Atu lio vawlei cung pumpululh chuih thiam bik lak ah aa telmi C.Ronaldo nih hin a luanciami kum 2010 ah khan ruah lo piin fapa te a rak ngeih. A mintling ah Christiano Ronaldo Junior tiah an sak. Asinain tuchun ni tiang aho dah a hringtu nu a si ti hi zapi nih an hngal kho lo. Tangka tampi dih in a hringtu a nu kong cu an thuh zirziar. Kum 2011 ah khan the Sunday Mirror nih a nu kong cu an rak phuan nain a min, a chuahnak le a umnak belte an phuan chih lo.
Ronaldo hi nungak komh le dehdai a huam ngai phun si. Nungak pawl zong nih cun uar tuk hna kaw, cheukhat a thihhnawhtu nih cun voikhat i danghter hna khi a poi ah an chia lo. Lemcang thiam le model anih anih timi ceilak he zan an hmangti cang. A luanciami 2009 kum dongh lei hrawng ah khan Ronaldo cu Los Angeles (USA) ah dinhcaan a hmang. Voi khat cu zanriah an ei lio ah an einak dawr i rawl petu nu te kha a dehdai i riah a sawm.
Rawl petu chinchap, tangka duh chinchap, Ronaldo he ihti chap ding cu a lep in aa lep ko rua. Ronaldo nih riah a sawm lio ahhin a Mirang holh a pei caah nungak nu te nih cun a theihthiam piak colh lo. Cabuai cung ah khan thinlung lem te a suai piak, cun a kut in a piah pah hnu ah a theihthiam. Ronaldo nih a riahnak hotel ah aa kalpi i mahti cun zankhat chung dawtnak par an tlanti. Caan zeimawzat a rauh hnu ah rawl petu nungak nu te nih cun nau a pawi a hun i theih. Cu cangka cun Ronaldo lamkaltu (agent) Jorge Mendes timi pa sin in Ronaldo cu a hei theihter.
A hmasa ahcun Ronaldo nih a zum lo, asinain a fapa si tak le si tak lo hngalhnak ah DNA thi check ding in a hnatla. DNA result nih a fapa a si kha a fianter caah Ronaldo nih a cohlan. Leklak sihne (lawyer) aa hlan i a hringtu nu cu $ 15.1 million an pek hnu ah aho sin, zeitik hmanh ah hringtu nu a sinak kong chim lo ding le a fapa kong ah i thlak lo ding in biakamnak an tuahpi i, catlap in minsen an thut.
Tangka mithit ruang theu ah a hringtu nu nih mah hnatlaknak cu a cohlan. Mahti minsen an thut tiang ahhin a paw zong aa thei tuk rih lo. Nungak nu cu a chungle sin in lo diam a kal i, California ah fa zong cu a vung hrin. A hrin dih cun an biakamning bantuk in a fapa te cu Ronaldo nih a lak. A chuah in thla khat hnu ah Ronaldo nih vawlei cung mipi theih in “fapa te ka ngei” tiah 3 July 2010 ah khan a phuan.
A nu cu a fapa ruang ah a hmuhmi tangka cun mirum ah aa chuah colh. Asinain a pawngkam minung nih zeiruang ah dah a rum ti kha an theih piak lo. Aungbali (lucky draw) a pohmi phun ah khin an ruah men. A tangka cu duhduh mama in a cennak, nuamhnak ah a hman ti a si. Cu lio ahcun a fapa te tu cu Ronaldo i a nu (kum 55) le a farle pahnih nih an zohkhenh.
Asinain a hringtu nu cu kum khat hrawng a rauh hnu ah aa chir than. Ronaldo sin ah phone a chawnh i a fapa cu a hal than tawn. Asinain Ronaldo nih a siang ti lo. “Tangka na ka pekmi kha kan khirh than ko lai” a ti zong ah a duh ti lo tiah Ronaldo he aa naihniammi a hawile pawl nih an chim.
Ronaldo nih a phanmi balte cu hringtu a nu nih aa chirning a fak tuk lai i, mizapi theih in a phuan sual lai ti hi si. Hnatlaknak minsen an thutmi kha a feh tuk caah zeiti hmanh in lonh awk that dawh si lo, tuchun ni tiang a nu cu aa langh ngam ve lo. Ronaldo nih a fapa te cu a nu he an tuanbia hi kum 18 a tlin hnu lawng ah ka chimh te lai a ti.
A ralaimi 10 June 2015 ah khin Ronaldo Junior cu kum 6 a tling lai. Hmantlak chung i na hei hmuh bantuk khin a muite hi Ronaldo ngakchiat liote ko a lo an ti. A pa nih cun aa uang ngai, an umkalnak ah aa zulhter pah lengmang. Atu ahcun a ngakchia rih i, a nu hlam awk a hngal rih lo an ti. A nu le a pa kong belte cu internet ah a khat dih cang fawn i a nu taktak hlam awk a hun theih tik ah khin zeitin dek an hei tuahte hnga...!
Chirhchanh: http://www.mirror.co.uk, http://www.dailymail.co.uk