Myanmar spring diary (Day8) – Ruakthlah tlolh hnu ah lamzawh

Tuchun hi khoika lei deuh ah hme ka kal lai tiah kai ruah cuahmah lio ah Kalaymyo ka hawipa Pa Bawi (Za Bawi Thawng) sin in phone a ra. “Saya Cung fapa kha Bahosi siizung ah atu nai bak kha a cat. Kalaymyo ah a ruak van tlunpi ding si i, mithi phurhnak mawtaw zeiti tal in na kan khanpi kho hnga maw” ti si.

Rangoon lei mawtaw hlannak hi kei ka theih tuk lo caah U Thawng (Saya TT tiah theihmi NC Thawng Tha Thang) sin ah ka va kal colh. An room ka phanh ah mithi pa a pa Rev. Cung Hup (Kalaymoy Salem Baptist Church pastor) nih a rak chawnh manh ve cang.

Kan innchung cu buaicur in kan um ko. Zahan celngel ahcun U Siam (U Thawng thaisung nu) a unu pasal Pu Zara nih Aizawl ah a kan liamtak ve; zingka ahcun U Siam zong a ngeihchiat tuar lio a si. Cu lio ahcun kei le U Thawng nih Kalaymyo lei ruak tlunpinak mawtaw heh-le-maw tiah phone in kan i zuam cu si. Duhlo langhternak zong ahcun i tel kan hei duh pah thiam rih.

Mawtaw hlannak cu kan tuaktan. U Thawng nih a network chung in phanh khawhmi vialte a chawnh dih hna. Covid-19 lio te khan Rangoon in khuadang lei mithi ruak phur tawnmi vialte cu “kan i din, Rangoon khuachung covid mizaw ca tu ah kan tuan” ti lawngte si. Mah-Ah-Lah nih uknak a lak chinchap tik ah khualeng lei chuah kha a ngamh in an ngamh lo. Private mawtaw pakhat te kan ngah i, ting 15 an kan hauh. Ting 15 a kan haltu pa cu Kalaymyo lei nih phone an tlaih lio ah anmah zong nih thei hna seh tiah U Thawng nih a chawnh i, “a poi lo, a ruak tlunpi khawh kha biapimi si ko” ti si, Kalaymyo lei nih. Ruak tlunpinak mawtaw cu a tlamtling.

Ruak thlah dih in duhlo langhternak hmun ah kan kan i tim. “Ruak umnak ah kan zate [Believer Church Yangon mino cheukhat le riantuantu hna] kan kal lai i, kan thlah dih hna in, Sule lei ah duhlo langhternak ah kan kal lai” U Thawng nih a ti. Okay, kai hrawm. Tlawmpal ah Aizawl lei i Pu Zara thihnak topi ding ah kan inn ah pastor te an hong phan.  

“Van Hmun Cung le a dang pahnih hrawng he tu rak kal chung ulaw hika lei ah thlacamnak [Pu Zara tantakmi topi] kan neih hnu ah caan um sile kan in dawi te hna lai ti” U Thawng nih a ti i, ka “Okay”. Kan i thawh hlan deuh te ah Pa Bawi [kalay in] a van ka chawnh than i, mawtaw kha man deng deuh [ting 5 in] midang nih an kan hmuh piak, ti si. Okay a tha chinchin ko kan ti i, mah cu kan i rinh.

SAC dohnak ah lamzawh ai thawk ni thumnak si cang caah minung an tam chinchin lai ti cu kan theihcia ko nain khoika lei in dah siizung fawi deuh phanhnak a si hnga ti kha ruahcia har ngai. Pyi lampi lei [zungkai ka kal tawnnak lam] in kan kal. 8mile kan phanh hrawng khin kar khat tete lawng in kan i thawn cang; Hledan lamzawhnak ah minung an rak tam tuk cang tinak a si. 8mile in Parami lampial karlak ah suimilam cheu kan rau. A si kho ti lo tiah Parami kan lonh in U-Turn ka tuah i, Kabar Aye Pagoda lam lei ah kan kal. Myanmar Plaza tiang cu tluangte in kan kal kho. Shwegonetaing va panh ah khin lam a pit chin vima hoi cang.

Lam thluangthluan i mawtaw vialte hi duhlo langhtermi mawtaw hlah maw an si dih ti awk in an um. Puansen ai thlaih na, NLD thantaar an thlaih na, mawtaw cung kai in a a au na, horn tum na, songbox ngan pipi ai ken i hla chuah na tiin an si. Ka-bar-ma-ce-bu timi hla kha thang taktak in ka chuah pah ve; mawtaw thlalang ka on i, ka hawile he cun kutzung thum kan thlir chel, hawi au zulh in kan hau chel. Lampi ah kan rauh tuk cang caah a ngu dengmangmi a hnulei thumi Saya Ta Ta le Pa Ling cu an hrio viar manh ve.

Suimilam cheu baak hnu ah Shwegontaing hlei kan phan.  Shwegontaing lam cung ah [NLD headquarter leikap in] lamzawh mibu pawl an ra i Nat Mouk lam lei an rak kal cuahmah khi si. Cu nih lam a kan kham. Hlei cung ah kan taang. Hlei cung ahcun kan chuak i, hlei tang lam zawh pah cun kut kan hei thlirpi hna. Hman kan thla pah. Live a thlah na a au na kan si.

Mawtaw chung ah ka lut i, Bahosi lei ah cu ka chawnh hna. Ambulance a phan deng cang ti si. Kan tlai te sual lai maw hi ka ti. Kan i thawh than. Kan i thawn khawh tawk vial kan i thawn depmap. Cu ahcun Saya Ta Ta le Pa Ling kha “nan duh le lamzawh mi hi rak join chung hna ulaw ruak kan thlah dih in kan ra ve te lai” ka ti hna i, “si ve ko” an ti.

Van Hmun Cung le keimah lawng siizung lei cu kal chih kan i tim. Siizung cu phone ka hei chawnh than hna ka ti cu, phone kai palh le ambulance a rak hlan piaktu hna kha a rak si. “Ruak cu siizung in an chuahpi cang. Nan rat khawh ding ahcun Zero Mile in rak hngah khawh si” ti si. Zero Mile va kir than ding cu chun ni tlak rau ding phun si pin ah ruak kan tanh le tanh manh lo ding a fiang ti lo. Zeiti tha kan ti i, Sule lei tu ah kan lan. Ruak thlah tu cu kan tlolh. Caan sau ngai kan kal hnu ah Aung San Stadium pawng ah mawtaw kan chiah khawh.

Sule lampi lei in duhlo langhter mi mibu umnak ahcun kan kal. Sule ahcun mibu an rak khat dih cang. Lamkam ah a thu i, ai din na, a it na, a ei na, a au na – hnok cur in um si ko. Mibu umnak lei ahcun kan kal i, lamzawhnak ahcun kan i tel; hawi au bantuk in kan au pah ve; hmanthlak le video kan thla pah.

Ralchiatnak mithmai hmuhding a um lo. Myodaw Khan-ma hmai kha Palek nih an congh – mibu kahnak tengki le an hriamnam pawl he ready an si ko. Palek nih an khammi thir-ri kam bak ahcun mizapi cu i buut a si. Eidin, pangpar phunphun kha Palek pawl lemsoinak ah cu thir-ri cung ahcun an hei chiah piak hna – Palek pawl nih cun pakhat hmanh an i lak in an ei lo. Mizapi mithmai ah tihnak pakhat hmanh a lang lo. Ralkap mui hmuhding an um lo ruang si hnga dek maw. Covid-19 tih le tih lo zong kan ruat cio ti lo – Mask a bunh duh lomi zong an tor cang. Atu lio Covid-19 hi ai thawkka bantuk khan hrang pah selaw phum cawk loin kan thi cang hnga teh.

Atutan boruak ahcun pakhat le pakhat karlak ah dawtnak le lungrualnak kan khat. Ai sivua le a buaibaimi an um lo. Lampi mawtaw lam i cuh sual zong ah ai aukhak kan um lo. Palek pawl hnahnawh va pek a um lo – lemsoi deuh tu in tan a si. Kan aumi ah ai tel lengmangmi cu “Pyi-thu-ye [mizapi palek]” timi a si. Nannih Palek cu cu kanmah [mizapi] leitang nan si, hei ti duhnak khi si ko. Rawl ei awk le eidin phunphun, ti a hlu na, hnawm a char na. Hi zawnte hi uar kan um cemnak a si. Hohmanh nih lam ah hnawm hlonh hla uh, tiah an aupi i, an hlonh sualmi zong a char tu an rak um. Mizaw Bawmhchanhnak lei a tuan tawntu phu pawl nih an mizaw thlopbulnak thilri le an mizaw phurhnak mawtaw cu mibu pawng ah ready in an chiah – pakhatkhat si sual ah ti khi cu. A boruak zoh ah khin lung a nuam, hna a ngam, chun nilin saling a si ko nain thabaat zong theih a si lo.

Suimilam pakhat hrawng lam kan zawh hnu ah chuncaw einak kan kawl. Kan ei dih in kei ka hawile dang sin ah ka kal i, Kawi Cung tu cu Believers Church Mino pawl sin ah a va kal. Zan ah Pohmah 144 an thanh. Minung pa (5) siloah ah pa (5) nak tam minu um a ngah lo, ti si. Zan suimilam 8:00 pm hnu leng chuah a ngah lo ti si. Thaizing zeidek kan lawh te lai...!