Chin Party Sunghnak Hrihhram le Kawl Party Vok Ke

 

11 November 2015

 

Election Commission nih phungningte in thimnak result an thanh cang. Aho dah cozah dirh kho ding in teinak a co ti a fiang cang. Chinram ahcun NLD nih a tei cikcek hna ti kha careltu theihcia a si. ZCD nih MP thutnak (6) an ngah i, anmah lawng hi Chin party in teinak a hmumi an si. Chin party lak ah a thawng bik kan si aa timi CNDP nih pakhat taktak te hmanh thutnak an ngah lo. Falam le Paletwa cu kanmah ta ti phun in a au lenmi CPP zong nih pakhat hmanh an ngah hlei lo.

Nov 8 zaan tiang ah Thantlang khuapi cu USDP nih baar dih ding dirhmun a phan. Asinain a thaizing ah khuate lei thimfung a phanmi nih minung pahnih cu a thlak than hna i ramkulh caah aa cuhmi Pu Van Thawng le Dr. Hmuh Thang lawng nih teinak an hmuh thai.

Mahti rumro in Chinram ah NLD nih teinak an hmuhmi le Chin party nih Chinram ah zeihmanh an si lomi hi Election a cuantu hna a lauter ngai hna. NLD a tanhtu le anmah [Chin NLD] lila hmanh nih mah tiangtiang in Chinram ah teinak kan ngah lai ti hi a hlankan in zumhnak an ngei ngam lo. Khat lei ah, Chin party cu anmah le hmun cio (CPP nih Falam, CNDP nih Hakha le Thantlang, ZCD nih Tedim le Tonzaang tibantuk...) ah teinak tam-u an co te lai ti hi Election a cuantu nih an rak zumhmi a si. ZCD cu anmah hmunte ah an thawng nain zeiruang ah dah party dang pawl hi anmah inn ciacia ah an mualpho hnga?

Hakha CNDP pawl nih Chinland News cachuahmi cung ah an lungtlinlonak kong fiang ko in an chim. CNDP aa telnak tlaangcung party komh phu NBF hi thimnak a dih hnu in cozah ser khawh nakding ah USDP he tangti an si khawh nakding ‘a lam’ kha Dr. Sui Khar nih Henhrich Boll Foundation he biaruahnak ah a chim.

Salai Lungthli Tum nih Dr. Sui Khar biachimmi a laak i, news ah a hei ser chin. Mah cu news ah a biafang hmanning kha Dr. Sui Khar nih a chim duhmi sullam taktak kheng loin amah [catialtu] duhning in a kuaih tiah mi tampi nih an puh. Hi thawngpang nih hin Hakha peng cu a den ngaingai. Hakha peng ah CNDP thimfung pek aa tim komi kha NLD ah an i thialnak tiang a hun chuahpi. Mah kong ah CNDP nih biatakte in hrilhfiahnak tuah an i zuam colh nain election campaign a dih leisang a si caah caan kan i nguh ti lo tiah an chim.

Thantlang khuapi cu a ning in USDP nih an lak khawh dengmang nak le atu ah Dr. Hmuh Thang le Pu Van Thawng nih an tei thainak zong khi ruah awk thil te a um. Kan hnu October thla chung ah khan “2015 Kawlram Thimnak” timi cauk hmete (Time Megazine phun khin) dawh taktak in Korea ummi Salai C Alexander nih a chuah.

Cachuahtu nih bia tangdanh a tialmi ah “zei party hmanh tanhmi ka ngei lo” a ti. Nain, mah cauk a chung um pawl chuak lak in rel ahcun USPD le Dr. Hmuh Thang caah chuahmi a sinak a lang ngai. Cun mah cauk hi uk 600 an chuah i, Thantlang le Hakha ah a man loin an phawt hna. Mah cauk nih khan ‘a party’ nak in Chinram caah rian a tuan kho dingmi ‘a minung’ zoh in thim a herhnak kong biatlaangkom bantuk in a langhter. Kha cauk kha Thantlang lei ahcun laar ngai dawh a si. Mah tik ah, Kawl party nih Thangtlang an laak chih khawhmi hi thimfung thlatu mizapi nih party zoh loin minung an zoh ruang ah ti khawh a si.

2010 lio kan zoh tik ah CNP (atu CNDP) nih Thantlang cu a ning in an rak laak. Mah nak khan a luanciami kum 5 chung ahhin peng dang nak in Thantlang peng cu Chin party a daw bikmi ah ruah an si. Asinain tukum ah mahti rumro in Kawl party nih an pawnchuah khawh ko hna hi zei ruangte ah khin dah si hnga? Kum 5 chung ah CNDP in MP a tlingmi nih mahti hlawt ding tiangtiang in maw san an tlaihlo ko hnga? Bialehnak cu; Thantlang mipi nih mithing, mithar thleidang lote in riantuan kho ding minung paoh an thim hna ti usihlaw a khen bik men lai.

Khatlei ah, Salai Lairamthang nih “CNDP an sunghnak hi Hakha le Thantlang lawng ah a si lo i keimah [Lairamthang] le Lungthlitum hi CNDP sunghnak hrihhram ah puh ding kan si lo” a ti. A si taktak vemi cu CNDP nih Chinram hmun 39 ah an i cuh i, pakhat te hmanh teinak an hmu lo. Mah nih hin anmah [CNDP] hrimhrim zong an i chim bantuk siloin an rak lawdor pah rengreng ti a lang.

Anmah thazaang dernak lawng zong puh awk a tha thlu ve lo. Tukum thimnak result kan zoh tik ah Thangtlang dah ti lo cu a party zoh bak in mipi nih an rak thim hna ti a lang. November 8 zingka ah thimfung a thlami cheukhat kha random interview in Chinland Post nih bia a hal hna i mi tam-u nih NLD kan pek tiah an chim ngam. Mahti a chim ngamtu pawl cheukhat cu ‘zeiruang ah dah NLD na pek’ timi biahalnak ah “NLD cu a hlanpi in ka rak uar cangmi a si ti le, Aung San Suu Kyi ka pek ko” ti pin ah a ruang an chim khawhmi a um lo. Chinram NLD minung pawl an uar ruang hna ahcun si dawh a si lo.

Kum 25 hnu ah NLD nih a voikhatnak Chinram ah an hon i cuh kum a si, Daw Suu laarnak nih a hon phanh khawh ve fawn tik ah pumpak in uar theng lomi minung pawl zong nih NLD timi le Daw Suu min in teinak an co. Salai Van Lian Thang bia bang, Daw Suu tilian nih Chinram a fenh ve khi a si deuh ko rua. Cunglei in NLD a thawn ruang ah tanglei Chinram NLD nih “Lungthli Ruahlo Vok Ke” timi an rak i hmuh ve. Atu lio Hakha khualipi ah a laar ngaimi, tleirawl tete zong nih capo ah an seih bikmi cu, “NLD ah rak i cuhning law, ka tei ve hrimhrim lai” ti hi a si.

Chin party sunghzatlaknak hi Chin party thenthek tuk ruang ah tiah a puhmi an um. Nain a hrihhram taktak ahcun mah kha a biapi a rak si lem lo. Salai Mang Hre Lian bia bang, Kawl party zong 30 renglo ah an i then ve ko, nain a thawng bik NLD ah an i funtom ko. Chinram ah thawng ngai bantuk in a hong chuak tharmi CLD kha thimfung thenthek kho bik tu an lo nain an result ngahmi zoh tik ah thimfung vaivuanh khotu an rak si lem lo. Kanmah lila kan lung a rak dong i, Kawl party lei ah kan va tanmi kha Chin party sunghnak hrihhram deuh a si deuh rua.

Mi pakhat cio nih thimnak nawl an ngeihmi covo in an thim cangmi cung ahcun i mawhchiat phung a si lo. Asinain thim lo dingmi a thimtertu hna le thim awktlak lo thim ding ah a hleng khotu minung belte khi mawhchiat khawh an si. Mi tam bik nih an thim cangmi cu lawmhpi ding le upat piak ding an si. Asinain hlenthawi ruang ah thim lo dingmi thim sual belte cu a rak poi tuk ve hoi. Mipi nih an rak theihfian lomi kha thiltha lei ah fiang lak in a chim khotu minung khi upat awk tlak taktak an si fawn.