 |
| Photo - RFA |
Mah-Ah-Lah nih thongtla pawl 20,000 lengkai luatnak a pek hna. Hi kong ah ruahnak phun thum hrawng a chuak. (1) UN Human Rights Council meeting an thut ni a si ruang ah
Rakhine ramkhel lei ah an bochan bak mi Dr. Aye Maung kha a
luatmi ah ai tel. Hihi ANP nih SAC chungtel tian an cohlan mi he
ai pehtlaimi a si. Min Aung Hlaing nih ANP a sawm lio hna ahhin ‘deal’ an ngeihmi
ah Dr. Aye Maung thlah ding hi ai tel ti a si. Ramkulh le ramthen pawl SAC caah
civilian an thim mi hna le ANP te pawl he deal an i tuah ning zoh tik ah ralkap
khuakhan ning pawl hi i fian cu a har pah. ANP he deal an tuahmi ahhin Arakan
Army (AA) kha ralhrang cazin in hnawh piak ding in ai tel rih ti
a si. A dik le dik lo tlawmpal ah a fiang chom ko lai.
Hakha lei in kan hawile duhlo langher hruaitu hna nih Warrant an
kan chuah i, kan i thup chung lai tiah an facebook ah an hun tar. Salai Ngun
San Aung le Salai Elisma hi atu lio Hakha lei duhlo langhter ah hmaisuang in
hruaitu an si. Tik ah, Chin ramkulh SAC nih tlaih ding order chuahmi cazin ah an
telh hna caah kan i thup ta rih lai tiah an Facebook ah an langhternak cu a si.
An i thuh awk te bak si ko; thong chung umnak cun a leng khoika paoh in rian
tampi ai tuan kho deuh.
Min Aung Hlaing nih Chin ramkulh minister rian a pekmi cu Pu
Ngun San Aung (Salai a si lo) nih a cohlan cang tiah tuchun cu bia a chuak hoi.
A fiang maw fiang lo hme van ti lio ah Pu Ngun San Aung cu Chin ramkulh SAC nih
an tuahmi Union Day puai ah mirh zuai in a rak kai diam manh cang. Cu cel ngel
cu - Ngun San Aung veve ral an tho ne lai. Pu Ngun San Aung hi Pu Hung Chan lio
ah khan Transport Minister a rak tuan bal cangmi a si. MAH nih minister a
fialmi ah Tedim in Pu Ko Suan Khai zong ai tel nain anih tu nih cun “rak ka
tuanter hin hlah law” tiah ca in a khirh than.
Mon ramkulh Mawlamyaing khuapi ah duhlo langhtermi siangnakchia
pawl Palek nih an lehrulh ning hna cu thin a lin ko. Siangngakchia lei nih zeihmanh
an ti hna lo. An hmaisuang pa kha vok dum bak in Palek run nih cun an vun dum i,
an vun tlaih ah khan siangngakchia dang cu an zaam. Amahte a zaam komi
sianghngakchia cu Palek nih an hei kah hna. Pakhat cu fak ngai in hliamhma a
tuar i, thinphang dirhmun a phan ve ti si.
Nizan tihni ah Naypyidaw i, an kahmi Mya Thwe Thwe Khaing zong
kha a nunnak a liam cang e ti si. Cheukhat nih cun a thi taktak rih lo a timi
zong an um. Nain Siizung lei in Doctor te nih a thluak a thih cang caah a dih a
si ko, atu i thaw a ngeihmi khi cu seh in thaw kan pek ruang ah a si e, an ti. Tutan
buainak ah a thi hmasa bikmi a si. Thaizing (13 April) hi amah philh lonak le
upat peknak ah Rangoon khuachung ah ton khawmnak kan ngei lai an ti.
UN Human Rights Council meeting ah Kawlram an thuat ning a fah
ning le ai san lomi China le Russia nih Kawlram lei an hei tan ning hmuh ah ing
a puang. Tuluk nih ai thawh le, “Hihi cu anmah ramchung buainak sawhsawh a si
[ramleng he kan i thlak hau lo ti duhnak]. An hruaitu pawl he zong pehtlaihnak
kan ngei ko i, punghman dirhmun a phanh khawh naklai kan duh piak hna”. Hihi cu
anmah ramchung buainak a si caah an zalonnak hi kan upat piak awk hna a si tiah
Russia nih a ti ve. Fak deuh van chim ahcun ‘luak lei an chuak’. US an huat
ruang le an i zuamcawhnak ruang ahhin Kawl ralkap hi an tanh hramhrammi a si ve
tik ah US le nitlak ram pawl nih biatak deuh in thazaang an kan chuahpi cu a
hau ko.
Rangoon khuachung cu chun ahcun Palek an cawlcang hraw rih lo.
Zan belte ahcun atu ca ka tial cuahmah lio ahhin San Chaung, Kyi Min Taing lei
hrawng cu mifir an vak cuahmah ko ti si. Atu lio cu zan mi tlaih hmangmi palek
kha mifir tiah auh an si.