NLD cozah nih remdaihnak lamtluan cu a hlan cozah nih an rak kalpimi rampi huap kahdaih hnatlaknak (NCA) ning in kan kal ko lai an ti bantuk in remdaihnak kong ceihmainak tuah tik i a tlamtlin nakding ah cozah hlun nih an rak sermi phu cung ah minung thlennawnnak le a cheukhat min thlennak an tuah. Cun committee an ser tharmi tete zong an um. A tanglei ahhin a biapi deuhmi pawl kan hun langhter;
National Reconciliation and Peace Center (NRPC)
Mah hi atutan NLD cozah thar an kai hnu in remdaihnak phu an dirhmi ahcun a ngan bik a si. Aung San Suu Kyi nih a hruai hna i, chungtel minung 11 an um. Cozah phu, ralkap phu le Hlut-taw palai hna an i tel. July 11, 2016 ah khan an rak dirh i, Naypyidaw le Rangoon ah zung an ngei. Hi phu hi remdaihnak kong he pehtlai in cozah nih an dirhmi phu lak ah a ngan bik a si bantuk in remdaihnak he aa pehtlaimi paoh ah cozah lei kap in nawlngei bik le rian sang bik a tlaimi an si.
Cozah hlun chan ah Myanmar Peace Center (MPC) kha atu NRPC in kan thlen tiah cozah nih cun an ti. Asinain MPC le NRPC aa lawh lonak pakhat cu MPC cu cozah lei aiawh in an rak sermi daihnak sertu phu UPWC kha fimthiamnak lei in a bawmchantu siloah a dirkamhtu [technical support team] bantuk phun an si. Asinain atu Aung Sang Suu Kyi zong nih a tlaihmi a si caah remdaihnak kong he pehtlai in an nawlngeihnak a sang bik bantuk ah a um.
Peace Commission
Peace Commission hi NRPC tang ah a ummi a si. NRPC nih policy a sermi si seh, biachahnak a tuahmi le riantuan ding tiah a sermi vialte kha a tuanchuaktu phu an si. Peace Commission cu Dr. Tin Myo Win nih a hruai hna i Pu Thein Zaw (haotu chang), Pu Khin Zaw Oo (chungtuan) tel in chungtel minung (6) an i tel. Ruahnak cheutu minung (3) le bawmchantu chungtel minung (7) zong an i tel. Annih tu hi a hlan cozah chan ah remdaihnak riantuantu phu UPWC tiah an rak sermi phun kha a si.
Union Peace Conference - 21st Century Panglong Preparation Committee
Mah hi phu hi a ralaimi Ramkomh Daihnak Conference - Kum Zabu (21) Panglong (Union Peace Con-ference - 21 Century Panglon) tlamtling tein an tuah khawh nakhnga caah a hlankan in tawlreltu phu an si. Mah phu hi conference tikah hriamtlai phu dihlak le tel awk a simi hna phu le minung dihlak an i tel khawh nakding ah a lam kip in in tuan chuaktu an si. Dr. Tin Myo Win thiam nih a hruai hna i an dirh hmasa ning ahcun chungtel minung (16) an i tel. May 31, 2016 ah khan an dirhmi a si. Mah hi committee tang ahhin Sub-committee pahnih an ser chap.
Sub-committee (1)
NCA min a thu cangmi tlangcung hriamtlai phu (8) he komh in an dirhmi a si i, zeitin dah remdaihnak conference kan kalpi lai tiah ceihhmai nakding ah tuanvo a ngeitu an si. Hi committee cu Bogyoke Gyi Yar Pyih nih a hruai hna i chungtel minung 15 an i tel. Mah chungtel chung ahhin hriamtlai phu lei in minung (8) an i tel i, cozah lei le hluttaw lei in minung (8) an si ve. Haotu cu cozah lei nih an tlaih nain Haotu chang ah Karen National Union (KNU) in Pado Saw Kwe Htoo Win nih a tlaih i, Secretary (1) ah Chin National Front (CNF) in Dr. Lian Hmung Sakhong nih a tlaih. May 31, 2016 ah khan President Htin Kyaw nawl peknak in an dirh.
Sub-Committee-2 (or) Preparation Committee-2
Mah hi Sub-Committee-2 ti zong ah ti khawh a si i, Preparation Committee-2 ti zong in an auh. Mah hi committee i a rian cu rampi huap kahdaihnak hnatlaknak (NCA) minsen a thu rih lomi phu vialte he i ton i, zeitin dah remdaihnak kan kalpi lai, zeitin dah zapi te aa telmi remdaihnak conference kan tuah khawh lai timi kong ah ceihmainak a ngei ding an si. Dr. Tin Myo Win nih a hruai hna i, chungtel minung (9) an i tel. Hi committee ahcun hriamtlai phu an i tel lo.
Delegation for Political Negotiation (DPN)
Mah hi phu hi cu cozah nih an sermi siloin tlangcung hriamtlai phu komh UNFC nih an dirhmi a si. UNFC ahcun atu lio ah hriamtlai phu (7) an um i, mah phu (7) aiawh in dirhmi phu a si. DPN nih a rian cu NCA minsen a thu lomi phu nih hmailei zeitin dah remdaihnak kan kalpi lai timi kong ah cozah lei aiawhtu phu he tonbiaruahnak ngeih ding a si. DPN cu a cunglei kan langhtermi cozah nih an sermi Sub-Committee-2 he khin remdaihnak conference kai nakding kong ah bia aa ruahmi an si. DPN cu Kho Oo Re nih a hruai hna i, chungtel minung zeizah dah an um ti fiang in kan hngal kho rih lo.
Union Peace Dialogue Joint Committee (UPDJC)
Mah hi rampi huap kahdaihnak hnatlaknak (NCA) ah aa telmi a si bantuk in NCA minsen a thu cangmi tlangcung hriamtlai phu (8), Ralkap, Hlawttaw, Cozah le Ramkhel party hna in an dirhmi a si. Cozah, Ralkap le Hluttaw hna pathum fonh in minung (16), NCA minthu cangmi tlangcung hriamtlai phu (8) in minung (16) le ramkhel party in minung (16) tiin zat ceo cio in an zate minung (48) an si.
UPDJC cu hmailei pehzulh lengmang dingmi remdaihnak conference le ramkhel biaruahnak tuah tik ah ceihmainak tuah dingmi le ramkhel biaruahnak kong ah ceih a herhmi vialte hmunkhat ah ceihhmaitinak committee a si. Hi committee cu Aung San Suu Kyi nih a hruai hna. Pu Thein Sein cozah chan ah khan NCA ning in November 2015 ah khan anmah [Thein Sein cozah phu] minung pawl tel in an rak dirhmi a si i, NLD cozah thar an kai hnu in 2016 May 28 ni ah khan an tharchuah thanmi a si.
Joint Monitoring Committee (JMC)
JMC zong hi rampi huap kahdaihnak hnatlaknak (NCA) ning in sermi phu a si ve. Cozah ralkap le tlangcung hriamtlai phu karlak ah i kap ti lo ding in hnatlaknak minsen an thut hnu ah a cang kho-mi buaibainak kong ah ngiathlaitu ding committee an dirhmi a si. Hi committee balte hi Ramkomh huap le Ramkulh huap tiin dot hnih in a um. Ramkomh huap (Union level) ahcun Bogyoke Gyi Yar Pyih nih a hruai hna i, ramkulh huap (State level) belte ahcun hriamtlai phu an umnak mah le ramkulh cio in i hruai a si. 2015 November 8 ah khan an rak dirhmi a si.
#Chin_Digest Vol.2/No.4 August 2016