November 8 Hakha Khuachung Election Zohthannak

Photo: Chinland Post

 |9 November 2015|

Kum 5 chung kan rak i hngahhlangmi Kawlram pumpi hruaitu thimnak cu a dih cang. Ahodah a tei, zei party dah cozah a dirh kho lai timi zong a fiang cang. Tutan thimnak hi a lenglei in cun a tlamtling ngaimi a lo, buainak pipa zong a chuak lem lo. Asinain a chunglei taktak ah zeidah a cang, riantuantu le thimfung thlatu mizapi nih zei bantuk harsatnak dah an ngeih timi kan hun zoh than lai.

Tutan thimnak ah thimfung thlakning i palh ruang ah thimfung hlawt piakmi (pe mee) a tam. A tamlei in theih khawhmi chung ah Khuahlun No. (1) thimfung thlaknak hmun ah thimfung 70 le Pyidawtha No. (1) thimfung thlaknak ah thimfung 92 an hlawtpiak hna. Hakha khuachung ahhin thimfung thlaknak hmun 14 a um i, hmundang ah hlawtpiakmi thimfung zong an tlawm lo.

Minung pakhat nih thimfung kuang pathum ah thimfung voi thum (Pyithu, Amyotha le Pyine hluttaw) thlak ding a si. Kuang khat lawng ah a thlami, thimfung thlaknak kuang chung ah rawn lo in a leng ah chiahtak a hmangmi. Mah bantuk ahcun Hluttaw aa dangmi kha thimfung zong aa zat ti lo. thimfung catlap kha thimfung thlatu nih a bil tuk ruang ah a tlek sualmi, zei party hmanh thim loin catlap lawng in kuang chung ah a senhmi, tazeih nam tikah a leng i nam sual tibantuk ruang ah thimfung hlawtpiakmi an tam hi a si.

Thimfung thlak ningcang cawnpiaknak hi election commission le ramkhel party hna nih a hlankan in an tuah ding rian a si. Tutan ah hi bantuk in mi tampi an thimfung hlawtpiak an simi hi a hlankan in cawnpiaknak a tlawm tuk ti a langhter. Election commission nih an chimning ah, “thimfung thlakning cawnpiaknak kong ceih ding ah khuapi kip ah kan vak i meeting kan auh nain ramkhel party zong an chuak tawn lo” an ti.

Thimnak upadi, media le ngiathlaitu phu hna nih an zulh dingmi hi thimfung thlaknak hmun tuanvo ngeitu tampi nih an rak hngal lo. Cheukhat thimfung thlaknak hmun ahcun media nih luh a ngah lonak hmun tiang ah an luhter hna. Cheukhat hmun belte ahcun luh a ngahnak chung ah luhter duh loin a rak i hrocermi zong an um. Thimnak hmun ah a um khomi party palai hna nih zei tiang dah an tuah khawh timi hngalhfian lo ruang ah buaibainak zong a um len.

Dawrthar sang Ah-lah-kah sianginn thimfung thlaknak hmun ah Chin party ai-awhtu palai pakhat nih thimfung catlap he aa lomi aa ken i, thimfung thlak ningcang a chimh hna. Mah cucu thimnak ni taktak ahcun a si awk a si lomi a si nain aho nih tlaangtlak a um lo. B.E.H.S No. 1 thimfung thlaknak hmun ah Chin party in palai pakhat nih thimfung thlak ah a rami kha a chung tiang in a va hruai i, thimfung thlak ningcang a chimh tiah Nov. 8 suimilam 11:00 am ah khan Chinland Post nih thawng kan theih. Mah kong ahcun party dang nih an duh lo caah chikkhat cu bia-alnak a chuak, nain an dai than.

Khuathar sang B.E.H.S No. 2 Con Bik hall ah mee-zung-hmu a daithlan ruang ah chikkhat cu an buai ve. Thimfung catlap a hnulei ah khin thimfung thlaknak hmun zohkhenhnak haotu (Mee-zung-hmu) nih minthut ding a si. Mah cu cauk pakhatning in minthut a philh. Cauk pakhat ah mee catlap 50 a um. Minthut lomi catlap ahcun minung 48 nih mee an thlak dih cang hnu, 49nak pa nih mee catlap ah minthut a um lo kha a hngalh. Mah kong ahcun Election commission lei nih hlawtmi (pe mee) ah kan chiah dih lai tiah an ti. Mah cu party lei nih an duh ve lo caah chikkhat cu an buai. A dongh mawrawt ah MP aa cuhmi minung pali nih pe-mee ah chiah an duh lo caah an pali in hnatlaknak minsen an thut i, pe-mee (hlawt) ah chiah lo ding in election commision nih a lungtlinpi hna.

Pyidawtha sang Ah-Mah-Kah sianginn thimfung thlaknak hmun ah Hakha khua um a si lomi mirunpi motor in an ratpi hna, mah chung ahhin thimfung thla khotu cazin ah a min aa tel bak lomi nih hmatpungtin piahnak lawng in thlak an i tim. Mahka zawn hi Hakha mee sandah nee-mee 2 a si i, Minister Pu Ngun San Aung aa cuhnak hmunhma a si. Mah mirun hna cu hmundang in lam riantuan ah a rami an si i, Pu Ngun San Aung nih a thlaktermi an si lai tiah lunghrinhnak a um. Election upadi ning ah hmun dang in a rami an si ahcun ni 180 a um cangmi a si lawng ah a umnak hmun ah thimfung thlaknak nawl a ngei tiah aa tel. Asinain hi hna pawl lak ahhin thlakhat chung lawng a um rihmi zong an i tel. A hnu belte ahcun min a ummi lawng an thlakter hna tiah thawng kan theih than. 

Tutan thimnak ah ruahning nakin thimfung a thlami an tlawm. Thimfung thla khotu cazin chung ah a min aa tel lomi an tam pin ah, thimfung thla kho ding ah min taarmi chung in cheuthum cheuhnih hrawng lawng nih thimfung an thlak, ti hi the Chinland Post nih kherhhlainak a tuahmi chung in kan ruahdamh khawh. Amah belte election commission nih thimfung thlaknak cazin an tuahmi chung ahhin lai a hlum ko nain min aa tel lomi an um bantuk in, ramdang ah a chuak cangmi zong thimfung thla khotu cazin chung ah aa telmi an um ve hoi. A tlaangpi huap in thimfung thlami cazin zoh tikah Laimi hi kum 5 ah voi khat te lawng tuahmi ah thimnak covo kan ngeihmi hi kan rak sunhsak tuk lo ti a lang. Lai a hlum ko, thimnak ni ah aa manh ko nain thimfung thlak a zuam lomi tibantuk um len dawh a si.

Thimfung thlaknak inn an tuahmi hi a tam-u cu a hmet tuk caah riantuantu le thimfung thlami caah cawlcanghnak a har. Dawrthar sang i, MCH timi thimfung thlaknak inn cu a luhnak innka lawng a um i, a chuahnak innka a um lo caah thlalang-awng in chuah a si. Party aiawhtu palai cheukhat hna cu a herh loin thimfung thlatu va tlaangtlak le bawmh timhnak a um pah len

Thimfung thlaknak hmunhma kip ah suimilam 6:00 a tlin hlan i, thimfung thlak ding ah a hngakciami an um pah len ve. Suimilam 6:00 am tlin hlan ah aa hngahciami si hna seh, zinglei suimilam 7:00 am tiang ah thimfung thlatu zatuak ah 95% cu kum 50 in a cunglei upa an si. Mah nih hin kum upa lei kap nih thimnak hi an rak sunhsak deuh ti a langhter.

Tutan thimnak ah buainak pipa cu a um hraw lo. A caante ah an hun i, amah caante ah an lim khawh. A zan thimfung relnak belte hi ruahning leng in an rau. Thimfung thlak caan hi zanlei suimilam 4 in an dihter i, early vote (cu-tin mee) an rel colh. Cu-tin mee an rel dih ah Nov 8 chun i an thlakmi thimfung vialte rel colh a si. Mi tam deuhnak hmun ahcun zan suimilam 11 tiang ah a dih rih lomi an um. Mee zung pakhat ah a tamlei in thimfung thlatu hi minung 1000 luan deuh hrawng lawng an sinain mahti an rauh tikah lenglei in a hngakmi le ngiathlaitu caah harsa ngai in hngah a si.

A tlangpi in cun tukum Hakha dirhmun in thimnak cu a zalong i, a dik ko tiah chim khawh a si. Asinain tuanvo ngeitu, ramkhel party le mizapi lei in thimfung thlaknak kong ah theihhngalhmi le sunhsaknak a tlawm deuh caah a tlamtling lomi tampi a um.