Atu lio thawngpang chimceih bikmi lak ah Pu Myint Swe kong hi aa tel ve. Anih an ceihcum ning balte hi lawmhpinak le thangthatnak va chim si lem lo. A chiatnak kong chim deuh in a si. Nizan nai March 10 ah ralkap nih President aa cuh ding ah Pu Myint Swe kan chuahpi tiah an thanh cangka in Pu Myint Swe kong a rak theitu vialte ti awk tluk in an zai. Cuti a zaimi cu a bik in Yangon hrawnghrang ummi deuh khi an si fawn.
A ruang cu anih hi atu lio Yangon ramthen Chief Minister a tuan liomi a si leng ah mah hlanpi khan Yangon ramthen ah ralkap bawi a rak tuan cang. Cu hlan caan vialte chung i a thil tuahmi le a riantuannak hi mi tampi a rak simh pah ko rua hna.
Kawl media tampi nih president pathum kong ah mi tampi ruahnak an hal hna. Mi tam bik nih Pu Htin Kyaw hi an uar i president ah an duhnak kong an chim. Pahnihnak ah Pu Henry Van Thio hi tlangcungmi pawl nih cun za ah za tluk in an dirpi ve, Chinmi nih cun chim hau lo. Cu lio ahcun Pu Myint Swe kong a dirkamhtu le thatnak a chimmi cu an um lo tluk a si. Amah kuttang ah rian a rak tuan balmi pakhat balte nih tei a maknak le a ralthatnak kong a chim.
Pu Myint Swe cu ralkap hlun a si kan ti cang bantuk in, a reng sang bik a rak tuanmi hi Dutiya Bochokyi a si. Kum 2010 Kawlram thimnak an tuah lai te ah khan ralkap rian in aa din i thimnak ah a lut. Teinak cu a rak hmuh ve i, President Thein Sein nih Yangon Ramthen ah Chief Minister rian a pek.
Kum 2012 ah khan Vice President-2 a tuan liomi Thiha Thura Tin Aung Myint nih a rian a rak dinhtak. Mah hmunhma caah cun Pu Myint Swe hi an rak thim. Asinain kha lio ah khan a fanu pasal khi Australia rammi sinak a ngeimi a si. Mah ruang ah Pu Myint Swe cu 2008 Phunghrampi Chapter 3, Section 59 (f) ning in a tlin lo caah Vice President rian cu a sung diam than.
Mah lio ah hin NLD le dodaltu cheukhat cu an lung a rak awi kho tuk, anmahte in kawl (goal) an i sut an rak ti hna. A sullam cu President sinak tahfung kha mi caah nekneih in an rak sermi fiang tuk in a lang, nain a dongh marawt ahcun anmah lila zong a kham hna tinak khi a si.
Australia rammi sinak a ngeitu a fanu pasal zong cu Australia cun an kirter i, Kawlrammi sinak an lakter than. Cucaah tukum ah President i cuh ding in an van thim khawh thannak hi a si.
Ralkap bawi a si lio ah khan tat-mah (11)nak a tlaitu a si i, Yangon ramthen humhimnak caah tuanvo a ngeitu bik a rak si. Kum 2007 lio i Phungki le siangngakchia duhlo langhternak (Saffron Revolution) in lam an zawh lio ah ralkap hmang in tukdennak le hriamnam tiang an hmannak zong ah khan Pu Myint Swe hi lutlai a rak si.
Mah kong ahhin Pu Myint Swe nih, “kha lio [September 2007] thil kha cunglei nih rianpekmi ning tein kan rak tuahmi a si caah na palh an ka ti i, dantat ding ka si ahcun tuar ding in ready ka si ko” tiah a rak chim bal.
Cu lawng silo, mipi cozah chan a hung phan i, Kum 2014 ah siangngakchia nih Kawlram fimcawnnak phung an doh lio ah khan palek nih cei cikcek te in an rak phomh hna. Cheukhat cu atu tiang thong ah an um rih ko. Mah kong zong ah hin Pu Myint Swe hi Yangon ramthen CM a si caah amah theu hi sual an phawt chih ve.
Rangoon khualipi chung i thancho riantuannak simanking (project) vialte zong ahhin langhhngannak (transparency) a um lo, Hluttaw tonpumhnak ah cozah riantuanmi biahalnak pawl zong thathi in lehnak a um lo tiah dodaltu party lei nih an zai hnawh lengmang tawn.
Naite ah a rian a dihmi Yangon Ramthen Hluttaw palai lak ah an uar bikmi Dr. Ngio Ngio Tin nih, “Cozah tu kha Hluttaw thithruainak in a kal ding a simi kha Yangon ramthen cozah nih cun Hluttaw kha an duh poh in an tuahto khawh. Pu Myint Swe cu amah duhnak le ruahning lawng in khuakhan a duhmi a si” a ti.
Ralkap cozah chan lio ah khan US cozah nih an ram luh khawhnak ah Kawlram ralbawi cheukhat an rak phih hna i, Pu Myint Swe zong hi aa tel ve. Naite ah khan US foreign affairs minister nih “Pu Myint Swe hi US ram luh khawhnak in kan phih peng rihmi a si” tiah a ti.
ASEAN ram 10 lak ah Kawlram hi a ngan bik pahnihnak a sinain a thangcho lo bik le a buai tuk ruang ah rem lo bikmi dirhmun tiang a rak phan. Kum 2005 ah khan Kawlram nih ASEAN Chairman an rak tlaih ding caan a phan nain an rak tlaihter duh lo. Mahti international community tiang Kawlram min a rak chiat tuk lio hrawng ah khan Pu Than Shwe te phu ah Pu Myint Swe hi a min a rak lang ngai ve, ti a si.
Ralkap cozah chan ah a rak tthawng tukmi Ngiathlaitu Phu (Sung-tthoh) Pu Khin Ngunt le a minung vialte an rak thlaknak ah khan Pu Myint Swe hi biapi bik in khuakhangtu ah a rak i tel ve fawn tiah 7Day nih an tial.
Atu ahcun mizapi nih kan duh zong duh lo zong ah Vice President-1 a si ko cang. President aa cuh dingmi min cazin a chuah hlan te rengreng khan Pu Myint Swe hi zumhmi ah a rak i tel cang. Mah lio hmanh ahcun a si tak sual lai ti an rak phang kho tuk cang.
Atu a hun si taktak cang i, an hun zai hnawh tualmal ko nain san a tlai lo. NLD nih Pu Van Thio kha Vice President-1 si ding in an i zuam fawn lo. Tik ah, an karlak [Pu Hint Kyaw le Pu Henry Van Thio] ah Pu Myint Swe a um bantuk khi a si lai. An riantuannak ah tampi harsatnak tampi a chuahpi te khawh men tiah atu lio Kawlram ramkhel kong a cuantu tampi nih an zumh.
Chirhchanh;
7Day Daily, Wikipedia, Irrawaddy, sn.ethz.ch