Thangtlang Khrihfa Bu kip fonh (TCF) nih kan hnu November 17, 2015 ni an meeting biachahnak ning in “zuu laisen kan la ti lai lo” tiah an thanh. Zuu raldohnak caah Thantlang khuapi i zuu zuarnak laisen vialte cu TCF nih kum khat ah tangka sing 20 leng dih in kum fatin an rak lak tawnmi kha kum 15 hnu ah an hun thlah than hi a si.
A luanciami 1999 kum Laimi Khrifa kum 100 tlinnak Centenary puai ah biathanh an chuahmi chung ah zuu raldohnak hi aa tel. Mah ningte cun 2000 kum thawk in zuu raldoh hram an rak thawk hi a si. Harsatnak tampi lak ah kum 15 chung remruam an kal cang hnu ah, mah bantuk in kan maak cang lai tiah an hun thanh tik ah biahalnak a um khomi cu; ‘zeiruang ah dah an maak?, Laisen an thlah ruang ah Thantlang khuapi caah that lei maw a panh lai, chiat lei dah?’ timi hi an si hnga.
Hi kong he pehtlai in atu lio TCF chairman Pastor Ca Cung Bik nih, “that le that lo ti lam ahcun laisen kan lak i kan khapmi kha tha deuh ko hnga hme teh. Asinain zuu khapnak kong ahhin a hlan lio he tahchunh ahcun mizapi an thinlung a zor tuk cang. Mizapi lei nih dirkamhnak a um lo tik ahcun riantuantu ca zong ah thazaang chuah a har tuk cang. Mah ca ahhin laisen kan la ti lai lo kan tinak a si ko” tiah a chim.
Mah hlan ah TCF chairman a rak tuan balmi nih zuu laisen thlah ding an rak duh diam cangnak kong a chim ve. “Kanmah hna TCF hruaitu kan tuan hlanpi khan atu bantuk zuu laisen thlah i phun dang deuh in riantuan hi kan rak duh cangmi a si. Asinain upa dangdang nih thlah si rih duh hlah seh an ti caah kan rak thlah lonak a si” tiah 2014 kum ah TCF chairman a rak tuanmi Pastor That Cung Nung nih a chim.
Nawl ngeitu palek lei nih tanpinak a tlawm tukmi nih an riantuannak ah harsatnak tampi a um an ti. Laisen loin zuu zuarmi cu phungning in tazacuai le sualphawt ding an si nain kum 15 chung ahhin zuu zuar ruang ah tazacuaimi an um bellonak kong zong an chim. “Zuu an zuar timi thawngpang kan hun theih i, va chek ding in kan kal lai kan ti tik ah palek tel loin kal a ngah lo. Palek kan hun hrihhawh hna tik ah an i timhtuah a rau tuk tawn. A hmun kan va phak ahcun an rak thuh manh lengmang caah a zuartu taktak zong hi kan tlai kho bel hna lo i” tiah Pastor That Cung Nung nih cun a chim.
TCF upa hna nih an chimmi zoh tik ah an riantuannak ah harsatnak tampi an rak ngei ti a lang. Cun atu lio Thanglang mizapi aw-aan ngaih tikah zuu raldoh riantuannak hi an lung a rak dong ngai cio cang ti a lang fawn. Kum 15 chung an khapmi ah zeimawzat cu aa ning nain zuurit buaibai, zuu din ruang ah siizung phan le a nunnak a liammi an tlawm lo.
Zuu nih taksa caah a chuahpimi hi phun hnih in a um. Pakhatnak cu zuudin ruang ah an phing, an thau thluahmah i thikai ruang le thluak thahri cah ruang ah ruah lo piin thih a um. Zuu tha deuh tiah ruahmi alcohol thazaang a tlawm i, ti tam deuh aa telmi phun nih mah bantuk cu a chuahter. Pahnihnak tu cu an der thluahmah i, an taksa a tlum thluahmah, an thin tiang a caar. Cu bantuk cu alcohol tam tuk aa telmi zuu chia deuh tiah ruahmi phun nih khin a chuahter. Thantlang khua ah zuu nih a suaimi tam-u cu a pahnihnak khi an tuarmi a si i, a thicangmi hna zong hi mahning khin an thi. Mah tik ah Thantlang ahhin zuu tha lo lawngte a lut ti a fiang.
Biaknak lei phu nih laisen an lakkanh len hna nain mi cheukhat nih cun a thli in an rak zuar khawh thiamthiam. A thli in zuarmi a si tik ah hmun dang ah dengte in an cawkmi zuu chia pawl kha Thantlang ahcun fak taktak in an zuar khawh thiam i, a thli in a zuartu pawl nih zuu khapnak hi rumnak tu ah an hman tiah Thantlang khuanu khuapa cheukhat nih an chim.
Thantlang khua ah a lutmi zuu hi a tam bik cu Mandalay rum, Myanmar rum le OB hna hi an si. An pathum ningte in Kawlram chuak si dawh an si i, Kawlram zuu hmanh ah aa deng bik pawl an si. OB hna hi cu mi cheukhat chim ning ah saram caah tuahmi a si an ti. OB lang khat khi ti an cawh i, lang 4 tiang an chuah khawh. Mah hnu hmanh ahcun Whiskey zapi nak hmanh in a tak deuh rih tiah an chim. Mah zuu cu atu tiang zong Thantlang le Hakha hrawng ahcun um rih dawh a si.
Hi bantuk in Thantlang ah zuu chia a luhmi hi zuu zuar khapnak ruang ah a si tiah mino cheukhat nih an chim. “A manfakmi zuu cu a thli in a zuarmi caah aa keih ti lo. An tlaih sual siloah an thuhmi an hmuh sual hna zong ah man dengmi cu tangka an sunghmi a tlawm. A mandengmi an lak zong ah man fak pipi in an zuar khawh thiam i, zuu chia lawngte an zuarnak hi a si lai” tiah a min langhter a duh lomi Thantlang mino pakhat nih a chim.
Mahti ningte a si tak ko ahcun zuu zuartu nih thate in Laisen an ngeih ahcun zuu tha deuhmi an zuar duh cang lai tinak a si hnga. A thlithup thil a si lai lo tik ah cu hlan nak cun a man zong aa deng deuh lai. Zuu tha din le zuu din thiam ahcun ngandamnak ca hmanh ah a tha tiah sii lei thiammi nih an chim tawn. Cucaah zuu dingmi ca vun ruah piak ahcun TCF nih zuu laisen an thlah hi that lei a panh ti khawh a si.
Asinain zalong tuk lawmmam in zuar le din cio a hong si lai. Mino nuamhnak thil dangdang hi Thantlang ah a um tuk ve lem lo. Thanchonak lei vun tah tik ah internet le phone pehtlaihnak hmanh thate in an hman khawh rih lonak khuapi a si tik ah mino nuncanning hi hmun dang he tahchunh ahcun a harsa ngai rih. Mah lio ah zuu nih zalonnak a hun hmuh ahcun mino cheukhat a ding lomi dinnak le a dingmi zual chinnak hna a chuahpi sual hnga maw ti hi upa pawl zong nih an phanmi a si.
Thantlang in MP thar a chuakmi Dr. Hmuh Thang nih, “zuu hi Laimi a kan hrawktu bik a si i, hluttaw ka phak tikah zuu upadi kong hi ka chuahpi hmasa bik lai. Mah upadi ahcun a zuartu caah zulhphung, a dingtu caah zulhphung, a zuartu le a dingtu nih an palhnak um tik ah dantatning tibantuk kha thate in kan ser dih lai” tiah a ti.
A aw-aan fiangte in kan thei rih lo nain NLD in MP a tling tharmi Pi Ni Sui Lian zong nih zuu kong hi biatakte in ka chim lai a ti ve an ti. Democracy ram ahcun mi vialte hi upadi nih a kan uk dih. Upadi a thatnak ram paoh a dai i, zei paoh a tluang ti si. MP thar hna nih an i timhningte in an tuan taktak ko i, upadi lei hna in kaar an hlan taktak ko si ahcun a zuartu nih ningcang te zuarnak le a dingtu nih din ziathiamnak caah tampi bawmchantu a si te kho.
Zuurit buaibai le zuudin zatawk thiamlo timi pawl hi cu kan zatlang nun zong nih lai a rel ngaimi a si. A cunglei kan langhter cang bantuk in Thantlang cu infrastructure le mino entertainment lei ah a niam ngai rih. Mah ruang ah hin kan zatlang nun zong hnu ah aa thlai pengnak a si. Cucaah cozah lei kaar a hlaang khomi nih upadi tel in thanchonak lei in biatakte in an kalpi khawh ahcun zuu ruang ah harsatnak kan tonmi hi cu duhsah duhsah in a tlau tluahmah khomi a si
#The_Chinland_Post caah rak tialmi a si.