Atu lio cozah nawl ngeitu Pu Thein Sein le a minung pawl cu tu thla dih [ni 4 te lawng aa duh] cun an nawlngeihnak a dih ruangmang cang lai. Mahti an rian a dih ding a si cang caah an umnak inn pawl kha cozah budget in an sakmi quarter a si caah an chuaktak ngawt dih cang hna. President Thein Sein lebang nih cun a umnak innpi cu tuanpi khan a rak chuahtak cang.
Mahti an chuahpah cun an inn chung i, a ummi thilri, thutdan, cabuai, bizu tbk. [furniture] vialte kha an i chuahpi dih. Air-Con pakhat te cio lawng kha minister thar pawl caah an nganhta hna. Cu kong cu atu lio ah ceih bikmi le minister thing pawl an hun soisel ngaimi hna ah aa tel.
Minister thing pawl le a thar pawl kha in-charge i peknak kong ah tonbiaruahnak an ngei. Mah an i ton dih cun minister thar pawl nih khan an umnak ding inn pawl cu a va zoh tik ah zeihmanh taang loin minister thing pawl nih an rak chuahpi dih kha an hmuh i, cheukhat nih cun an zai hnawh hna.
NLD in Pu Win Htein nih aa thawh i, “kan minister hlun pawl nih an umnak inn chung ah a ummi thutdan cabuai vialte pakhat hmanh taang loin an i tlunpi dih. A innpi lawng an chiah. Socialist chan ahcun mahti hin a si lo nain” tiah nengsei nawn in a chim. Cozah budget in minister a tuanmi pohpoh umnak a si i, a chung thilri thutdan cabuai zong cu an chiahta ding a si, ti phun khi a chim duhnak a si.
Hi kong ahhin Pu Ye Htut aa tuar lo tuk i, leklak a Facebook in fianternak a tuah. “Pu Win Htein nih Socialist chan ahcun mahti hin a si lo, a ti. Si la hme teh, anih tham cu Socialist chan kong lawng pei a theih cu. Kanmah tangka in kan i cawkmi cu kan i lak than ko lai hme teh. Kanmah tangka cio in kan i cawkmi a si. Cozah budget in kan i cawkmi balte khi si sehlaw cu kan chiahta ko hna lai” a ti.
Pu Ye Htut, minister of Information Ministry, nih a chim chapmi cu, “Khi inn kan luh lio ah khan a inn lawng bak a um. A ummi chun ah Air-con pakhat le mei le tidawpnak lawng an um. Ministry of Construction nih thilri zalhnak ah Ks. 3,000,000 cio a kan pek. Mah in cun kanmah tein a dang cu kan i zalhmi a si. Atu minister thar pawl zong cu thilri zalhnak ah Ks. 3,000,000 [sing 30] cio an pek than ko hna lai hen cu” a ti.
Nizan ah khan Daw Suu nih minister a thimmi minung 14 he Naypyidaw ah a auh hna i tonnak an ngei, mah kong hi an ceih. Daw Suu nih a timi hna cu, “thutden cabuai cu nanmah tein nan i cawk dih lai. Mah nan i cawkmi kha nan rian a dih tik ah mithar a tuan dingmi minister caah nan chiahta hna lai” a ti hna__An meeting chung i, mahti a chimmi cu Thura Aung Ko nih media sin ah a chim chinmi a si.
“Ministry of Construction nih thilri zalhnak ah Ks. 3,000,000 cio an in pek dingmi hna zong nan i lak lai lo. Nanmah tangka tein zeizongte nan i zalh lai. Kum 5 chung nan tuan lai i, nan term a dih in nan i tlunpi lai lo. Mithar a hong kai dingmi caah nan chiah piak hna lai” tiah Daw Suu nih cun a ti chap rih hna. Minister thing pawl an hun soisel cuahmah lio hna ah Daw Suu nih mahti a hun chim cu NLD dawtu pawl cu an i lunghmuih ngai. Daw Suu an hlorhning hrimhrim a kai tuk. A bia te hi zeiti va al, va doh awk tha a si lo nain Minister hlun pawl caah cun sirhleih phun hna a lo i, minengthla ngai a si. Asinain Daw Suu a chim bantuk in an term a dih tik ah an tuah taktak ko si ahcun upat awk tlak ngai an si hnga.
Ministry of Construction nih an thilri zalhnak ah tangka sing 30 cio an pekmi hna kha Minister thing pawl nih cun cozah budget le cozah nih cawkpiakmi ah an relh lo caah khiar ngai in an i lak than dihmi a si. Khat lei ruah ahcun Pu Ye Htut chim bang, mithar pawl ca zong ah sing 30 thiamthiam an pek ve ko hna caah an tinvo te a si ve ko i, an i lak than awk si ko hei ti ding te khi si. Asinain khat lei vun ruah than tik ah, kum 5 chung remruam minister dirhmun in an tinvo vialte le budget chung in an i hlepmi tangka vialte tuak ah atu an thutden cabuai hna cu zatuak 1% hmanh khi a va si lem lai lo. Cucaah an luan deuh ko, ti khawh thiam a si.
Minister pohpoh nih an riantuan chung ah tinvo an ngeihmi hna cu; humhimnak caah mi vengtu, dam lo tik ah sii-ai tlopbulnak, Ti le mei, ram chung phone chawnhnak, pumpak Secretary pakhat, sinum pahnih, inn pawngkam dum zohkhenhtu pahnih, Mawtaw caah petrol siloah diesel, le lahkhah sing 30 tibantuk hna hi an chungkhar he tinvo an ngeihmi a si. Mah pin ahhin an tlaihmi ministry caah budget a tlami vialte kha anmah le an thiamning cio in an hei i hlep rih lai__An duh ahcun.
Chirhchanh: 7Days, the Standard Times Dailay, Pu Ye Htut Facebook