CNF Tuanbia ah Pu No Than Kap Bia Le An Chim Ciomi

Aluaciami kum 13 hrawng(1989-1992) ah Chin National Front(CNF) cu a ngan a rak dam lo ngai. Culio caan cu Pu No Than Kap chairman a rak yuan lio a si.

CNF ah Pu No Than Kap a luhning, president ah a hung kaining, president sinak in le CNF member sinak in chuah a sinak kong tuanbia chimmi tete aadang cio. Cu kong ah CNF a rak dirhtu Pu Tial Khal le atulio CNF Secretary General Pu Zing Cung nih an chimmi, 2007 kum ah No Than Kap kong he pehtlai in CNF nih statement an rak chuahmi, Pu No Than Kap pumpak nih amah kong aa chimning pawl hna cu fonhtonh in hmunkhat teah kan vun langhter.

2007-CNF Statement-: 1988 kum  ah No Than Kap cu CNF ai-awh in Manepawlaw, Thailand ah meeting kai ding in an rak kalter i a tlun hnuah  chairman sinak ka kian tiah chairman a tuan liomi Pu Tial Khal cu a hal. CNF dirh lioah a rak i tel vemi Pu Lian No Thang le Ro Eng nih an cohlang lo. Asinain amah Pu Tial Khal nih No Than Kap cu ka tu a si, cathiam a si, Mirang holh zong a thiam ti ruangah No Than Kap i a halmi cu hnatlakpi ding in adang hruaitu upa hna cu a lem hna i, No Than Kap cu CNF chairman rian a kianh. No Than Kap cu conference nih si seh, cabinet hnatlaknak in si seh CNF chairman ah a rak kaimi a silo.

Pu No Than Kap –“Presindent sinak amahte in a hal hna an timi kha lih a si. Thailand in ka hawng tlun hnu in Pa No(Lian No thang) le a naule pawl nih nangmah nih rak kan hruai law tha lo maw an ka ti. Kei zong nih a si ve ko hme cu ka ti. Culio ah kan president um ve ko buin a  lung nuam lai lo ka ti i Pu Tial Khar zong thate in ka ruah ta,“nang president si law, kei vice-president ah ka um lai, Buainak a um zongah kan bawmh lai a ka ti.” Cu ruangah ka kainak a si.” (Ch: CCN Channel le Pu No Than Kap video interview)

Pu Tial Khal(CNF Founder):–  Kan nau No Than Kap cu Thailand ah voihnih voithum tiang meeting ah ka kalter hnuah a riantuanmi a lunglut i CNF president sinak rak ka kian tiah a ka hal. Cutikah tlangval thawngtha le cathiam a si ve ruangah ka hawile pawl lung nuam lo buin ka rak kianh……Kha ka rak kianhmi kha CNF ka riantuannak ah kai chir bik. Ka hawile pawl sinin mawhchiat ka tong. Na thih lo ahcun midang na kianh hna ding si lo an ka ti. Athlite in a kan bawmtu pawl zong an i let than dih. CNF riantuannak thazaang a der phah.” (Ch: Chinland Today le Pu Tial Khar biaruahnak)

Pu Tial Khar hruaimi CNF head-quarter nih Pu No Than Kap cu foreign affair in-charge sinak in Alliance pawl sin meeting ah an rak thlah i chairman sinak a lakmi cu an lung a tlinlo tuk caah 1989 kum thawk hrawng ah buainak nganpi a rak chuak. Culeng ah Pu No Than Kap nih Pu Tial Khal a umlo lioah an nu sin ah (India cozah Congress (I) nih CNF ca ah tiin bawmhnak a pekmi Rupees 1,000,000) cheque a hal i a chuah dih. Acunglei kong pahnih ruang ah Tial Khal, Ro Eng (Chief of Staff) le a dang an hawile nih 1989 October 6 ah Pu No Than Kap cu CNF in a voi khatnak an rak chuah. Asinain Val Thang, Tlung Luai, Sang Hlun le Tluang Lian hna nih si hna seh, 88 Chin generation pawl nih si hna seh Pu No Than Kap lei ah an tan caah Pu No Than Kap cu CNF chairman in a dir khawh thannak a si. (2007 Nov 28 - CNF Statement)

Pu Zing Cung-: “1989 -1992 karlak Pu No Than Kap chairman a tuan chungah thil a tuahmi vialte kan i ceih than hna, an chim an rel le thil sining vialte kan vun ruah tikah pakhatnak ah Phaisa lei ah felnak a ngei lo. Kan ralkap hna hi amah nih a hman hna i, mipi sin, sumdawng le a dangdang sin ah ningcang loin phaisa lak, kha phaisa kha phaisa tlaitu sin ah phan hleng loin amah kut chungah pek lengmang a si kha kan hmuh. Cu Phaisa cu amah nih a duhning paoh in hman khawhnak nawl a ngei. Pahnihhnak ah  nunzia lei ah felnak a ngei lo. Abik in nu lei ah felnak a ngei lo. Ahoho dah an si timi zong an min he an minung he evidence thate in kan ngeih dih. Pathumnak ah kanmah chung in a remlo deuhmi hna, hihi cu ka ca ah tihnung a si te lai tiah aa ruahmi hna, lunghrinhnak a ngeih deuhmi pawl hna cu zeihmanh taza zung ah phung ning in taza cuai hleng loin cuticun nunnak a liammi tampi an um. Hi vialte hi dothlennak a tuahmi party pakhat karlak ah a um awk a silo tiah kan ruah caah hlathlainak kan tuah lai kan ti i Enquiry Commission rak dirh a si.”(Ch: CCN Channel le Pu Zing Cung video interview)

Pu No Than Kap-: “CNF chairman ka rak tuan lio ah a sual a palh, phaisa kong, nu kong, nawlngeihnak a hmangsualmi(misuse of power) tiah an ka puh. Culio a ka puhtu bik pawl cu Pu Sang Hlun, Pu Zing Cung, Dr. Sui Khar le adang pawl an si. Asiahcun enquiry commission kan dirh piak hna lai i ka sualnak nan hmuh ahcun ka chuak lai, Nan hmuh lo ahcun phungning in dantatnak a um lai tiah ka zuamcawh hna. Enquiry commission chairman zong ah midang si hna hlah seh. Sual a ka puhtu hi Hakha leimi deuh nan si caah Pu Sang Hlun lila hi chairman si seh ka ti. Cutin commission cu ka dirh piak hna.   Asinain kanmah Falam lei in Pu Hrang Vung le Pu Van Thawm Lian cu tehte(witness) an lakdan kan lung tling lo an ti i committee in an chuak. Cuticun buainak cu a hung sangchin vima i voikhat cu Pu Zing Cung, Dr. Sui Khar le Benjamin Tu Ling nih Champhai Camp ah ka tupa Thawm Mang an rak tleih(kidnap) i ca an rak ka kuat"

"Na sin i meithal a ummi kha na kan pek lo ahcun na tupa nunnak he kan thlen lai tiah an ti. Pu Hrang Vung, Pu Tlung Luai le midang kan naule minung 17 Champhai Camp ahcun kan va kal. Cu bantuk in zaangennak tiang kan hung phak tikah kan naule zong nih aherh ning paoh in kan lehrulh ve hna lai an ti nain ka duh lo. Hi bantuk in mah le mah karlak ah ienteinak a chuak, ka sualnak hmanh nan hmuh hlanah hi bantuk tiang thil a phanh cu zei si paoh ah kei cu kan dinh tak hna lai tiah ka chimh hna. Cu ni 12 December 1992 ah kan party minung 80 hmai ah kaa dinhnak kong cu ka phuan.” (Ch: CCN Channel le Pu No Than Kap video interview)

Pu Zing Cung-: “Enquiry commission chung i Pu Van Thawm Lian le Alexander Hrang Vung nih Pu Sang Hlun enquiry commission chairman kan chiahmi kha kan zum lai lo an ti caah Pu Tlung Luai nih a chawn. Asinain cu committee nih biaceihnak le biachahnak zeihmanh a ngeih hlan ah enquiry commission nih hin zeihmanh a chuahpi lai lo, san a tlai lai lo an ti thiamthiam rih. Cun kan chairman a tuan liomi Pu No Than Kap zong nih kha committee riantuannak ca ah zeihmanh hmalaknak a ngeih lo tikah kan party kha hnutawn lo hmaitawn lo in a um". 

"Abikin kan party chungah a sualmi um maw a palhmi um maw tiah cithlatnak committee kan dirhmi nih rian a tuan lo tikah kan party a rawk ding phun in a rak um. Kan party hi mi pakhat ta a si lo, mibu pakhat ta zong a si lo. Kan miphun dihlak nih kan i hrawmmi party a si tik ah kan Chin mipi ta a si tiah ruahmi a si. Cucaah hi kong hi a phung ning in kan tuah a herh tiah ruahnak a rak um i, kan chairman a simi Pu No Than Kap cu Dec 9 1992 ah chairman sinak in le party member sinak in kan rak chuah”. (Ch: CCN Channel le Pu Zing Cung Video interview)