Hakha Chin Miphun Ni Ah Tuanbia Thar A Tam (Hakha CND hmannak thawngpang tling)

TCP: Vol.3, No.91 | 2015 February 27 chuak

Chin ramkulh Hakha khualipi ah tuahmi avoi 67nak Chin Miphun Ni cu kum dang nak sunglawi taktak in lim a si cang. Hmun dang he aa lo loin ni 3 khengte tuah a si. A puaipi bik February 20 ni ah kum dang vialte nak in minung an tam i, a hmang khomi minung 20,000 lengkai an si lai tiah The Chinland Post nih a zumh.

Chin Miphun Ni tuanbia ah minung tambik, Kawlram president nih avoi khatnak bik Chin Miphun Ni a lawmhpinak, ramkomh minister minung 17 nih telpinak, hi khuallian hna nih Hakha sii-inn le electric mei hunnak tuahnak tehna le Chin ram dihlak huap in tuahmi a sinak hi tuanbia thar an si i hi puai a hmangmi nih philh khawh lo dingmi tuanbia pakhat a si.

Hi ni ah minung hi zahzah a kan pumhtertu thil hi pakhat hnu pakhat in kan hun zoh lai;

Thilri Hmuhsaknak (Piahkhan): Chinram chung thil chuak, hlan chan pipu hna rothil le Laimi nih kan sunhsakmi thuamthil phunphun hmuhsaknak cu inn-khan 15 an sak. Hi chung ah pengkulh pakhat cio nih anmah khualei ram rothil le thuam thil hmusaknak an tuahmi aa tel pin ah Chin ramkulh cozah tang ah a ummi department 6 nih anmah le riantuannak cio ah thil an chuahmi le an riantuannak hmuhsaknak tuahmi aa tel. 

Hi piahkhan hunnak cu Union Forestry Minister Pu Win Tun nih February 19 ni zing ah hunnak a tuah. A hun dih cangka in pakhat hnu pakhat a zoh hna.A lung a tling tuk hringhran. Hi hmuhsaknak a zoh thawng in Chinmi kan dirhmun le kan nunphung tampi a lungchung ah a riahter khawh. Cu lawng si lo hmun kip in a rami Chin mino tampi nih kan hmuh bal lomi pupa rothil le Chin kan thuamthil a kan hmuhter tikah piahkhan an tuahmi hi Chin Miphun Ni a thawtnamnak pakhat ah a cang. 

Lai Nunphung Paih Zuamnak: Tukum Chin Miphun Ni ah Lai paih zuamnak cu February 19 chun hnu suimilam 1:00 in an thawk. An thawk hmasami zuamnak hi chuahhnawh paihzuamnak ti a si i a zan suimilam 12:00 ah an donghter. Hakha khuathar sang in Cung Thang nih bual a co.
A nihnihnnak chun February 20 ah chuahhnawh paihzuamnak an peh than. Hi ni ah Hakha khuathar thiamthiam in Van Ram Or nih minung 23 a tei hna. A chuah hnawhtu an um ti lo caah an dihter i amah hi tukum Chin Miphun Ni ah tam bik mi a teitu a si. 

A phuphu (club) in paih zuamnak an thawk colh. Aa zuammi phu 5 an si i, Chin Hill phu nih pakhatnak an co, pahnihnak ah Naabual paih phu nih an co. Zuamcawh paih zuamnak an thawk colh than i zantim tiang peh a si. Zuamcawh paih zuamnak ah Tluang Lian Thang nih bual a co.

Lai Paih zuamnak hi a hlan kan pipu chan in kan ngeih cangmi a si i, tuchun tiang Chinmi nih kan sunhsak i kan uar ti a lang. A zohmi le thapetu hi tual an khat zungzal. Paih a zohmi pawl nih a dih lai an siang lo tuk hringhran.

Lai Nunphung Khuangcawi: Chin miphun nunphung lakah thil lianngan kan i ngeihmi Lai nunphung Khuangcawi hi kum dang bantuk in February 20 ni ah tuah a si. Tukum ah Khuangcawimi ngaknu dawh cu a luanciami 1947 kum ah Pinlong khuapi ah Chin miphun ai-awh in Union of Burma dirh ding ah pinlong hnatlaknak min a rak thutu Pu Kio Mang tunu, Pu Sui Khar fanu Leeng Thluai Hlei Sung a si. 

Leng Thluai Hlei Sung hi Hakha Khuahlun sang ah a ummi a si. Hi ngaknu an thimnak a ruang bik hi Kawlram President Thein Sein a rat lio a si caah Chin miphun nih Union of Burma ah min kan rak thutmi tuanbia hmuhsaknak le amah [Pu Kio Mang] upatnak ah thimmi a si tiah an chim. Hi khuangcawi lio ah U Thein Sein zong nih Lai innleng cung ah thu in mitthep lo ngacha in a zoh.

Khuang an cawi dih in zanlei nitlak lai tiang an lampi hnu ah a nu le a pa inn lei ah puak bu in an tinpi. An chungkhat sahlawh rualchan le an sangmi hna nih Khuangcawi lawmhnak zanriah an dumpi hna.

Lai Inn: A hlan lio kan pupa chan ah inn an rak sakning pungsan in Lai Inn cu Vomtumaung certual laifang ah an sak. A chung ah a hlan lio kan pupa nih meh kawlnak le i runvennak ah an hmanmi hriamnam, sa an rak kahmi saki le saphaw le rothil phunphun an chiah.

Hi nih hin a hlan lio kan pupa chan ah khua an rak sakning le an dirhmun a langhter ngaingai. A hmu bal lomi Chin mino le miphun dang caah a hlan lio kan dirhmun hei cuanh len khawh awk in kan mitthlam a kan cuantertu a si.

Hlasaknak In Nuamhnak: Tukum Chin Miphun Ni a sunlawi deuhnak ding ah ti in Chin ramkulh cozah nih Rangoon lei ah a ummi hlasak thiam le ringawn tum thiam an auh hna. Ringawn tum thiam phu ah Lazy Club an sawm hna nain a tlamtlin lo caah Plus-3 timi ringawn phu nih an tum. 

Hlasak thiam an auhmi hna ah Chinmi chung in Nicolas Dawt Kam Sang, Van Dawt Cin, Htun Kham, Zaam Nu le Chawsuh Khin an ra. Hi pin hlasak thiam Situ Lwin tel in eihmat sungya hlasak thiam Kawlmi pathum an i tel. Hlasak nak hi February 20 le 21 ah zan hnih peh in an sa. A zanhnih ning in hlasak thiam zoh ruah ah Vomtumaung certual khatte in thapetu an chuak. Hi puai caah Mandalay sound sytem an hman i an music aw nih mi thinlung a hliphlauter ngaingai.

Khat lei belte in mizapi vuivainak a um pah len. Hi vuivainak hi Rangoon lei in sawmmi hna nih Chin hla sa loin Kawl hla lawngte an sak caah a si. Hlasak thiam Van Dawt Cin nih a zan khatnak ah Laihla pakhat a sak i, cu lawng cu Rangoon lei hlasakthiam nih an sakmi a si. “Chin Miphun Ni kan hmang, Chin hlasak thiam minung pa 4 an um nain Chin hla an sa lo” tiah an vuivai. Hakha khua ah a ummi hlasak thiam Van Siang Mang, Cung Hlei Lian, Biak Tha Cuai nih fung khat cio le Lai rapper Paling le a hawile lawng nih Laihla an sak. 

Humhimnak (Security): Humhimnak tuanvo cu Chin Youth Organizaton (Hakha) hruainak in an tawlrel i, GTC siangngakchia le Hakha palek nih an bawmh hna. Riantuantu minung 50 pin ah zapi tam deuhnak hmun pali ah computer in zoh khawhmi CCTV camera pali an chiah. 

Tukum Chin Miphun Ni humhimnak cu kum dang nak in tuanvo ngeitu an tha a dam deuh. Hiti tlamtlinnak hi puai tuahnak hmun ah zuu zuar an khamh ruang le thapcelhnak an khamh ruang ah a si tiah humhimnak lei tuanvo ngeitu nih an chim.

Zuu rit luan ruang ah cawlcang kho loin a ummi cheu khat Security center ah an chiah hna. Sii-inn phan le mualpho lak in i sikvelh a um hraw lo. Zuu rit luan ruang ah sii lei thlop bultu nih an zohkhenhmi le thlopbulmi pahnih an um. 

President Thein Sein Cawlcanghnak: President Thein Sein cu Chin ramkulh cozah sawmnak in avoi khatnak bik Chin Miphun Ni a hmang kho. February 20 zinglei suimilam 11:30 ah Helicopter in Hakha a phan. Lai thilthuam an hrukter hnu ah Chin Miphun Ni puai tuahnak hmun ah an chuahpi.
Zei hlan bik ah President nihcun Bawitung (nat-taing) a phun. A dih in Chin ramkulh pengkip in lam phu hna nih Lai laam in an laampi dih hnu ah Lai inn ah an kaipi. Lai inn chung ah an chiahmi Lai pupa rothil zohpinak an ngei. An Lai innleng ah an thutter i Lai zupu kaa khat an tehter. Mah dih in thingthang cung ah a dir i mizapi sin ah biatawi chimnak a ngei.

Biatawi a chim dih hnu ah innleng ah cun a thu than i Pinlung conference minthutnak ah a rak i telmi Pu Kio Mang tunu khuang an cawi lio a zoh. Khuangcawi le lai laam a dih in a tho i a riahnak inn Union Guest House ah a kal.

Lai thil an hruktermi cu aa thleng i, Hakha sii-inn hunnak a tuah. Hakha sii-inn an saktharmi a zoh dih hnu ah a tin i, a riahnak inn ah Hakha khua in biaknak lei hruaitu HCMF upa he biaruahtinak an ngei. 

Zanlei ah Hakha khualu pura hmun ah a kal i phungki pawl upat peknak le laksawng peknak a ngei. A zan ah Hakha khuanu khuapa he zanriah an dumti hnu ah meiphu tuatnak le nunphung laam hmuhsaknak an ngeihpiak. 

A thaizing zingka ah Chin ramkulh hluttaw palai dihlak, Chin ramkulh pengkip aiawhtu khuanu khua pa le minister pawl sin ah biacah chimnak a ngei. February 21 zinglei 10:00 ah Naypyidaw lei ah tlun aa thawh.