Tlawmpal ah Federal Army kan ser lai, tiah CRPH lei upa cheukhat nih an phuan. A rauh hlan ah a chuak lai an kan ti chel. A herh mi timhlamhnak kan ngei dih cang an chel. UN Special Envoy ah riankhinh mi Dr. Sa Sa te tiang nih a hun i hrocer.
Ralkap an hrang chin. Mizapi lei in thisen chuah, tlaihhren mi le a thi mi an tam chin. Cu lio Federal Army kong hun i hrocer a si tikah Jesuh tum than hngah in hngah cio a si.
CRPH nih khan Federal Army ser ding hi biatak thlak ngai in an rak i tim taktak ko. Nain an i ruah ning in thil a kal khawh lo bia tu a si. A um cia mi tlangcung hriamtlai pawl hi kan chimhchawnh hna lai i, a huam mi phu paoh i fonh in ralkap phu khat ah kan dir lai. Cucu Federal Army kan ti lai, ti phun khin fawi ngai in an rak i ruah sual.
Federal Army timi ruahnak (idea) hi a luancia mi 1975 kum ah rak dirhmi tlangcung hriamtlai phu komh National Democratic Front (NDF) nih an rak chuahpi cangmi a si. Hi lio te hrim hin tlangcung mi kan pale nih Federal Army an ser duh dan cu a hramthawk i CRPH ruahnak phun khi cu a si lo. Federal Army tiah tlang mi hriamtlai ralkap vialte kha phu khatpi ah va um dih siloin mah le ramkulh cio ah mah le runvennak ralkap [State Security Force or State Army or Rifles] in a dang tein um ve. Cu hnu ah ram pumpi huap in kan i hrawm mi Federal Army (FA) pakhat kha a hrawm in hei ser. FA cu ramkulh cio nih aa zatceo asiloah proportionate phun in thlah mi ralkap in ser a si lai, ti khi an saduhthah a si.
NDF ahhin CNF zong an rak i tel bal ve i, phu 13 tiang an rak i fonh kho. Nain a hlawh a tling thai lo.
2011 February ah hriamtlai phu tampi an i telnak phu komh thar United Nationalities Federal Council (UNFC) a chuak than. Pu Thein Sein hruaimi cozah thar an kai hlan deuh ah khan a si. Hriamtlai phu 14 an i tel. Kum 2014 thawk khan duhsah duhsah in an hun i zukphiak i, an i then dih than cang. UNFC a kuai hlan zong ah khan a cung i ka langhter mi Federal Army principle (mu) khi an i tlaih mi a si. UNFC a kuai i an i thenthek hnu zong ah NCA minthu mi he, a taang mi pawl he hi thiam hi an i tlaihmi a si.
President Thein Sein chan lio te khan Kawl cozah he biaruahnak ah Federal Army idea cu an hun chuahpi. Nain Kawl ralkap nih cun zeite ah an rel lo. Kawlram ah Kawl ralkap pakhat lawng a um lai, atu kan kal ning hi a tha ko, remh zong a hau lo, an ti salam hna.
Atu Min Aung Hlaing nih uknak a lak hnu in hriamtlai phu (EAO) lei zong biatak tein khuakhannak an ngei cuahmah than. Nizan nai 27 April ni ah PPST meeting a dih hnu in NCA minthu cia mi EAO phu (10) nih cathanh an chuah - a hlan NDF le UNFC bantuk phun phu-komh thar ser khawh kan i zuam than lai, ti a si.
Cu bantuk phu-komh thar a chuah khawh nakding ah Committee zong an ser. Cu Committee nih cun NCA min a thu rih lomi hriamtlai phu pawl biaruahnak an ngeih hna lai. An hlawhtlin ahcun phu-komh thar a chuak than lai. Khi tik zong ah a hlan i an rak i tlaihmi Federal Army principle kha an i tlaih rih theo ko lai.
CRPH nih March 31 ah an rak thanh mi Federal Democracy Charter (FDC) Part-1 ah khan federal security system kong an hun telh chih. Ramkulh cio nih amah ramkulh cozah uknak tang ah a ummi runvennak phu (‘state security force’ tiah an hman) aa ngeih lai, ti a si. Phun dang chim ahcun Ramkomh ralkap [FA] pin ah mah le ramkulh cio nih a zalong mi (independent institution) runvenak or ralkap phu kan i ngeih cio lai tinak a si. Hihi EAO nih an i tlaih mi FA principle he cun aa khat ko. FDC ah hi bantuk a hun i telh khawh nak zong hi, FDC a tialtu ah tlangcung ramkhel party le hriamtlai phu aiawhtu an rak i tel ve caah a si.
FDC zong ah an telh ko cang, ziah dah Federal Army cu a chuah khawh rih ne lo tiah biahalnak a um kho. FDC kha part-1 le part-2 tiah aa then i, part-2 lawng kha caan karlak cozah NUG nih aa tlaih dingmi caan karlak phunghram a si. part-1 tu kha cu NUG hruainak in Federal Democracy Constitution thar an tial te tik ah an i hmaithlak dingmi principle an si.
CRPH nih saduh an rak thah ning ah khan NLD silo mi ramkhel party dang pawl le tlangcung hriamtlai (EAO) he i fonh in National Unity Government (NUG) dirh i, Federal Army zong ser chih ding ti khi a si.
NUG kong ahcun zeimawzat an tlamtling kan ti lai. An duh ning tluk cu a si hlei rih lo. Tlangcung ramkhel party ngan deuh pawl nih an telpi hna lo. Cun, NCA minthu cia mi EAO nih khin a phu-komh min in telpi an tim hna lo – hi zawn ahcun mah le phu kal ning cio si seh timi ruahnak a um. Cucaah Dr. Lian Hmung Sakhong khi CNF in ICNCC in NUG ah a hun i tel. Atu tianng hriamtlai phu upa aa telmi ah amah lawng a si rih. KNPP, KIO tbk minung cu an i tel ve nain an lutlai lei an si hna lo. Cucaah CRPH duh ning bang, EAO he cozah an dirhti ti awk a tha deuh rih lo.
Federal Army kong ahhin a hlawhtling lo deuh rih. Caan karlak chung ah hnawhsare in Federal Army ser nak kong ah EAO le NUG/CRPH karlak ah a fek mi hnatlaknak an ngeihmi hmuh ding a um rih lo. Cheukhat hriamtlai [eg. AA, KNU tbk] caah cun hi kong hi tlangmi le Kawl miphun karlak thil ah an ruah caah a si pah.
FDC Part-1 ah federal security system kong telhchih a si cang caah hmai lei ca tu ahcun hnatlak cia mi principle a um cang ti khawh a si.
CRPH nih NUG cozah an hun dirh khawh hnu belte ah Federal Army biafang an char tuk ti lo. NUG cozah an thanh ni April 16 ah press conference an tuah i, “tlangcung hriamtlai he zong biaruahnak kan tuah pah thiam ko rih lai. Cun kanmah te zong in People Defense Force (PDF) kan dirh lai” an ti. PDF cu hmun kip ah an dirh cuahmah cang.
PDF le EAO ralkap i bawm in Federal Army ser i tim hna selaw a dawh. Mah hi ngiatthlai rih ding ah a biapi ngaimi a si.
Pumpak cuanh ning
Pumpak cuanh ning
(1) Caan sau (long-term) caah
Federal Army dirh khawh le dirh khawh lo hi EAO nih Kawlram buainak dihter an duh ning le an kalpi ning nih lai a rel ngai te khawh. NCA minthu cia mi EAO phu (10) nih cun February 2 lio te in "a that nak in biaruah ding (negotiation)" timi hi an rak dirpi. Naite PPST meeting dih in cu thiam cu an hun thanh chih than.
Negotiation a um ahcun Kawl ralkap institution a rawk lo tinak a si. Kawl ralkap institution hrawh lo bak in Federal Army dirh ding cu thil harsa ngai a si lai. Kawl ralkap nih cun an duh lai lo ti a fiang.
Nain caan karlak i kahdohnak nih fak ngai in a den khawh hna i, Kawl ralkap a institution ningpi a va rawh lo hmanh ah anmah chung ah i thencheunak (faction) fak ngai in a um khawh ahcun an rak cohlan lo mi zong lungdongh in hun cohlan than khawh a si ve ko.
Cucaah NCA minthu cia mi EAO phu (10) nih negotiation timi an dirpi bu ah khat lei in an hun i kah pah peng rihmi khi thil tha ngai a si.
(2) Caan karlak caah
Kawl ralkap tei nakding ah saduhthah khi a si hnga. NUG nih an kalpi cuahmah mi PDF khi biatak deuh in hun kalpi hna sehlaw an hlawhtlin ahcun EAO he i bawm in FA dirh nak ah an hman khawh ve hnga.
NUG nih a ngeih mi ralkap cheukhat le EAO nih a herh ning in ralkap hei thlah cio mi i fonh in Federal Army cu hun ser khawh a si hnga. EAO ralkap phu cu a dang institution tein rak um ve thiam rih ko lai. Kawl min in dirhmi ralkap phu zong a dang tein a hei um ve thiam rih ko hnga. Cucu EAO nih chunmang an manh mi Federal Army model phun zong a si i, Federal Democracy Charter Part-1 i security system an langhter mi zong ah aa tel cangmi a si.
Hriamtlai zapi i bawm in hun ser mi Federal Army cu collective leadership phun in an kalpi hnga. Union Defense Minister le Commander-in-Chief zong kha rotation phun in an hei kalter ko hnga.
Federal Army i ralkap pawl kha khuachung raldoh tu ah hei hmang hna seh. EAO ralkap dihlak nih anmah le umnak hmun cio ramri lei in hun nawr thluahmah ve hna seh. Ramchung ral cu a fak ve lai. Mipi nih kan tuar ve bak lai. Hriamnam hmang in Kawl ralkap kan tei lai seh, tiah cun cu tal cu a hau ko hnga.
+++
A tawinak in hmanmi
CRPH - Committee Representing Pyidaungsu Hluttaw
EAO - Ethnic Armed Organization
FA - Federal Army
FDC - Federal Democracy Charter
KNPP - Karenni National Progressive Party
KIO - Kachin Independent Organization
NCA - Nationwide Ceasefire Agreement
NDF - National Democratic Front
NUG - National Unity Government
PPST - Peace Process Steering Team (NCA-S EAO)
UN - United Nations
UNFC - United Nationalities Federal Council
UNFC - United Nationalities Federal Council