CRPH Charter le federal ruahchannak

March 31 zantim ah CHPH nih Federal Democracy Charter (FDC) a thanh. Charter cu then hnih in an then. A then khatnak cu Federal Democracy ram ser tik ah i hmaithlak dingmi principle pawl deuh an si. A then hnihnak tu cu Interim-National Unity Government (NUG) nih ralkap uknak kan tei hlan tiang a hman dingmi caankarlak phunghram phun a si. Kawl ralkap nih an rak tialmi 2008 Phunghrampi kha CRPH nih kan hrawh cang tiah an hun thanh caah atu bantuk in caan karlak caah lakhruak in phunghram thar an hun sern  hi a si.

Hi Federal Democracy Charter  (FDC - tiah ka hman pah lai) Part-1 hi phundang ngai a si. Atutan dothlennak kan tei i atu ningte a kal ko ahcun Federal ngah colh ding phun khi kan hung si. A chambaunak zeimawzat a um ve bu ah tlangcung mi kan pale pawl nih kum 70 lengkai an rak aupi mi Federal principle a biapimi tampi a hun i tel. Thein Sein cozah chan ah si seh, Aung San Suu Kyi hruaimi NLD cozah chan ah si seh tlangcung hriamtlai he ramkhel biaruahnak ah hnatlaknak rak ngeih khawh lomi chung in tutan tampi a hun i tel. A biapi deuh tiah ruahmi tete ka hun char hmasa lai:- 

(1) “Democracy Federal” in “Federal Democracy” ah

"Federal Democracy" kan ti lai maw, "Democracy Federal" kan ti lai dah?Mah kong ahhin Tlangcung kan pale pawl le Kawl cozah hruaitu karlak ah biatak thlak in bia-elnak a rak chuak bal. NLD le Kawl ralkap nih democracy kan ngah hmasa lawng ah federal cu kan ngah kho lai timi ruahnak an ngeih caah "Democracy Federal" kan ti awk a si an ti. Tlangcung kan pale nih an el khawh hna lo caah "Democracy Federal" tiah hnatlakpi a rak si.

 

CRPH belte nih cun “Federal Democracy” tiah an hun hman i, FDC hrimhrim ah an hun telh thai. Hihi Non-Burmese Ethnic pawl nih kan duhning te a si. Kawlram hi Democracy 100% hmanh silaw Federal loin a dai lai lo. Democracy kan ngah hnu lawng ah Federal kan ser khawh lai timi hi practical a ciah lo- tuanbia nih a langhter cang - 1948 in 1962 tiang democracy kan rak hmang ko nain federal cu kan ngah hlei lo. Cucaah Kawlram daihnak taktak ding ahcun Federal hi papek hrimhrim a hau timi ruahnak a um a herhnak a si.

 

(2) "Basic law" in "Constitution" ah

Charter Part-1/Chapter-4/Section-3/Article-12, "Ramkomh chungtel ramkulh hna nih Ramkulh Constitution sernak nawl an ngei lai”.

 

Hihi Non-Burmese Ethnic (NBE tiah a tawinak ka hman pah lai) kan pale pawl nih an rak hal pengmi a si. Cu kong cu NLD cozah chan ah khan ramkhel biaruahnak cabuai ah an hun phanhpi i, Kawl ralkap le NLD nih “constitution” cu an rak cohlang lo. “Basic Law” tiang lawng an cohlan. Kawl biafang van i hlan i ai dannak van langhter ahcun Consitution cu ဖွဲ့စည်းပုံအခြေခံဥပဒေ tiah an hman i Basic Law cu အခြေခံဥပဒေ tiah an hman.

Federal ram pawl khi zoh hna tik ah ramkulh nih constitution ai ngeihmi zong an um (eg. Malaysia, U.S).Basic law lawng ai ngeihmi zong an um (Eg. Germany). Hi pahnih chung ah pakhat hmanh a ngei lomi zong an um ve thiam (Eg. India). Tlangcung kan pale political voice ngan deuh a ngeimi pawl belte nih cun Constitution bak kan duh ti a si caah Kawl cozah he hnatlaknak an rak ngeih khawh lomi kha a si. (Hika hin fiang deuh ka tialcia mi rel khawh a si>>>NLD Cozah le Federal)

 

(3) “Single Army” in “Federal Army” ah

Charter Part-1/Chapter-4/Section-3/Article-30, “Union Police Force le State Police Force a dang tein ser a si lai. State Security Force ser a si lai. State Police Force le State Secuirty Force hna cu Ramkulh cozah kuttang ah an um lai. Phaisa an hmanmi zong Ramkulh Hluttaw nih a tlangtlak lai”. 

 

Kawlca in "ပြည်နယ်လုံခြုံရေးတပ်” an ti caah State Security Force tiin dengteo in ka hun leh ko. US ram i National Guard bantuk phun khi an chim duhmi si dawh si. Phun dang chim ahcun Ramkomh huap in kan zate nih kan i hrawmmi Ralkap kan ngei lai, cu pin ah ramkulh pakhat cio nih kanmah tein runvennak ralkap phu kan i ngeih lai tinak khi a si. State Police Force he a hun i lo pahmi tahchunhnak lak khawhmi cu Mizoram Police khi an si. Mizoram Police nih khin Mizoram Armed Police (MAP) timi ai neihchih hna i Mizoram humhimnak ah hmual a ngei. Mizoram cozah le MLA tang nih a tlangtlak fawn. 

 

Pu Thein Sein cozah chan lio te khan Hriamtlai kan pale pawl nih “Federal Army” kong hi an rak chuahpi bal cang. Kawl ralkap nih zeihmanh ah an rel piak hna lo. Kawlram ah ralkap cu phu khat (Single Army) lawng a um lai. Federal ram kan ser dih hnu ah ralkap tuan nan duh rih ahcun kan sin ah nan lut lai i, nan i tlakning in rian kan in khinh hna lai, an ti salam hna. 

 

Cuti si ahcun Security Sector Reforms (SSR) tal rak kan tuah piak uh tiah Hriamtlai upa nih an nawr than. SSR kan tuah kho lo, nanmah tu nih DDR nan tuah a hau. Cu lo ahcun Federal caah ramkhel hnatlaknak i ceih khawh a si lai lo, tiah an ti chin hna. DDR timi cu “Disarmament, Demobilisation & Repatriation” ti a si i, hriamtlai pawl nih hriamnam le an phu kha hrawh in ramchung ah luh ding ti khi a si.

Tutan CRPH thanhmi Charter ah Federal Union Secruity System ser a si lai i, State Security Force zong mah le ramkulh cio ah mah le ramkulh cozah le Hluttaw nih a tlangtlak lai ti a hun si. Hihi tlangcung kan pale hna nih an duh ngai ko nain nai cikhua ah an chim ngam ti lomi a si. Kan caah principle (mu) tha ngami pakhat a si kan ti khawh. A si khawh le si khawh lo tu cu phun dang...! 

++++++

 

Ka ca sau deuh sual lai caah pathum lawng ka hun langhter rih. A tawinak deuh in ka hun thai caah cheukhat caah cun a fian a har deuh kho. A taangmi pawl tu hi dikthiar in pakhat tete in pehzulh khawh ka van i zuam lai. FDC a chambaunak zong sawh khawh ka van i zuam te lai. Thanks for reading…! 

A tawinak in hmanmi pawl-

CRPH - Committee Representing Pyidaungsu Hluttaw

FDC - Federal Democracy Charter

NUG - National Unity Government

NBE - Non-Burmese Ethnic

NLD National League for Democracy

SSR - Security Sector Reforms

DDR - Disarmament, Demobilisation & Repatriation