2016 March 10 ni cu Kawlram mizapi nih aho dah President a si lai tiah kan lung a tur bik ni a si. Kha ni kha Amyotha Hluttaw le Pyithu Hluttaw a dang tein tonpumhnak an ngei i, anmah le Hluttaw cio ah President aa cuh dingmi min cazin an chuahpi ni a si. Hluttaw pahnih tonpumhnak an tuah cuahmah liomi cu cozah TV nih an langhter pin ah internet zong in vawlei cungpi zoh khawh ding in an langhter chih.
Chinmi nih aho dah Kawlram president a si lai ti hi theih kan rak duh ngai ko nain President min cazin an thanh hlan cu mah tluk lawmmam in kan thinlung a cawlcang in zaraan ko nih kan ceih zuam tuk lem lo. Kha ni [March 10] ah Amyotha Hluttaw ah NLD nih Vice President ding ah Pu Henry Van Thio min an hun thanh cangka khan cun Chinmi lawng hmanh siloin Kawlram mizapi le Kawlram kong a rak cuantu vialte kan ar dih ko. Chinmi hna kan lau ning le kan i nuamh hna ning hrimhrim kha cu ‘ruah lopi in kan inn hmai ah sui tlangpi van in hong tla selaw’ cu ko cu a lo. Kan mawh hrim lo.
A ruang cu Vice President ding ah zumhmi cazin chung ahhin Pu Henry Van Thio min cu chim lo, Chinmi chung hrimhrim in an i tel lai tihi aho hmanh nih an rak ruahcia lomi a si. Mi cheukhat chimning lebang ahcun amah Pu Henry Van Thio lila hmanh nih hin Vice President ah an thim dingmi hi aa theihcia lo le si lai an ti phah. A ruang cu NLD upa pawl cheukhat hi an theihmi hnihkhat ahcun an bia an i sum lo ngai i, leng an chuahter sual lengmang. Pu Henry Van Thio kong ah aho hmanh nih biachokvai sawhsawh zong an chuahter khawh lomi hi thil mak ngai pakhat cu a si ve.
March 10 ni ah President aa cuh dingmi min cazin an chuahpi nain Kawlram phunghram tahfung ning in a tlin le tlin lo zohfelnak ding ah caan zeimawzat hngah a si. Mah cu chung vialte ahcun biachokvai phunphun a chuak; Pu Van Thio ramdang ah kum saupi a va ummi a si caah Vice President a si kho lai lo, an ti lio ah, Kawl Buddhist cheukhat pawl nih Khrifami nih Vice President rian tiangtiang an tlaih a hau lo tiah biatak thlak ngai in an doh len. Ralkap zong nih Hluttaw chun in an doh thiam. Asinain Phunghram tahfung ning in a tlin lonak an hmuh lem lo caah NLD nih an timhlamhning tein Vice President dirhmun cu a hong phan taktak ko cang.
Pu Henry Van Thio cu Kawlram tuanbia ah a voi khatnak bik Chinmi chung in Vice President rian pekmi a si i, Chinmi tuanbia ah rian sang bik a tlaitu zong a si. Kawlram ah Khrifami chung in a hmasa bik Vice President tuanbia thar zong a tial chih fawn. Pu Henry Van Thio Vice president ah thim a simi kong ah Buddhist luarparkai zeimawzat nih an duh lo nain anmah Buddhist chung lila in mi tam-u le tlangcungmi zapi nih an cohlan i an conglawmhmi a si. Mah hi a ruang bik cu mizapi nih an dirkamhmi le an thimmi Daw Suu nih aa tlak tiah a thimmi a si caah a si.
Pu Henry Van Thio hi kan hnu November 2015 thimnak lai te lawng ah khan NLD ah a lutmi a si. Thimnak ah Thantlang peng, Amyotha Hluttaw in MP aa cuh i, amah a zuam cawhtu J.P Biak Tin Sang (CNDP), Pu Zo Peng (USDP) le Pu Tluang Hnin (pumpak) tiin minung pathum bak a tei hna. Thimnak a dih hnu in President thimnak caan karlak ah khan Daw Suu nih MP pawl a ton tawn hna. Chin MP pawl cheukhat zong anmah lawng a ton bal hna i, mah a tonmi chung ahcun Pu Henry Van Thio zong hi aa tel ve. NLD party chung in President le Vice President a thimnak kong he pehtlai in Daw Suu nih fianternak a tuah lio ah, “kan party ah dawtnak a ngeimi, zumh awk tlak in a ummi kha kan thimmi hna a si” tiah a rak chim.
Pu Henry Van Thio cu a nupi Pi Sui Hluan he fapa pahnih le fanu pahnih an ngeih hna. Pi Sui Hluan a pa cu Rev. Dr. J. Ral Buai a si i, atu Kawlram UPC hruaitu lu bik a si. An nu [Pi Sui Hluan] cu New Zealand ah Ph.D a kai liomi a si i, an fale dang zong New Zealand ah sianginn an kai. Vice President a hun si hnu in a nupi le a fale cu an hong tlung. Kawlram ah an fale sianginn an kai ding le kai lo ding atu tiang fiang in theih a si rih lo.
Pu Henry Van Thio hi Tikir khua chuak a si i, a nule pa Pu Lian Tlung (Khenglawt phun) le Pi Ngun Par nih hrinmi fapa bik a si. An khua Tikir ah tang 7 tiang sianginn a kai, Tang 8 in tang (10) tiang Hakha ah a kai. Tang (10) a awn hnu in ralkap bolawng training a kai. Ralkap a tuan chung ah a sang bik Major rank tiang a rak kai. Atu tiang zong Major Henry Van Thio tiah mi tampi nih an auh. Atu hi kum 57 a si i, a ralaimi August 9 ah khin kum 58 a tling lai.