1. Aho paoh nih hruhru hranghrang (violence) tuahsernak vialte ngol ding
2. Dai tein buainak a dih khawh naklai a that nak in biaruahnak tuah ding
3. ASEAN Secretary-General bawmhnak in ASEAN Chair a aiawhtu palai nih lamkaltu tuan piak ding
4. ASEAN nih Coordinating Center for Humanitarian Assistance [AHA Center] hmang in hartong mi hna bawmhnak pek ding.
5. Kawlram caah thlah ding mi ASEAN palai (Special Envoy) cu Kawlram ah luhter in a herh mi phu he paoh i ton ding.
Hihi mi tampi nih kan i lungsi cio lo. Thongtla chuahter ding, teitu party kut ah uknak pek than ding tbk pawl aa tel lo tiah a hun mawhchiat mi kan um. Mi tampi nih kan i ruah ning tluk in ASEAN nih a tuah lo, kan ti lai. Nain a taktak ahcun ASEAN sin in thil tampi kan rak i ruahchan cia lo ding tu khi a rak si.
Regional organization ciocio ko zong ah ASEAN an kal ning hi phundang ngai a si. European ram pawl an komhnak EU, African ram pawl an i fonhnak OAU, Asia thlanglei ram pawl an i komhnak SARC tbk pawl he cun aa dang ngai. Annih pawl khi cu an member ram pakhat a buai tikah a herh ning ceih piak i, i thlak khawh an si.
Nain ASEAN cu kanmah sital te kan ngei, ti a si. Cucu “ASEAN Way” tiah an auh. ASEAN i komhnak ah a biapi bikmi riantuannak cu ASEAN Charter in a si. ASEAN Way he pehtlai in Charter hrambunh in a biapimi principle pawl phun (4) in ka hun char lai.
(1) Mi ramchung kong ah i thlak lo ding (Non-interference)
ASEAN Way ti paoh ahcun hi principle hi a biapi bik in chim a si tawn. Chungtel ram pawl zong nih an i tlaih bikmi a si. Chungtel ram pawl vialte nih ram pakhat a zalonnak, a nawlngeihnak, a ramri le an rammi sinak cu upat piak ding. Midang ramchung buainak ah i thlak lo ding. [Ref. Article-2, 2(a, e, i)].
(2) Rem tein i hawikomh ding (Quiet diplomacy)
Phun dang chim ahcun chungtel ram khat le ram khat i doh lo ding tinak a si. Buainak a um sual hmanh ah daite biaruahnak in dihter ding. Hruhru hranghrang le hriamnam hman lo ding. ASEAN nih a kalpimi mu ning in buainak dihter i zuam ding. ASEAN ram ah daihnak, remnak le duhdim nunnak a um nakhnga tuanvo kan ngei dih. [Ref. Article-2, 2(b, c, d, g)/ Article-22 (1, 2)]
(3) Zapi hnatlaknak in biachah (decision-making based on consensus)
ASEAN chungtel karlak ah biachahnak tuah tik ah zapi hnatlaknak (consensus) in biachahnak tuah ding. Biachahnak pakhat tuah tik ah ASEAN member dihlak nih a hnatlak mi a si lai tibantuk khi a si. Nain UN Security Council bantuk in veto power an ngei dih tinak cu a si lo. Felfai tein i ceihkhan i, biachahnak paoh kha lungtlin ciomi a si a hau tinak khi a si. Cu bantuk in biachahnak tuah khawh lo sual sile a herh ning in biachah khawh nak lam dang kawl ding. [Ref. Article-20 (1, 2)]
(4) Hreenak umlo (Non-binding)
Charter ahcun aa telmi a si lo. Nain Charter chung ah aa telmi mu (principle) pawl, biachahnak tuah ningcang, tuanchuah ningcang pawl hun fonh dih tikah ASEAN Way cu “non-binding” a si tiah mifimthiam pawl nih an timi a si. A sullam cu, biachahnak a um tikah cu biachah ning in chungtel ram pakhat nih a tuanchuah lo ahcun cutin khatin dantat ding tbk khi a um lo. An biachahnak nih a hreeng hna lo kan ti lai. Cucu a cung pathumnak i ka langhter cangmi ‘biachahnak tuah ning’ nih a hun laklawhter mi zong a si.
Hihi ASEAN a thazaang der biknak le an soisel biknak zong a si. Tahchuhnak ah, Nizan Kawlram kong ah consensus pa (5) kan ngei kho an ti. Min Aung Hlaing zong nih a lungtling tinak a si. Nain Kawl ralkap nih mipi a kan thah thiam lai. Kawl ralkap duhlo tu phu pawl he biaruahnak tuahding timi a tuah duh men lai lo. Khi tik ah ASEAN nih ziah na tuah ne lo tiah dan va tat awk a tha lo. Kan hnatlaknak na upat lo tiah an hei mawhchiat lai i cu vial.
Cucaah ASEAN nih ramchung buainak phisin khawhnak thazaang a ngei lo. EU, US, UN te pawl nih siipuazi phihkharnak te hna an tuah bantuk tiang khi tuah khawh nak an ngei lo. Cambodia, Vietnam, Philipines, Thailand tbk zong an buai tuk bal cio ko. ASEAN nih zei a tuah kho lo. Kawlram Rohingya buainak zong ah khan Malaysia a thin a rak phawh tuk nain zei titi a rak um lo kha.
Cucaah Tuluk zong khi ASEAN ram pawl cung ahcun aa seihchiah ngainak a si pin ah amah ASEAN hruaitu lila hrim ramchung buainak kong ahcun an zaalong tuk tawn. Thailand a buai cingling ah khan an Prime Minister Prayut kha ASEAN Summit kai ding a si. A kal hlan ah, “nan ka mawhchiat ahcun meeting in kan chuahtak hna lai” tiah aa hrocer cia. Aho hmanh nih an mawhchiat ngam lo.
Cucaah hmailei zong ah ASEAN hi cu tampi kan i ruahchan ding a si lo. Special Envoy an hun thlah dingmi zong nih khin zei pipa a chuahpi te lai lo. A tuah khawh bik dingmi cu hmurka le statement hrawng in mawhchiat i pressure hei pek. Ram dirhmun a chiat tuk lawmmam sile chungtel sinak in suspend hei tuah. Chungtel ramkhat cio nih diplomatic lam in pressure hei pek ti vial khi an tuah khawhmi a si. Ram thlen khawh nak tiang thazaang ngei selaw Than Shwe chan khan a rak thlen diam cang hnga.
ASEAN chuahkehnak
Thailand, Malaysia le Philhipines nih 1961 kum ah Association of Southeast Asia (ASA) tiin an rak dirh hmasa. 1967 kum ah Indonesia le Singapore nih an hun telpi hna i Association of Southeast Asian Nations (ASEAN) tiin an thlen. 1984 kum ah Brunei a lut. 1995 ah Vietnam a lut. 1997 kum ah Kawlram le Laos an lut. 1999 ah Cambodia a lut. An zate ram (10) an si. Indonesia in Independent a la mi East Timor nih khan luhnak nawl a hal ve nain Indonesia nih a khenkham caah Observer in an umter. An headquarter cu Indonesia khualipi Jakarta ah a um.
ASEAN anthem cu "ASEAN Way" tiah min an pek i, link ahhin hun ngeih khawh a si.