireless internet vialte an phih dih fawn in riantuantu caah zuamcawhnak a ngan ngai. Pathumnak ahcun, phaisa lei bawmhchanhnak hi biatak tein Kawl ralkap nih kham le dawi aa zuam. Phaisa kuatnak channel tampi an phih. A tom deuh in phaisa van i kuat te hna khi tih a nung ngai. Tik ah, CDMer dihlak tlamtling te hei zohkhenh khawh dih ding khi a fawi ve rih lo.
(3) CDM ah aa tel lo i, SAC kuttang ah rian a tuan peng rihmi le mizapi a serhsattu SAC nih aa tlaihmi hramhram uknak a hmuh khawh nakding ah rian a tuanmi paohpaoh cu dantatnak tuah ding.
CDM ah aa tel lomi cozah riantuan paohpaoh cu kan ral nan si caah kan in ngaithiam hna lai lo tinak a si ko. Hei thihphaih phun khat a si kan ti lai. Dothlennak kan thawkka hrawng ahcun CDM tuah loin zungkai mi va thihphaih le thangchiat kha thiltha ah kan rak ruat kho cio lo. Hihi kan rak i palh mi pakhat a si.
Dothlennak a si caah Kawl ralkap le mizapi karlak ah ral i doh a si. Cucaah Cozah riantuantu paoh nih cun thim ding pahnih lawng an ngei; Zung kai ahcun ralkap ca riantuan; An kai lo ahcun zeihmanh tuah hau loin mizapi ca riantuan an si_an kai lomi kha kan ca riantuan a si ko. A fawimi thil a si lo. Nain hi dirhmun phanh cang ahcun a karlak ah hmunhma a um fam lo. Cucaah, hi zahzah thisen a luan hnu tiang zong zung a kai peng rihmi cu dothlennak a tuahtu caah ral ah chiah lo awk an tha ti lo.
(4) Uknak tha lo doh nak ah mizapi he tangti in CDM ah aa telmi cozah riantuan hna hrambunh in mizapi uknak thar ser ding.
A biapi in a chim duhmi cu general administration department (GAD) khi a si. Mah zawn hi humhimnak lei ruah ahcun a har pah lai. Nain thil tlamtling kho ngai ding a si ko.
Nain mizapi uknak kong he pehtlai in a biapi bikmi cu a tang bik ummi khi a si - sang uktu le khuabawi khi an si. CDM a hlawhtlin biknak zong hi mahka dot ah a si. Mah hihi ralkap nih thate in a kan uk khawh rih lonak a ruang bik a si. Khuate lei khuabawi le sang upa tbk pawl kha thlen dih a timh hna nain a hlawhtling kho lo. Mithar a khinhmi hna tampi nih an cohlang lo.
Cucaah hmun tampi zong ah mizapi an hun dirh cangmi mahte i uknak committee phun an sermi bantuk khi rak tuah cio i, mizapi nih anmah hi a kan uktu an si tiah cohlan piak a hau hnga. Mizapi kan lung ai rual ahcun thil si khomi a si.
(5) Uknak tha lo doh nak ah a nunnak a liam le hliam a tuarmi hna, tlaihkhih le hrem a tongmi hna le an chungkhar hna cu rampi aiawh in conglomhnak pek ding.
Mah belte hi CDM lawng si loin dothlennak ningpi he a vun i pehtlaimi a si. Dothlennak ah nunnak a pemi dihlak hna cu ram ca pasaltha nusaltha ah tuanbia ah tial an si lai.
Democracy ram cheukhat ah Department of Veteran Affairs tbk khi an ngei. Cu nih cun ralkap pension zohkhenhnak, ral ram ah a nunnak a liammi hna tantakmi chungkhar hna zohkhenhnak, raltuk ruang pum tlamtling lo ah ai chuahmi hna zohkhenhnak tibantuk khi an tuah tawn. Cu bantuk phun cu NUG atutan dothlennak kong ah an tuah khawhmi a si.
Dothlennak a dih tikah hi bantuk zohkhenhnak caah rian a tuan dingmi department siloah phu pakhatkhat an dirh cu a hau te hnga; caan karlak chung tu ahcun CRPH CDM Support Team sin ah riankhinh an si.
(6) Uknak tha lo doh nak CDM ah aa telmi cozah riantuan vialte upat conglomhnak pek ding.
Atutan dothlennak ah CDM hi kan ruangruh bantuk a si. CDM ahhin a concept in cun mizapi kan i tel dih ko. Nain atu lio Kawlram dirhmun in cun cozah riantuantu khi CDMer tiah chim duh bikmi an si. Annih pawl upat peknak cu a um hrimhrim a hau. Norway ram in scholar phu pakhat nih Kawlram CDM cu Noble Peace Prize pekding ah nominate an tuah cang. A ngah sual ahcun Kawlram CDM cu vawlei nih a conglomh lai i tuanbia thar a tial lai. An ngah lo sual zong ah kan ram mizapi nih cun kan daithlanh hrimhrim hna awk a si lo.
(7) CDM ah aa telmi cozah riantuantu hna, duhlo langhter nak ah aa telmi siangngakchia hna le mino hna quality thawnter nakding ah i zuam ding.
Hihi cu dothlennak kan tei khawh nakding ah hun i thawnter nakding deuh a si.
Hi kong ah NUG nih an tuah khawh bik dingmi cu phaisa thazaang a si. Dothlennak a zummi paoh nih cun phaisa chuah an i harh lo lio a si; Chin mi sin lila hmanh in tam tuk a chuak cang. CRPH caah gofund.me hmanh in $ 9 milion lengkai a chuak. Cozah zong kan hun ngeih cang caah theihpinak a tuah mi ramleng cozah paohpaoh nih direct asiloah indirect in phaisa bawmhnak pek khawh a si lai.
Phaisa thazaang a um phot ahcun CDM zong hi caan saupi aa chang kho lai. Cucaah CDM caah phaisa tam deuh hman rih a hau.
Biadonghnak
Hruaitu ngei loin caan zeimawzat kan rak cawlcang. Atu mizapi nih cohlan mi NUG cozah kan hun ngei cang. Anmah nih hin hruaitu dirhmun an hun tlaih a hau cang. Cucaah dothlennak ah kan ruangruh a si peng rihmi NUG nih CDM a khamh khawh peng a hau. CDM a nun rih chung paoh hi cu kan sung rih lo tinak a si.
Mizapi nih mandate pek in dirkamhmi an si caah phaisa kawl cu an i harh lai lo. Mahbelte, phaisa a um lengluang ko zong ah ningcang deuh in hman le riantuan thiam ve cu hau hnga. Atu lio ah Kawl ralkap nih a ral bikmi hi CDMer le a bawmtu hna an si. Hi bantuk lio ah ningcang tlai taktak i riantuan zong cu thil fawi a si lo. Hi bantuk dirhmun kan phak lio ah rian aa khinh ngam mi vialte hna hi upat lo awk an tha lo.
Dothlennak...Kan Tei Lai!