Chinmi nih kokek thil sunglawi kan i ngeihmi thinlung lem cuang Rih tidil cu Falam peng Rihkhuadar khuapi, India le Kawlram ramri, ah a um. Ekah 150 tluk a kau i, a thuh biknak zawn hi pe 60 tiang a thuk tiah Rihkhuadar khuami hna nih an chim.Kokek sinak in aa dilmi a si bantuk in chaklei in a hung luannak tihna le tlanglei ah a vung luannak vasum an um lo. Furpi cingling ruahsur caan ah pehtlai thluahmah le faakpi in ruah a sur tik ah tiva vialte an nawi i, an lian tawn. Cu lio ahcun Rih tidil cu nawi loin phun dangte in a nawi caan aa ngeih.
A sirlei (India ram leikam) le a lulei ah tlaang sang nawn pahnih an um i thingram hmawng ngai in an kheu. Mahcu tlaang pahnih karlak (chaklei kam) ah horkuang bantuk phun a um nain ti pakhat hmanh a luang lo. A thlanglei hi tlaang ngaingai siloin bo a um i dawh ngai in a tidil hei cuanh khawhnak hmun a si.
Mahka zawn cu Rihkhuadar khuachung a vung si i, B.E.H.S sianginn hnulei bo a si. Thinlung lem cuang in Rih Tidil hmanthlak kan rak hmuh tawnmi le atu hmantlak ah kan hei hmuhmi khi sianginn hnulei in thlakmi an si. Mahka zawn bo in hei zoh i cakeh leikam ah bo pakhat a um than i Kawl ralkap nih umhmun an khuar.
B.E.H.S sianginn hnu i Rih cuanhnak bo le India ram lei i a ummi tlaang karlak (thlanglei kam) ah horkuang phun dedeng niam nawn in a um nain tiluannak tha balte a si lo. Mahti cun chaklei, thlanglei le a sirlei veve in Rih tidil pi cu bo le tlaang nih an kulh dih.
Nuhrin thluak i hei tuaknak ahcun tlaang le bo hna nih an kulh dihmi kuar ah a ummi tidil hi ruah tam deuh a sur ahcun a liam lai siloah nawi bur in a um lai tiah ruah awk te a si. A ruang cu tlaang le bo nih an kulh lawng si loin a tidil velchum ah leikuang ekah 150 tluk hrawng a um i kum fatin lei an thuan, facang an cin. Ruah a surmi hang siseh, lei thuannak neengnawi hi tidil chung ah a lut lai i a nawi hrimhrim lai tiah ruah awk tha ngai a si. Nain cu bantuk ruang ahcun Rih ti a nawi bal lo.
Rihkhuadar i cozah uknak zung riantuantu Pu Lei Uk chimning ah fur caan i zeitluk ruah a sur le ruah a tam zong ah a zate in a nawi lo. Cu bantuk ruah tam caan ahcun a kamte lawng khi a nawi. A kam tluahmah in pe 2 tluk hrawng te khin a nawi i, a fimnak le a nawinak hi aa rinmi bantuk khin hmuh khawh a si, a chunglei taktak a va nawih bal lo, a ti.
Rih tidil a nawinak kong he pehtlai in Rihkhuadar siangsangrun cachimtu Pu Hngaka nih Rih kong cauk kutken a tialmi ah, “Fur chung ah vanruah a sur i tidil chung ah a luang tawnmi kha vawlei hang he aa cawh tik ah tanglei in a puutmi kokek ti nak in a rih deuh caah a tanglei ah a vung lut. Mah ti phun hnih hi caan saupi i cawh kho lo in a um. Khuacaan a kihlum 4 Degree Celsius nak tlawm a hung phanh tik ah an umnak aa thleng (water circulation) i, a ning in a nawinak hi a si” tiah a langhter. Hi bantuk in khuacaan aa thlen i fak deuh in a hun kih cu December thla dongh lai hrawng in a si i, January thla thawkka tiang hrawng khi a nawi caan a si.
Rihkhuadar sipin bawizik Pu Chan Lian Thang zong nih hi kong ah mahti hin a hrilhfiah ve, “Ti hi a tam caah a tanglei khi a kik lai. Cikhat lopi ah khuacaan aa thleng i fak tuk in khua a hung kih tik ah a cunglei a ummi kha a tanglei ti nak in a kih deuh caah a rit i, a tanglei ah a vung tla. A tanglei in a rak lummi kha a cung ah a vung kai ve. Mahti an umnak aa thlen i a cawlcangh ruang ah hin a nawi tawn” tiah a chim.
Rih ti a nawimi muici (color) hi tiva le tidil dang a nawimi he cun aa dang ngai rih. Darsen muici bantuk dedeng khin sen nawn in a nawi, fur caan ah vawlei hang bantuk in tiva a nawi bantuk khi a si lo. Hi kong ah Pu Chan Lian nih, “ti chung ahhin Kawl nih zihmaw an timi thil kheu a um. Mahcu atu bantuk caan ahhin a par a chuak tawn. Mah cu par cu sen nawn khin a um i, mah nih hin a ti hi a senter chih i si men lai tiah ka ruah” tiah a chim. Mahti a hung kih i, a nawi caan ahcun a chung ummi nga hna nih an celh lo i, an thi tawn tiah Rihkhuadar in cozah riantuantu Pu Lei Uk nih a chim.
‘Rih’ timi min hi hlanchan ah Seipui khuami Pu Hualthana nih a mang ah a rak hmuhmi khuazing pathian min a si. ‘Riha ka si’ tiah a titu khuazing pathian nih Pu Hualthana a mang ah Rih a umnak kong hi a rak chimh i, an khua i pasal tha hna nih an rak kawl i ni sarih hnu ah an rak hmuh. Mah nak cun Pu Hualthana nih a mang i a hmuhmi min philhlonak ah ‘Rih tidil’ tiah a min an rak sak tiah Pu Hngaka kutken cauk nih a langhter.