Pu Thein Sein Cozah Nih Kawlram Media A Tuahto Ning

Photo: Irrawaddy

27 October 2015

Pu Thein Sein le a party nih cozah an hun tlaih bak in “hnu kir lo in thlennak lam kan zawh thai ko lai” tiah vawlei pi theih in an phuan. Thlennak phun kip an tuan. Media hi Democracy tahfung pakhat a si, ti an i fian caah Media zalonnak zong innkhar an hun colh ve. Kum 5 (a tling deng) chung ah anmah nih an i chimning tluk in media zalonnak an pe taktak maw ti hi tutan ah kan hun kherhhlai. A hmaisa ah innkhar an hunnak kan zoh lai.

Kum 1964 khan Kawlram ah nitin chuak thawngzamhca chuahnak an rak phih cang. Mah nak cun kum 2012 tiang phih thai a si i, ramkhel lei aa buahneh lomi Journal, Magazine, biaknak lei ca tbk lawng chuah a ngah. Ramkhel lei a thiang komi Journal le Magazine chuah hmanh ah cozah lei in Censor phu nih zohta hnu lawng ah chuah a si tawn. Mah kha August 2012 thawk cun zohpiak hau loin chuahnak nawl an hun onh hna.

September 2011 ah ramdang ah hram a bunhmi Media pawl zong Kawlram lei in rak hmuh khawh ding in an hun piak pin hna ah ramchung ah luhnak nawl an pek hna. December 2012 ah Kawlholh a hmang lomi zong nih mah le miphun holh cio in chuah khawh a si tiah an thanh. Mah lio ahcun nitin chuak thawngthanhca (daily newspaper) zong February 2013 thawk in register tuah khawh a si cang lai tiah an thanh chih. Register tuahnak cu an hun pek hna i, 1 April 2013 kha kum 48 hnu ah nitin chuak thawngthanhca zuar an hun onh than. 1962 kum i an rak sermi Media upadi zong kha an hrawh i, March 2014 ahkhan a thar in an hun ser than.

Media le Thawnglatu Cung ah an Tuahsernak

Thein Sein cozah nih hin Media zalonnak kan pek hna tiah vawleipi theih in an i phorhlaw ngai nain a chunglei taktak ahcun Journalist le Media covo an buarmi a tam ngai. Kum hnihchung ah Journalist 47 tazacuai an tong. Mah chung ahcun minung 14 thong an thlak hna, minung 2 tangka an liamter hna. Minung pakhat ralkap nih an thah.

Ko Pa Gyi (a min tak Aung Kyaw Naing) hi Thailand ramri DKBA le Kawl ralkap an i kah tawnnak hrawng ah amah bing (freelance) in thawnglatu a si. Kawl ralkap nih September 30, 2014 ah khan “hriamtlai lei tanpitu na si” tiah an puh i an tlaih. Ni li hnu October 4, 2014 ah khan an thah. Ralkap nih, “ Kan hren lio ah zaam aa timh ruang ah kan kahmi si” tiah an ti. Tuni tiang ah hi pa thihnak kong ah cozah nih tuanvo thathi in an la lo.

DVB thawnglatu Zaw Pe timi pa zong a luanciami 7 April 2014 ah khan kum khat thong dan an rak pek. Mah pa hi August 2012 lio ahkhan Magwe ramthen siangcachim pakhat sin ah Scholarship kong he pehtlai in thawnghal ding ah a vung kal, mahnak cun interview a tuahmi he an buai i, hramhram in luhhnawhnak le cozah riantuantu hnahnawh peknak tiin pohmah pahnih in taza an cuai i, kum khat tiang thong dan an pek hi a si. Nawlnak an tuah hnu ah thlathum tla ding in an thumh piak than.

Unity Journal in riantuantu minung panga zong atu hi thong chung ah an um cuahmah rih ko. Unity Journal nih kum 2014 ah khan Magwe ramthen i ralkap hmunhma ah hriamnam an sernak kong an tial. Mah kong ahcun “rampi biathli” nan phuan an ti hna i, thawnglatu pahnih, editor pahnih le an CEO tiin 10 July 2014 ah khan kum 10 cio thong dan an pek hna. A kum thumh deuh ding in nawlnak an tuah i, kum 7 tiang an thumh piak hna. Mah hnu cun nawlnak an tuah chap nain an thumh piak duh ti hna lo.

Bi Mon Te Nay timi journal nih nih “Aung San Suu Kyi le hriamtlai pawl an i komh i Thein Sein chawngtu ding cozah dirh an timh” timi kong an rak tial i, an cachuah thaizing July 8, 2014 ah a ngeitu pahnih le an riantuantu 4 an tlaih hna. Biaceih zung an chuah hnu ah pakhat cu an thlah than, a taangmi panga cu kum hnih cio thong dan an pek hna nain kan hnu 30 July 2015 ah khan an thlah than hna.

Tukum 2015 July thla ah khan Myanmar Herald thawngzamhca in minung 11 cu “President Thein Sein mualphohnak ca nan tial” ti ruang ah taza an cuai ve hna. Biaceihnak an tuah hnu ah minung 9 cu an luat i, an Chief Editor pa le a bawmtu cu tangka nuai khat (Ks.1,000,000) veve an liamter hna.

Myanmar Post thawngzamhca nih January 2014 ah khan ralkap MP nih Kawlram fimcawnnak kong he pehtlai in a chimmi an tial. Mah cu Pu Thein Zaw (ralkap MP) nih cun ka chimning a si lo a ti i, taza a cuai hna. Biaceihnak an ton hnu ah an editor pakhat le cu thawngpang a tialtu reporter pakhat cu thla hnih chung thong an thlak hna.

Ministry of Information (MOI) nih kum 2009 lio ah ramdang ah printing press seh an cawknak kong kha Eleven Media nih March 1, 2013 ah an tial. Mah kong ahcun an editor tel in a tialtu pawl he minung 5 hna cu MOI nih taza an cuai hna. Mah taza an i cuai liomi kong cu Eleven Media nih an thawngzamhca ah an chuah. An catialning kha MOI pawl an lungtling hoi lo i, midang minung 17 bak taza an cuai chap hna. Eleven Media thawnglatu thiamthiam Ma Khine timi nu zong December 2013 ah khan interview a tuahmi nu he an buai i, thlathum thong an rak thlak bel cang.

Tamaga Journal ah a tuanmi le Myanmar Journalist Network ah a tuanmi Ma Shwe Hmone cu tukum May thla ah khan taza an cuai. Rangoon ummi thawnglatu pawl minung 30 hrawng nih “vawlei pumpi journalist zalonnak” caah duhnak langhternak an tuahmi ah Shwe Hmone cu MJN lei in hrihhawhtu a si. Nawl peknak hmunhma nan lonh an ti i mah nu cu taza an cuai. Mah nu kong belte hi zeitin dah biaceih a si ti a fiang rih lo.

Biapehpar

Vawleipi theih in media zalonnak kan pek hna tiah i phorhlaw ngai in an phuan nain a chunglei taktak in an thil tuahmi cu a cunglei thil sining zohnak in hmuh khawh a si. Mah pin ah khin langhter awk tha lomi thil hme tete a tampi. Zeimaw caan ah Hluttaw meeting ah Media luh an khapmi, cozah le tlangcung hriamtlai phu biaruahnak hmunhma ah media kal an khapmi, cozah ngeihmi media lawng sianh i private media pawl cu khenkham tibantuk a um pah lengmang. Duhlo langhternak hmun ah thawnglatu fak ngai in tukden zong an tong bel.

A cunglei case kong ah khin pakhat lawng (Ma Khine) khi pumpak nih taza cuaimi a si. A dang paohpaoh cu cozah lei siloah cozah minung lawngte nih taza cuaimi le tuahsermi a si. Kawlram journalist pawl hi an no ve rih caah anmah palhnak zawn tete a um ve kho. Asinain media zalonnak ka pek hna a timi cozah nih aa pehtlai lomi upadi in tazacuai te hna, aa pehtlai lomi minung tiang a phuphu in tazacuai te hna khi khuaruahhar ngai cu a si.

Chin ramkulh Hluttaw meeting lila zong ah khin media luh an siang lo. Chin ramkulh Chief Minister zong khi media he ton a duh lo. A cabinet chung in media sin ah bia a chim deuhmi minister cheukhat hmanh ralrin a pek hna. Chin ramkulh cozah nih press conference siseh, press release si seh an tuah bel lo.

Eleven Media nih cun mah vialte thil khi Pu Ye Htut nih MOI a hun tlaih hnu in a si an ti. A hlan MOI minister kha Pu Aung Kyi a si i, aa dinh hnu in August 1, 2014 khan Pu Ye Htut nih a hun chawn. Reporters Without Borders timi phu nih tukum vawlei cung media a zalong bikmi ram an thanhmi ah Kawlram cu 144nak ah a dir