Kawlram buainak le tlangcung hriamtlai - NCA a rawk lai maw; Kawl ralkap a rawk lai maw?

Photo-Irrawaddy

Biadomhnak

Ralkap uknak duhlo langhternak cu mizapi lei nih Civil Disobedience Movement (CDM) in February 4, 2021 in an thawk. Hi hlan deuh February 3 zan ah thirpung le khengbel tumnak in an thawk cang. Red ribbon, kutzung thum thlir tbk tuk zong in duhlo langhter a si. February 6 ni ah Rangoon in lamzawh an thawk i, February 7 ahcun Kawlram pumpi ah a karh dih manh. February 8 zan ah Pohmah 144 an thanh.

February 9 ah Naypyidaw ah a voi khatnak bik duhlo langhtermi an kah; a kan liamtak cang. Lamzawh duhlo langhter pawl hmun cheukhat ah Palek nih an thiohmal cuahmah hna. February 12 ah thongtla 20,000 renglo an thlah hna i, timh ciammam in mizapi hnahnawh a kan pek – inn duah, thil fir, hriamnam hmang in thahnawn timh, siivai thlah tbk an tuah. Zan ah thathi in kan i hngilh kho ti lo.

Hi tluk in a buai lio ah tlangcung hriamtlai pawl ziah an daih ko hnga tiah biahalnak tampi a chuak. Biahal phu zong a si. Hriamnam lei ah a thawngtha deuhmi KIO, KNU, RCSS tibantuk nih i statement in si seh, media sin ah si seh mizapi dirkamhnak le ralkap uknak lakmi an duhlonak cu an langhter. Nain, hi lawng hi maw an tuah khawhmi a si hnga tiah mi tampi nih hlam an tong. Peace Process ah thawngpang a la tawntu Kawl journalist phu nih NCA minthu mi phu (10) fonh statement cung ah an i lungsak lonak cathanh an chuah (Irrawaddy, 10 Feb 2021). Chin zatlang lila zong ah CNF dirhmun ah ai lungsi lo i a phunzai tawk an hun tam ngai. Hi vialte kong ah ka banh khawh tawk in tlangcung hriamtlai an dirhmun virhkhoih kai zuam lai. Keimah pumpak hmuhning zong tampi ka langhter lai.

Phu hnih in then ta a herh

Tlangcung hriamtlai an dirhmun van ceihhmai ding ahcun a tlangpi in phu hnih tal (a tlawm bik) in then ta an hau. Cucu Kawl cozah he NCA kahngolnak min a thu cangmi le a thu rih lomi hi an si. Ziah tiahcun kahngolnak an thut hnu cun hnatlaknak an ngeihmi nih a hreen cang hna caah ruahpiak thiam a herhnak zawn a um. Ziah tiahcun hi Nationwide Ceasefire Agreement (NCA) ahhin kahngolnak sawhsawh siloin tlangcung hriamtlai hna nih kum (60) lengkai an rak aupimi ramkhel biaruahnak kong ah hnatlaknak ai telchih.

[Relchih]

NCA cu zeidah a si? 

Kahngolnak min a thu lomi pawl teh? A buaktlak in chim ahcun NCA minthut hi Wa le Mongla dah ti lo nih cun an duh dih ko. Ziah tiahcun NCA lam loin ramkhel biaruahnak ah lamdang an timhlamhmi a um lo. Tikah, lamdang kawl hi an i harh. Ziah a duh komi cu an thut ne lo tiah biahalnak tuah khawh a si. An thut lomi a ruang cu NCA kong ka tialmi ah khan aa tel.

NCA minthu cangmi phu (10) dirhmun (NCA-S EAO)

Ralkap nih uknak a lak thaizing February 2 ah PPST lakhruak meeting an tuah. Peace Process Steering Team (PPST) cu NCA kahngolnak minthu cang mi phu (10) [NCA-S EAO] in top leader pawl an i ton tawnnak a si. Hi meeting dih in phu (10) fonh nih an dirhmun an langhter;

“(1) Ralkap nih hramhram in uknak an lakmi cu kan pom lo; (2) [cozah le ramkhel hruaitu] tlaihmi vialte chuak dih hna seh; (3) thate in ceihhmai biaruahtinak in hi buainak hi dither ding; (4) NCA ning in kan dir lai; (5) ram pumpi huap in kahngolnak thanh ding; (6) [atu lio buainak ah] mizapi lei ah kan dir lai; (7) UN tel in ram dangdang hna nih hi buainak kong ah a kan dirpi ding kan duh” NCA-S EAO Facebook page.

Hi pin ah a dang cio in phu (5) [RCSS, KNU, CNF, ABSFF le ALP] nih statement an chuah rih. RCSS, CNF le ABSDF nih cun “aa-na-ting kan pom lo” tiah fiang ko in an langhter. KNU hi February 2 le 14 ah voi hnih an chuah.  Ruah ning nakin an cathanh belte ahcun dengteo siloin “kan thin a phang” ti vial a si. “Mizapi he hmun khat ah kan dirti lai” ti tu cu an langhter. CNF zong February 2 in an cathanh ah “Mizapi he kan dirti lai” timi hi fiangte in an langhter ve. Phu khat cio nih an langhtermi ah an i khat policy cu “thate in i ceihtinak in daihnak lam kawl ding - ငြိမ်းချမ်းစွာ စေ့စပ်ညှိနှိုင်းအဖြေရှာရေး” timi hi a si. Cucu a cung deuh i phu (10) fonh cathanh pathumnak ah ai telcia mi zong a si.

NCA mithu lomi phu hna (NCA-non signatory groups)

NCA minthu lomi ahcun a min in cun phu (11) an um. Hriamnam thawngtha deuh pawl [KIO, AA, TNLA, MNDAA, SSPP, NDAA, UWSA) hi Federal Political Negotiation and Cosultative Committee (FPNCC) tiah phu dang in an dir ve. Nain, UWSA (Wa) le NDAA (Mongla) hi NCA a interest lomi an si caah hi phu hi hmuai a ngei tuk lo; non-binding deuh asi. Nai hrawng lebang ahcun phu (4) [Northern Alliance + KIO] deuh in Kawl cozah he biaruahnak an hun ngei deuh.

AA (Arakan), TNLA (T’ang) le MNDAA (Kokang) hi Northern Alliance rak timi kha an si i, a dirhmun ai khat tawnmi an si. Atu lio buainak kong ah hi hna pathum le SSPP (Shan north) nih cathanh si seh, an dirhmun kong ah tha tein chimmi an ngei rih lo. TNLA lutlai cheukhat belte nih an Facebook ah kutzungthum tlirnnak hmanthlak an post ve (Joe Kumbun, 11 Feb 2021).

KIO tu hi cathanh ngaingai cu an chuah lo nain an hruaitu cheukhat nih zapi theih in an chimmi pawl cu a um. February 8 ah khan KIO Vice Chairman Lt. Gen. Gun Maw nih a Facebook ah “tuanvo ngeitu [Kawl ralkap] nih [duhlo langhtermi pawl] kahnak an pek awk a si lo (an pek hrimhrim awk a si lo)” tiah a tial. Cun, February 10 ah “duhlo langhtermi mizapi cu KIO nih kan venhim hna lai, an ti” tiah VOA Burmese nih a tial. Hi an tialmi hi KIO le Kawl ralkap karlak ah lamkaltu (broker) a tuanpiak tawntu PCG timi phu nih an chimmi a si i rinhcanh tlak a si.

PPST Cathanh kherhhlainak

NCA minthu ciami phu hna dirhmun hi a har ngaimi a si. NCA nih a hreen hna pin ah ralkap nih uknak an lak thaizing i, an meeting cathanh zoh tik ah lam tampi kawl an i tim lo ti a lang ngai. A cathanh pa (3), (4) (5) nak hrim khi cu mah le mah i hreen a lo pah. Zapi theih an cathanh kong ah a biapi deuhmi ka hun char lai.

Ram pumpi huap in kahngolnak tuahding/NCA ningin kal ding (Cathanh 4-5)

Mah nih hriamtlai phu (EAO tiah ka hman pah lai) cung ah a lungtling lomi pawl ruahnak he cun a van i ralkah ngai. Cheukhat [mizapi chung in] duhnak ahcun atu lio ramchung mizapi biatakte an cawlcangh lio ahhin ramri in hriamtlai pawl nih rak kap ve hna selaw. Cu pressure nih cun Kawl ralkap thazaang a zorter lai i, a tlamtling kho deuh lai tiah a ruatmi tampi an um. Hi lio ah NCA-S EAO nih cun ram pumpi huap tu in kahngolnak an hal.

Kawl ralkap nih “NCA ning in remdaihnak kan kalpi lai” tiah February 1 ah an thanh. Tikah, Phu (10) cathanh pathumnak he van tahchunh ahcun NCA ning in kal an duh veve rih ko tinak a si – EAO he Kawl ralkap he. Amahbelte, NCA kan i tlaih rih ko lai an ti tikah EAO lei nih ralkap cozah he ramkhel biaruahnak kan pehzulh lai, pehzulh lai lo, timi tu cu an langhter chih lo. Phu khat cio nih cathanh an chuahmi zong ah an langhter lo. Hi nih fiang tein a langther mi cu Kawl ralkap le NCA-S EAO nih NCA a rawh ding cu an duh veve lo - cu hlan zong ah an duh bal lo.

Amahbelte, a karlak ah NCA-S EAO chung lila ah i thencheunak a um lai lo tiah chim awk a tha lo. RCSS nih cun, cathanh si loin, a leng bia ah ralkap cozah he cun ramkhel biaruahnak kan kalpi lai lo, an ti tiah bia a chuak. Cun RCSS president zong nih Thai media pawl sin ah ralkap uknak a dohmi mizapi nih bawmh an duh ahcun kan sin ah a kan hal khawh tiah a chim. Phu dang belte nih cun atu tiang an chimmi a um rih lo.

Pakhat belte, NCA-S EAO chung in phu pakhatkhat nih ralkap cozah he bia kan i ruah lai lo asiloah NCA in kan chuak tiah dengteo in ti hmanh hna selaw NCA a rawk ti khawh a si lo. Ziah ti ahcun NCA hi ram pumpi huap in hriamtlai phu dihlak caah hnatlaknak pakhat sermi a si. Cucaah phu khat duh lo ruang men ahcun a rawk lai lo. Minthut zong ah zapi tein voi khat ah thut dih ding ti a um hlei lo kha mu.

Thate in ceihmai biaruahtinak in buainak dihter ding (Cathanh pathumnak)

Mah nihhin khuaruah awk ngai a kan pek. Aho le ho dah ai ruah lai? NLD le ralkap maw direct in bia i ruah hna seh ti an duh? Lamkaltu a um lai maw? Asiloah ceihmai biaruahtinak an timi hi NCA ning in ralkap he ramkhel biaruahnak kan kal ko lai an ti duhnak dah?

NCA hrawh hi an tih tuk ko maw? Ramkhel vawlei ahcun a suimilam tem in thil sining ai thleng kho ko. Ralkap zong chunzan in an lung ai thleng kho ko. Phunghram hmanh cu pei an hrawh tawn ko cu. Ralkap nih kan hrawh seh an ti ahcun NCA hrawh hi a fawi te mi a si – nain atu tiang ahcun an i uar ngaimi kahngol hnatlaknak a si ko rih. EAO lei pawl ca belte ahhin atu lio ram mizapi an aukhuan len le an buai lio ah mizapi lei ah fak deuh in va dirpi taktak ding ah a hreen ngaingai ko hna.

Ceihhmai biaruahtinak timi hi ramkhel party cheukhat lei zong in bia a chuak. February 11 ah Myanmar Times nih an tial ning ah People Party chairman Ko Ko Gyi hruaimi ramkhel lei in third party cheukhat nih biaruahnak (negotiation) a um khawh nakding ah an i zuam cuahmah ti si. Naite ah a rian ai dinmi SNLD haotu hlun Pu Khun Htun Oo zong kha cu phu ahcun ai tel tiah an tial chih. Hi nih hin thil tha ngai a chuahpi khawhmi a si.

Hihi [negotiation approach], atu lio ahcun a herh ngaimi ah a cang. Ziah tiah cun ralkap nih an i sehchihmi uknak hi CDM movement nih a tei i, nem deuh in a thlah khawh nakding ahcun hmaitonh in ralkap va lemsoi khawh zong hi a biapi ngai ve.

Amahbelte, lamkaltu (mediator) an i smart lo ahcun paam chin ton a fawite. NCA-S EAO nih negotiation aapproach hi an cohlan ve taktak ko a si ahcun mediator phun in i tel lawlaw hna sehlaw hmual a ngei ngai kho. Ziah tiah cun Ko Ko Gyi te bantuk ramkhel party caah cun deal ah i tlaih dingmi an ngei lo. EAO ca tu ahcun ramkhel biaruahnak pehzulh le zulh lo te hna hi deal ah hman khawhmi a si. Peace Process ah caan sau nawn an kalti cang fawn tik ah negotiation lei ah an i foih deuh kho. Hihi practical zong a ciah pah ko tiah keimah pumpak in ka ruah.

Ziah tiahcun a luanciami kum 5 peace process ah NLD cozah hi ralkap le EAO karlak ah mediator role phun in an rak um ve ko. Tikah, atu dirhmun i NLD le ralkap karlak ah lamkaltu phun in va um khi thil thalo in ka hmu lo.

Amahbelte, negotiation approach hi a that lo nak leikap zong ruah ding a um ve. Hi kong ah zeidah a chuahpi khawh i, hman lo zong ah a thatnak a um ve kho ko timi option dang in a tang lei ah ka hun tial te lai.

NCA Minthu lomi kong (NCA non-signatory EAO)

NCA minthu lomi pawl kong hi a thumi tluk tein a biapi ve. Cucaah atu lio dirhmun ah a biapi deuh tiah ka ruahmi KIO le AA kong tlawmpal ka hun kherhhlai lai.

Kachin Independent Organization (KIO)

KIO an daihnak kong hi Kawlram ramkhel lei cabia a tial tawntu Joe Kumbun (11 Feb 2021) nih The Diplomat ah a hmuhning pathum in a langhter. Pakhatnak cu practical ciah deuh lomi ah ka ruah caah ka langhter ti lai lo. Pahnihnak, zei cozah hmanh kai hna seh; ral tuknak kong le remdaihnak kong ah nawl a ngeitu le tawhtlaitu taktak cu ralkap an si ko tihi KIO an dirhmun a si. Tahchunhnak ah kum 2017 lio i ralkap nih an phomh lio hna ahkhan NLD cozah cu dai dep an um ko. Doh zong ah ralkap, rem zong ah ralkap thiam an si ko tiah an hmuh.

Pathumnak, anmah KIO hrimhrim nih hin President Thein Sein lio nakin NLD cozah chan ah remdaihnak lei a kalning a khul nuar deuh in an hmuh. A ruang bik cu NLD cozah remdaihnak an kalpi ning le remdaihnak tungtlang (peace architecture) an i sermi ah ralkap an telh duh hna lo. Tahchunhnak, atu NRPC khi a hlan lio UPCC, UPWC le MPC te hna bantuk siloin anmah lawngte nih an hruai tik ah ralkap he i hmuh thiam lonak an karlak ah a um lengmang. Biachahnak biapi deuh le ralkap kut ah a um fawn. Cucaah KIO nih cozah thar kai le kai lo khi zei ah an rel lem lo. Mah ruang ah atutan kong zong ahhin ai thlak duh tuk lonak a si. Joe Kumbun (2021) hmuhning.

Joe hmuhning hi a diknak cheukhat cu a um ve bantuk in el khawhmi zong a si. NLD cozah chan ah Union Accord part-3 tiang an kalpi khawh. Hi hnatlaknak a chuakmi pawl si seh hnatlak khawh lomi vialte hi a tam-u cu ralkap lungtlinnak le lungtlin lonak ah ai hngatmi an si. Amah belte, NLD peace architecture ah ralkap hi tam deuh in telh hna sehlaw mizapi nih thimmi NLD caah an duhmi policy pawl impose tuah nakding a um hnga lo. Mizapi nih madate pekmi phu nih cu bantuk nawlngeihnak a ngeih lo ahcun a chuak dingmi policy cu mizapi caah a thahnem taktakmi an si lai maw timi khi ruah awk a si hnga. Hi kong hi fiang deuh in cabia dang in ka hun thai than te lai.

Arakan Army (AA)

AA kong hi phun dang ngai cu a hong si ve. 2018 hnu in ralkap he fak bik in ai kapmi hi anmah lawng an si. Ralhrang cazin zong ah cozah nih a chiahmi an si. Kawl ralkap an zernak cu, 2020 kum dongh lei hrawng ah khan biatak tein AA hi biaruahnak a tuah hna. i kah zong an rak ngol cia cang – minthutnak um loin.

Arakan National Party (ANP) le AA karlak pehtlaihnak zong nih hin lai a rel ngai lai. ANP nih SAC thut thutdan an cohlan lio ah khan Dr. Aye Maung chuah ding le ralhrang cazin AA hnawh ding deal an tuah timi thawngpang a lengmi kong kha “SAC dohnak diary (Day7)” ah ka tial cang. Atu Dr. Aye Maung cu ralkap nih thong chung in an chuah taktak cang. Ralhrang cazin in AA hnawh an si than lebang ahcun Arakan pawl nih politics an i celh ning hi ai phundang ngai tinak a si ko lai. Atu lio Arakan ramkulh ah SAC duhlo langhernak a thawn tuk lomi zong khi hi ruang ah a si kho. Nain Arakan community in CSO cheukhat nih cun ANP nih SAC lutlai sinak an cohlanmi cu an ing a puang ngai.

Khat lei belte ah, Arakan nih an i ralrin dingmi cu Rohingya kong hi a si. Min Aung Hlaing nih February 8 zan bia a chimmi ah Bangladesh i Rohingya ralzam pawl kan lak than hna lai ti a si. Kawlram kong ah expert tiah ruahmi Bertin Litner [9 Feb 2021] nih ralkap nih Rohingya laknak kong hi lente in celh ai tim tiah Asia Times ah a tial. Hiti ning a si tak ko ahcun Arakan pawl hi an duhmi hei tuah piak i, khat lei ah Rohingya he an karlak ah ralthar ser hi ralkap nih ai timhmi a si kho. Ruahdamh.

Kawl ralkap a rawk lai maw?

Kawlram ah institution a um chun asiloah a thawng bik cu Kawl ralkap hi a si. Kawlram chanthar tuanbia cu Kawl ralkap kut ah a um peng rih ko. Atu uknak an lak than. Mizapi nih duhlo langhter in ralkap uknak thlak than kan i tim. A tlamtling lai maw? Tlamtling selaw teh zei tiang dah a tlamtling lai? Ralkap institution pi taktak hi a rawk kho lai maw?

CDM Movement hi atu tan dothlennak ahcun ruahchannak a um bik tiah zapi nih ruah cio a si. A si ahcun CDM nih zei tiang dah ai timh ti kha i fian a hau hnga. Ralkap cozah nih a tlaihmi cozah mechanism vialte hi riantuan kho loin in umter kha CDM nih ai timhmi cu a si. Rian a tuan khawh ti lo ahcun ralkap nih zeidah an tuah lai? Zei tiang dah a cang kho? Hihi cu anmah ralkap lila zong nih an thei rih lai ka zum lo.

Hei ruahdamh khawhmi cu CDM nih ralkap institution pi va hrawh nakin cozah nawlngeihnak an thlah than khi ai timhmi asi ko caah ralkap thazaang derter ding ahcun a har lai. Chim duhmi cu uknak cu an thlah lai, nain a hlan bantuk in ralkap institution cu an tthawng rih thiam ko lai.

Nain, thil a si kho ngaimi pakhat; CDM a thawn thluahmah ahcun ralkap chung ah ingpuannak, nawlngeihnak thlah a duhmi le duh lomi tbk in i thencheunak khi a chuak kho ngaimi a si. Cu bantuk tiang kan i ruahchan ahcun tuan deuh ka langhter mi EAO leikap in negotiation approach kha kalpi lo ah a tha deuh hnga. Ziah tiahcun negotiation approach cu caan a la lai. Anmah ralkap le ralkap karlak ah thate in bia i ruahnak caan ngeihter an hau lai. Anmah le anmah karlak ah biaruahnak a um lengmang ahcun thencheunak (fraction) kha fawi tuk in an damh (heal) khawh lengmang lai. Ralkap an kuai kho ti lai lo. Cucaah negotiation um loin a lam kip tu in pressure pek an hau hnga. Cu bantuk approach hman ding ahcun hriamtlai pawl nih NCA hrawh zong ngamh in an cawlcangh a hau hnga.

“Kawl le kawl buainak a si” timi ruahnak

Atu lio ramkhel boruak ah tlangcung hriamtlai cheukhat an i thlak duh hramhram lomi hi “hihi cu Kawl miphun pawl buainak a si” timi ruahnak ai tel pahmi a lo. Hi zong hi tuanbia van zoh than taktak ahcun ruahphu zong a si ve. Ziah ti ahcun Kawlram conflicts ai thawkning hi democracy kong ah a si lo, ‘federal’ kong ah a si. Kan hmuitinh ‘federal’ kha hriamnam hmang in an khenkham tikah democracy kha automatic in a va rawk chih bia tu khi a si.

Hi zawn ah a poi ngai tiah ka ruahmi cu Kawl pawl hmuhning (perspective) le tlangcungmi perspective karlak ah ramri bantuk a um tawnmi a si. Kawl pawl nih cun democracy tiang lawng an ruah. Atu lio boruak lamzawh zong ah nichiar ti awk in ka chuak ve i ‘federal’ biafang asiloah ‘federal’ a aupimi ka hmuhnak cu tlangcung miphun dihlak fonh lam zawhnak lawng ah a si [Kawl ralkap dohnak diary (Day6) ah rel khawh a si].

Kan duhnak veve hi fonh (integrate) a hau. Kawl pawl zong nih democracy lawng in cun kan ram a dai kho lai lo ti hi i fiang hna seh. Tlangcungmi zong nih democracy loin ‘federal’ hi a tlamtling kho taktak lai lo timi ruahnak hi ngei ve sih. Hi ruahnak pahnih ai fonh ahcun tlangcung hmunhma ah ralsa i, kan i can cuahmah zong ah Kawlrawn hrawng ah puai phunphun rak tuah, rak i nuamhsaih len timi a um hnga lo. Kawlrawn mizapi an him lo lio ah hriamtlai nih zoh sawh ti zong a um kho hnga lo.

Biadonghnak

Hi cabia ah papek in ka kherh hlaimi cu tlangcung hriamtlai chung ah a biapi deuhmi (key group) pawl i, an dirhmun le NCA dirhmun le Kawl ralkap kong ah hmuhning a si. NCA minthu cangmi phu ahcun KNU le RCSS hi key group tiah ruahmi an si i, annih pahnih dirhmun nih hin lai a rel ngai tawn. NCA ning in kal ai tim rihmi an si tik ah atu rampi boruak ahhin a laklawhnak a tampi. Atu lio EAO dirhmun ahcun hi laklawhnak ah biakhiahnak fek deuh cu a hau ko rua.

CNF telin NCA-S EAO nih “mizapi he kan tangti lai” timi cu an thanh dih. Okay, mizapi nih cun kan tuar cuahmah cang ko ne hi teh. Thisen chuahhram ai thawk cang. Zeitin dah an tan kun asiloah zeidah an tuah ne kun? tiah mizapi ruahnak hi mawhphurh awk an tha dih lo.

Hi kong he pehtlai in hi cabia nih ai ralkapmi thil pahnih a langhter; (1) NCA ning in kan kal rih ko seh an ti ahcun Kawl ralkap le NLD karlak ah lamkaltu bantuk in an um lawlaw a hau; asilole (2) CDM nih ralkap institution tiang a hrawh khawh nakding ah hriamnam hmang in ralkap pressure an pek hna a hau. “Negotiation approach” in kal a herh tiah hei forh sawhsawh i, bawlung chuih zoh in an zoh sawh hna ahcun zei pipa a chuak lem lai lo. Mizapi nih EAO cung ah i hngatchannak tu a tla thluahmah lai.

Cun, ralkap cozah he peace processes kalpi hi ruahchannak a um taktak lai maw; kum 60 lengkai kan ton cangmi kha hnukhirh in ruahchih a hau hnga. Ralkap cu zumh an um taktak lai lo, tiah an ruah ko hna ahcun approach pahnihnak khi i tlaih a hau hnga. Cu lo ahcun CDM lawng nih cun ralkap kha uknak lawng a thlahter lai i, a institution cu a hrawk taktak kho hlei lai lo. 2010-2020 karlak dirhmun vial lawng ah va kir than khi si ko hnga.

“Institution hrawh” va ti tik ah ralkap phu um lo tiang in va hrawh khi si loin Kawlram ramkhel tiang ah nawlngeihnak an ngeih khawhmi khi chim duhmi si. Ralkap institution hrawh hmasa lo ahcun kan duhmi ‘federal’ zong hi kan ngah kho taktak lai maw ti kha biapi in biahalnak ka van tuah duhmi cu a si. ‘Federal’ kan chunmang vialte hriamnam hmang in a hrawktu le, hi cencen ai tlaihtu hi ralkap lila an si ko lo maw?

NCA minthu lo pawl hrim an biapi. Hreengtu ngaingai an ngeih lo pin ah hriamnam lei a thawng mi an tam deuh. “Kawl le kawl buainak a si” timi atu dirhmun ahcun cikhat van chiahta a hau. Atu lio dirhmun ah Kawl pawl nih federal agenda an telh duh lo hmanh ah kanmah nih impose va tuah caan a si. Cu lo ahcun, CDM hi amah tein hei tlamtling sual selaw; NLD cozah nih tlai than hna selaw; ralkap nih a ngiar colh than dingmi cu tlangmi hi kan si ko. Cu tik ahcun atu i ralkap adohtu Kawl pawl tampi hi ralkap lei ah an tang than te lai. Kan ‘federal’ ruahchannak a hla chin lengmang lai.

A donhnak ah, khatlei in mizapi lei nih khua kan i ruahcia ve a hau. NCA i bochan ti loin asiloah NCA hrawh i hriamnam in ramthlen i zalh ding taktak khi si selaw; tlangcung hmunhma in ramchung ralthawh taktak ding si selaw; mizapi nih kan tuar kho lai maw?   

Chirhchan

- “ဦးကိုကိုကြီး ဦးဆောင်၍ အာဏာသိမ်းအစိုးရနှင့် ကြားဝင်ညှိနှိုင်းရန် ပြင်ဆင်နေ”, ဟိန်းမြန်စိုး, 11 February 2021 -  https://myanmar.mmtimes.com

- “Why is the Kachin Independence Organization Keeping Silent on the Myanmar Coup?”, Joe Kumbun, 11 February 2021 - https://thediplomat.com

- “စစ်အာဏာသိမ်းမှုနှင့် ပတ်သက်ပြီး လက်နက်ကိုင် အဖွဲ့များ ရှုတ်ချခံရ”, 10 February 2021 - https://burma.irrawaddy.com

- “ဆန္ဒပြမှုလူထုကို KIO အကာအကာအကွယ်ပေးမည်”, 10 February 2021 https://burmese.voanews.com 

- “Myanmar military implausibly plays the Rohingya card”, Bertin Litner, 9 February 2021 - https://asiatimes.com

- “ဦးခေါင်းကျည်ထိမှန်ခဲ့တဲ့ မမြသွဲ့သွဲ့ခိုင်ကို အသက်ရှူစက်ဖြုတ်ဖို့ မိသားစုသဘောတူ”, 13 February 2021- https://www.rfa.org

- ABSDP Statement, February 2, 2021

- ALP Statement, February 14, 2021

- CNF Statement, February 2, 2021

- KNU Statements, February 2, 2021 and February 14, 2021

- Gen. Min Aung Hlaing speech, Februar 8, 2021

- NCA-S EAO statement, February 2, 2021

- RCSS Statement, February 1, 2021

- Lt. Gen. Gun Maw Facebook post, February 8, 2021