Election Thawngpang Dawi Tikah Theih Awktlak

Tial Caan - August 2015
 

Ram pakhat hruaitu hna thimnak ah a zalongmi le a dikfelmi a si maw silo tiah theih khawh nakding ahcun media nih tuanvo ngan bik a ngei. Media ah rian a tuanmi thawnglatu le NGO in thimnak ngiathlaitu phu ah rian a tuanmi hna nih thawngpang dawi (election coverage) tik ah theih awk le chinchiah awktlak hna cu a tanglei bantuk in an si:-

1. Thimfung Thlatu Mizapi Leikap In Ruat Hmasa

Election coverage kan tuah lai ti tik ah thimnak ah aa cuh dingmi candidate le party nak hmanh in thimfung thlatu mizapi kha biapi deuh ah chiah hmasat a herh. Mizapi nih zei kong dah theih an duh timi cithlatnak tuah ta, thimnak kong ah an i fian nakhnga ding ah election kong kha tampi in tial piak a herh.

Election kong an i fian khawh nak, party le candidate kong an i fian khawh nak, an policy le hmailei an hmuitinh kong an i fian khawh nak le thimfung thlakning an thiam khawh nak ding ah media hi bawmtu biapi bik a si.

Mi tam u nih cun candidate pa/nu kha a kong le a sining thate in an theihmi a si lawng ah an thim duh khun. Aa cuh dingmi pa, nu le a party kong ah zei bantuk dah mizapi nih hngalh an duh timi kha thinlung lak hmasa in an herhmi thanhpiak, cu nih cun mi tampi thimfung thlak duhnak thinlung a ngeihter hna lai.

2. Election Coverage cu Caan Tawite Rian a si lo

Election coverage hi election ni nikhat lawng a si lo bantuk in caan tawite lawng a si lo. A hlankanpi in thawk a herh i, election a hnupi tiang ngiatthlai a herhmi thil tampi a um.

A tlaangpi in election coverage cu election commission siloah cazoh nih thimnak a ni an thanh hrawnghrang le election commission nih thimfung thlatu cazin an tuah liote khan thawk khawh a si cang. Election a ni khi a biapi bik thazaang chuah a herhmi cu a si, thimnak result an thanh dih bak in election coverage aa lim rih lo. Election a dih hnu, cozah thing le cozah thar rian an i pekchanh hnu, siaremte in hluttaw le cozah nih rian an thawk hlan paohpaoh kha election coverage ah telh khawh a si.

Party pakhat nih candidate fehternak a ngeihmi si seh, pumpak in cuh aa timmi kong si seh, election commission lei nih timhlamhnak an ngeihmi, thanhnak an tuahmi paoh kha zulh colh lengmang ding. A kong pakhat na tialciami kha ningcangte in election a dih hnupi tiang i chiah ding. Cuti na tuah ahcun follow up thawngpang na tial tik ah fawizaangte in na zohthan khawh lai i, na thawngpang backgroung ah telh khawh lengmang a si lai.

Party nih ai tinhmi, party nih a ngeihmi policy le motto tbk. le candidate an thimmi pa i a konglam. Party chung ah zeitindah candidate an i thim, mizapi lung a tling maw ti tiang in thilthar a ummi paoh hlathlainak tuah colh lengmang ding.

3. Election Upadi Theih A Herh

Thawnglatu nih cun upadi zong hi a tam khawh chung in theih a herh tawn. Cu bantuk in Election kong cover ka tuah lai ti ahcun Election he aa pehtlaimi upadi cu thate in theih a hau. Election upadi na theih thawng in biahal thiamnak na chap lai, ca na tial tik ah an bawmhchanh lai pin ah thawnglak na kal tik ah ralrinnak an petu le himnak an petu a si kho.

4. Tangka Hmanning Ngiat A Herh

Party le candidate nih thimnak an i cuh tik ah tangka ningcang loin hman a tam ngai tawn. Election upadi ning ah thimnak aa cuh dingmi candidate nih tangka a hman ding zat, party nih tangka an hman ding zat le party nih tangka an ngah (party financial source) ding zulhphung thate in aa tel. Upadi ningte in party nih siloah candidate nih tangka an hmang maw hmang lo timi kha ngiat a herh. Tangka an ngahnak le a hmannak kha langhngannak (transparency) a um maw, ramdang bawmhnak an hmang maw, atu lio nawlngeitu party nih cozah budget an hmang sual maw tbk. hi ngiat awk tha ngaimi an si fawn. Hi zawn ah election upadi le zulhphung thate theih ahcun a fawizaang bik.

5. Thimfung Thlatu (voter) Cazin An Tuahning Cithlat Ding

Election commission nih zeitin dah thimfung thlatu cazin an tuahning hlathlai a herh. Hi kong ah biahalnak a si khomi cu; mizei bantuk dah vote pe khotu an si, cazin an tuahmi a tling maw, an hrelh sualmi pawl kha zeitin dah an tuah piak than hna, tangka hal a um maw, lai a hlum lo pawl le mi dam lo caah zeitin dah a hlankan in (cu-tin-mee) thimfung thlaknak nawl an pek hna, tbk. Hi kong ah ram dangdang nih an tuahning cio tahchunh in catial a herhnak tete a um tawn. Cucaah ramdang nih an tuahmi election kong zong a zatawk in theihchih ah a tha.

6. Candidate le Party Chungtel Biachimmi Ngiat Ding

Thimnak a hun naih zuahmah cun aa cuh hnga dingmi candidate le an party pawl nih lemsawinak (campaign) an tuah lai i bia tampi an chim lai. An biachimmi cu thate in ngiatthlai i chinchiah ding, a ruang cu teinak an hmuh sual ahcun an chimning bantuk rian an tuan maw timi cuaithlainak ah a herh te lai.

Candidate kha atu lio MP siloah Minister a si liomi a si ahcun a luanciami thimnak (eg. 2010) lio ah mizapi sin a chimmi le tutan (2015) i a chimmi cuaithlai ding. Cuaithlai khawhmi thil hna cu; 2010 lio ah zei bia dah a rak chim, a chimning in a tuah kho maw, a tuah khawh lomi cung ah zeitindah a hrilhfianh (phisin), atu ah teh khahlan a biachimmi kha a nolh maw tbk. Candidate nih a chimmi kha party pakhatkhat minung a si ahcun a party nih an i tlaihmi policy he aa kalh maw kalh lo ti zong ngiat khawh a si.

Hi bantuk bia an chimmi cung ah thil sining a theihngalmi expert le scholar pawl kha analyse tuahtu ding ah contact ding minung i ngeihcia ah a tha. Thawngpang tial tik ah catialtu hmuhning telh awk a that lo caah mi fimthiam nih an hmuhning an chim vemi kha careltu thinlung ah rian a tuan khun.

7. Mizapi Thinlung Hneksaknak

Election ni a phanh hlan ah social media hmang in mizapi thinlung neksaknak online polling, SMS polling tibantuk a tuahmi an um tawn. Cu bantuk zong cu ngiatthlai a herhnak zawn a um. Cu bantuk thimfung thlak chungnak cu zei phu nih, khoika in, zeitin dah an tuah timi thate in hlat i, i chinchiah ding. A hlankan in hneksaknak tuahmi kha a tlaangpi in a fair ngaimi a si kho. Thimnak tuah taktak tik ah a phi a hung chuakmi he aa dan tuk ahcun election tuahning kha a fair lo tiah palhnak kawl a herhnak hrampi a hung si kho.

8. Thimfung, A Tlaknak Bawm le A Hmun (Ballot & Voting booth)

Election commission nih thimfung thlaknak hmun an tuahmi hi mizapi caah kal harsa, kal duhnak phun a si maw, thimfung thlaknak hmun a zatawk in a um maw timi ngiat herh. A ruang cu thimfung thlaknak hmunhma ruang ah thimfung thlatu tlawmtam kong ah lai a rel khawh.

Thimfung (ballot) le a thlaknak bawm an tuahmi kha thimfung thlatu caah theihthiam fawizaang a si maw si lo, party logo, candidate min, hmantlak tbk theih fawizaangte in an um maw timi zong zoh a herh. A ruang cu thimfung thlatu nih fawite in aa fian lo ahcun a chung i a va luh tik ah ai timh lomi pi thlak a fawi. Thimfung thlak ni ahcun a chung ah reporter luh a ngah lai lo caah a hlaankan in mah cu hlathlaicia a herh.

9. Thimfung Thlak Ni Caah Timhtuahnak

Media pakhat nih election ni ah tlamtlingte in thawngpang an lak khawh nakhnga caah reporter an ngeihmi thazaang dihlak hmang in timhtuahnak thate in a ngeih a herh. Reporter pakhat le pakhat an riantuanning an cawhnawh nakhnga lo ding ah pakhat cio nih tuanvo an laknak ding hmunhma (tck. thimfung thlaknak hmun) kha editor te nih thate in tuanvo a phawt a herh.

Reporter pakhat nih ngeih a herhmi camera, voice recorder, notebook, ball pen tbk. tlamlingte in timhcianak ngeih a herh. Battery thazaaang in hmanmi thilri Camera, recorder, phone tbk. pawl kha a zan ah battery tlamtlingte in i tuncia ding.

Election ni i, thil a cangmi paohpaoh kha caan a kalningte in tial colh lengmang a haumi a um lai, cu bantuk pawl cu online in update lengmang a herhnak zawn a um kho. Cucaah hi ni ah zung ah a thumi editor siloah riantuantu dang le a leng ah thawng a lami reporter pawl kha pehtlaihnak thate in an ngeih a herh. Cu bantuk zawn ahcun phone battery full le phone tangka zong a zatawk in i chiahcia a herh.

Election he aa pehtlaimi candidate, party upa, commission upa, cozah lei upa le mifimthiam pawl tibantuk kha an phone number thate in list ah i ngeihcia dih a herh. A biapi ngaimi pakhat cu na riantuannak media phu nih an in tuahpiakmi reporter card siloah election commission nih an tuahmi reporter card pin ah hmatpungtin zong ken chih hrimhrim a herh.

10. Election Ni Ah Caan Hmanning

Thimfung thlaknak an hun caan, an khar caan, cu-tin-mee caah caan hunmi le an kharmi tibantuk thate in theihcia i ngiatthlai a herh.

A phuphu in thimfung thlak ah a rami khi cozah riantuantu an zung pakhatkhat nih hramhram in thlaktermi an si kho, cucaah kha bantuk a phuphu in a rami pawl kha thate in ngiat awk tlak ngai a si.

Election ni cu nikhat te lawng a si bantuk in caan aa teetkhawt tuk lai. Rawlei tidin manh lo zong a um kho men. Cucaah rian awt hlan zingka ah khimte in i eicia ding, a herh ahcun chun ei ding zong changreu zeimaw le tidin ding zalchung ah i ken ah a tha bik.

Thimfung thlaknak hmun ah a ra i, thimfung thlak ding caan a hngakmi, kha hi ti hin biahal khawh an si; Thimfung thlak ding ah fialtu an um maw, An innchungkhar ah ho dah a thla ve, zei rian dah a tuan i, zei bantuk minung khi dah hruaitu ah a duh hna.

Thimfung thlak dih in a hung chuakmi pawl kha tampi biahal khawh a si; A chung an va luh tik ah an hmuhmi zeidah um, a ho nih dah a congh, cuka theng ahcun na thlak lai timi a um maw, a hngaktu pawl nih ngiathlainak le zoh hraamnak hna a um maw,  party logo, cadicate min, pallet number, hmantlak tbk. kha theihhar le fianhar in a um maw tibantuk pawl hal khawh a si. Hi zawn ah a ho, zei party dah vote na pek tiah hal  a herh lem lo.

11. Cu-Tin Mee (Distant vote, Early voting) Ngiat Ding

Kum 2010 Kawlram thimnak lio an rak buai ngaimi cu a hlankan thlakmi thimfung (Cu-Tin mee) hi a si. Lai a hlum lomi pawl cakuat in vote a pemi, siizung um le lengchuak kholo pawl nih a hlankan in vote (thimfung) an pekmi khi Cu-Tin mee ti a si. Hi vote nih hin election phichuak tam ngai a thlen khawh.

Zei tik in zei tik caan tiang dah Cu-tin-mee phakter khawh a si, zeitluk dah election phichuak a thlen, ningcang lo in cu-tin-mee an cohlanmi a um maw ti bantuk pawl hi theih herh ngaingaimi an si. Kawlram thimnak 2010 lio ah khan cu-tin-mee hi a caan luan hnupi tiang an cohlan ruang le a ningcang lo in an cohlan ruang ah chun ah teinak a hmu ko nain zan ah a sung thanmi an tam ngai ti a si. Cucaah cu-tin-mee zong hi biapi ngai ah chiah a herh.

12. Thawnglatu Nih Hrial Ding

Thawnglatu cu thawnglak le thawngthanh kha a rian a si bantuk in rian-lo-rian va tuan sual lo kha a biapi ngai.

Thawnglatu nih vote pek lo ding ti cu a um lo nain vote na pek sual zong ah cu pa cu ka vote timi kha mi sin ah chim lo ding. Anih party nih cozah ser seh tiah na lung chung tein na duhmi a um sual zong ah zatlaang theih in phuanzaar lo ding. Thawngpang tial tik ah party pakhat kong lawngte tial loin party dihlak aa ruang khawh chung in tial ding.

Buainak, i alnak, biaral dohnak tbk. thawngpang (Conflict report) tial tik ah source a tlin khawh chung tling in lak i zuam ding. Thawngpang tial tik tanhhlei le kaptanh ngei a lomi biafang pawl hman lo ding. Analyse phun in a dangte na tialmi a si lo ahcun thawngpang tial tik ah na hmuhning telh bak lo ding (hmuhning telh duh ahcun midang expert le scholar pawl an hmuhning va hal deuh ding).

Zei tluk mi thintawi si ko zong ah thawnglak lio ahcun thinhun hrial ding. Biachokvai, mi pakhat nih fiang huaha loin a theihmi, a chimmi, chirchanh thathi a ngei lomi kong fawizaang tuk in tial lo ding. Party campaign an tuah lio ah thilri, eidin an phawtmi tbk. kha thawnglatu nih cun i lak le ei ve bak lo ding. Party nih campaign caah an tuahmi thantaar, sticker, lukhuh, angki tbk. an phawtmi zong kha i lak sual lo ding.

Party pakhatkhat chung ah na komhhawi ngaimi le na chungkhat sahlawh an um sual zong ah midang he aa ruangte in pehtlaih le chawnh biak ding. Mizei bantuk an si zong ah party hruaitu, aa cuh dingmi tbk. pawl he mizapi hmuh ah naihniam tuk in um, hman i thlakti, social media chung ah cu hmantlak va taar tibantuk kha hman lo ding. Mizapi nih ‘hi pa cu anih party lei ah a tang’ tiah ruahmi kan si lo nakhnga ding ah hi vialte hi kan hrial an herh.

Chirhchanh: East-West Center nih ‘Tips for reporters in Election coverage’ timi lecture le Myit Ma Kha News Agency nih ‘election monitoring training’ lecture an pekmi chung in tialmi a si.