Ka hawipa sin ka riahnak inn ah thaithawh kan
ei lio (sml.8:00am) ah Facebook ka hun kau. Media kip ka bih pah; Thanlin in
khuachung lei luhnak lam kha hlei cung in an phih i, palik nih an congh len ko. Zahan thawngpang theih cio he lau cu um pah. Myanmaw
Now nih Hledan lei in live an van thlah i, do duhlo langhter ding pawl
khat-thup in an um cangmi hmuh tik ah lung a tho ngai than.
Ka hawipa Kawi Ceu kha tuchun cu kai din lai a ti caah keimah lawng kai thawh. Nizan bantuk in lam ah sau tuk ka taang than sual lai ti phan ah GPS in lam a pih lo deuh nakding kha ka tuaktan len hmasa. Thingangyun in Novetal Hotel (tonnak hmun) kalding a si.
Kai thawh, 9:40 si cang. Parami lam lei in kai mongh i, Pyi lam ah
ka luh tiang cu ka tluang ngai. Lotte hotel hmai ka phanh belte cu a thawn kai
thawn ti lo – Hlendan ah minung an rak khat dih cang caah cuka tiang cu a kan kham ko. Lotte Hotel le Hledan cu 1 kilometer hrawng lawng a si. Cu ahcun minute
40 hrawng ka rau.
Hledan hlei (fly over) cung ka phan. Hlei cung ahcun a hriang leikap lane zawn ah mawtaw khat thup an rak dirter cio i, hleicung in hlei tang lei hei cuanh panh khin an rak au len. Leklak ka mawtaw cu hleicung lamkap ahcun ka van deet ve i, hlei cung ahcun caan ka hmang.
Mah-Ah-Lah hmanthlak an cil. Mawtaw seh ka van
thah bak ah khan ka sirlei taxi mawng pa nih Ming Aung Hlaing hmaithlak ai
chuah i, lam ah a dir liomi pakhat kha “heh ka hmailei ah khan hei chia ta” a
ti. Parh ko in a rial. Cu cangka cun a pawng pawl nih khan hmanthlak cu an hun
zuan hnawh cio i, a chuihna, a lam na, cil chakna tiin an thuat len ko. Amah
[MAH] nih cun i hmuh hmanh selaw a zei poi theng lai lo nain a fale tal nih cun hmu
hna selaw tha hnga - ruahchuk ruakcho...
Mawtaw cung cun ka tum. Hledan center lei tang
zawn ka hei zoh – an khat phikphek. Phungki pa nih bia a chim cuahmah lio a si.
Tutan hi kum 2007 lio bantuk in Phungki hmuhding an um lo tluk a si. Bia a chim
cuahmahmi phungki zong hi a laar huaha lem rua lo – maw ka hei theih lo bia dek.
Hledan lam lei khin Kachin thantar (flag) ai putmi mibu ngan ngaimi cu an lut –
tuchun ah ra ve ding cu an si theo lai ka hei ti. Tlawmpal ah mawtaw cung in
bia a chim lenmi phungki pa cu nungak no te pakhat nih a hun chawn. Sandah piah
pawl thatho ding phun in biachim a thiam le si lai kutbengh le aukhuan a tam
ngai. Hlei cung cu si kaw a aw din deuh caah kei bel ka thei lo.
Video tlawmpal ka thlak pah in University
Avenue lam lei ka hei hoih than. US Embassy telin diplomat le VIP deuh an umnak area
lam a si caah Palek nih sandah piah pawl an congh hna nak lam a si. Hlei cung
ahcun minung cu kan khat tuk i, a tanglei tiang va hmuh khawh nak hmunhma khi
ka ti kho lo – pe 5 le zeimaw hrawng lawng rak si cu a poinak hi tam ko ๐ . Palek pawl lawng khi ka hei hmuh khawh hna. Titoihnak tengki mawtaw pahnihthum
he palek nih cun sandah piahnak hnahnawh pek timh dawhdang khin an i tlar len
ko.
I ton ding an timi caan a lonh pah cang caah
Novotel lei cu ka lan. Hotel hmai ka phan i, a rak i bumi ahcun Laimi le
Laithuam mui dawhdang an um ti lo. Mawtaw in chuak loin ka hnuhmai ka van i
her dungdang ah khin Hledan in Khuachung lei a kalmi bu an ra. Lai thuam
in a ummi panga ruk ka hmuh hna. Hihi Chin cu an si ko lai hih ka ti. Ka hawipa
Chichi kha phone in “Khoika nan um?” ka hei ti. Kan kal cang, “Inya lam pial
kan phan deng bak si” a ti. Azee loh si cang- keimah lawng vaihvuanh dawh.
U-Turn van tuah i, Hledan lei van kir than
ding ahcun sml tam tuk rau than ding a si. Cu nakcun lamkam ah mawtaw chiahta i,
ke in va dawi hna kha kai thim deuh – Novotel le kan phan cang a tinak in cun ke in
minute 20 kal hrawng si. Ni a linh saling si fawn cang.
Pyi lampi kam cu sikaw mawtaw chiahnak ah ka
buai. Fly over (hlei) kam bak cu si hoi pin ah Hledan in khuachung lei ah sandah
piah ai thawhmi cu a runrun in kal thluahmah hoi hna. Novotel hotel hngaktu pa kha nan basement ah i chiahta ning ca tiah ka hal i, ‘ma-ya-bu’ ti si. Mibu
lak i lamkam van chiah ta ko kha ka siarem fawn lo. Ti awk theih lo tuk ah hmai
ka fong thulh, noh ka soh thulh. Seh ka thah i, a hnuhmai ah chiahnak tha um
hnga maw tiah ka van i her luklak. Zeihmanh chuak lo.
Minute 20 hrawng zei tuah awk theih loin ka um hnu ah BMW Showroom luhnak lam ah a rak i park mi mawtaw pakhat kha a chuak. Mawtaw chiahnak cu ai lim.
Chichi ka hei chawnh i US Embassy hmai ah ka
um, ti si. Ka khuaruahhar pah - cuka cun zeidah an va tuah hnga tiah. US
Embassy hmai va um kha san a tlaihnak ka theih lem lo caah “mah dih in khoika
dah nan kal lai? Nan kalding lei ah ka rak um cia lai” ka ti. “Thei ve rih lo,
zapi kalnak ah si te ko lai” a ti. Okay sicun kan i chim than te lai cu ka ti,
Hledan ah keimah lawng ka choi huar.
Hledan hlei tang cu mawtaw kalnak tha lo tluk
in minung an rak khat cang. A thu na, a dir na. Hlei tang bak in tual ah khan
khat thup an thu i, pakhat hruainak in an au len ko. An au ning hoih cun ka hei
au len ve ko.
An aumi ah khua a van ka ruahtermi pahnih belte um.
“แแ်แူแွေแိုแေးแေးแဲ့แဲ? – NLD แိုแဲแေးแဲ့แแ်” an timi le “แီแိုแแေแ
ီแแှိแေး - แို့แกแေး"
an
timi khi. 2020 Thimnak ah NLD thimfung thlatu ka rak si ve lo ruang ah si loin
atu bantuk dirhmun ahcun party kong te hna cu buaipi tukding ah khin ka ruah
lomi a si.
Hi
zawn a phak poh ahcun ka au lem lo. Cun Democracy yah-sih-yi an ti lengmang nain
Federal yah-sih-yi ti cu voi khat hmanh an au bal lo. Kawlram buainak a hram
taktak hi Federal ruang deuh ah dahkaw a rak si, tiah ka lung chung in ka zai
pah - hei telh chih hna selaw ti ka hei duh bia.
Hlei cung in ka hmuh khawh lomi University Avenue lam lei hoih in palek pawl he hmaichon in a dirmi pawl lei ah ka hei kal than. Palek cu thuah hnih in an i khamnak sield le hriamnam he ready an si. Tengki tikahnak cu mizapi lei an hoiter cia cang. Mizapi lei he palek lei he fiangfai deuh tein video thlak ka duh caah keimah pi lawng kai chawkpade pah.
Yangon
University dumphih leikap te ah khin hmun lawng pakhat a um i, cuka zawn cu
mibu le palek an umnak karlak zawn a si caah hmanthlak a rem ngai. Video camera
on pah cun ka hei kal i, University dum chung in mirhpurh ah a van bih lenmi
Sayama te nih khin “hika lei hin ra hlah, an in kah sual hna ahcun na zaam
nakding a pit sual lai” an ka ti. Mirh nawn in ka hei kaltak hna.
Tlawmpal ahcun Tialte ka hei chawnh than i, Happy Noodle ah kan phan ti si. An hong kir lei khi si cang. Taxi ka hlan i, an sin ahcun ka va kal. Chuncaw an rak ei cuahmah cang. Rawl an phawtmi cu i phuhrung nawn in kai lak ve. Tialte kha ei ai tim lo nain. Rawl phawtu pa nih “dothlennak chuncaw cu ei lo a ngah lo” tiah a van capo i, ai lak ve than. Rawl ei dih cun haotu pawl nih tlawmpal bia an chim i, kanmah le siaremnak cio ah kan i then.
Chi Chi, Tialte, Cer Lian pa, Pahu lei kei Hledan lei ah ke in kan
kir than. Kan ba ca i, zei ngaingai cu kan tuah kho ti lo. Tlawmpal kan um hnu ah kan tin.