“Kan Phan Deng Ka Dawt”

Ka rawl ei liomi a dih laite ah khin a ka thlahtu ding ka hawi pa a hung phan. 

“Ka dua na tlai lai hi, vun i hnawh deuh” a vun ka ti ah khin suimilam ka zoh__mawtaw chuah nakding ah minute 10 lawng aa duh cang. Ka khim colh ve. 

Zeidang tuahmanh ti loin ka hawipa nih cun a mawtaw saikel (bike) in a ka phurh. Rangoon lei kalnak bus station (kaa-keih) lei ah kan tli colh. Bus aa thawhlai minute pathum aa duh ah kan phan.

Kaa cit dingmi mawtaw cu a rak i manh cang. Ka tlai deuh ruang ah mawtaw spare pa nih a vun ka siik leen. Ka thil cu ka hei pek i, “zokzok in kai khih” tiah awhrang nawn in a ka ti. Mawtaw chung cu ka hei lut. 

An rak khat dih cang, a tlai bik ka si taktak. A lai hrawngte ahkhin thutnak pakhat te a rak lawng. Ticket ka cawk lio ahkhan khual lam a hla fawn i siaremte ih nak ah tiah thlalangawng leikam thutnak kha ka rak cawk. Asinain a lawngmi cu thlalangawng kam a si ti lo. Ka thintur pah ziar cang.

A lawngmi thutnak pawng kan hun phanh cu a pawng ah sam sen dedeng in ngaknu note a rak thut ko kha ka hmuh. Kan mit aa tong, ka thin ‘phu-duk phu-duk’ tiah a tur colh. 

Ka mawh lo, mah tluk mitngel dawh, hmaipanh le hnar ruangrem kha TV chung lawng ah pei ka hmuh bal tiah. Second 5 hrawng cu taang ko in kan i zoh, zei a chim lo, zei ka chim ve lo. 

A ning a zak i Mirang khuhlu hminka te bang khin a hmai hung sen. A ningzahmi kha kan mit aa ton ruang belte si dawh si lo. “Nangma thutnak si ma” a vun ka ti. Kei Salai aa dawhnak ah ka thinlung aa fu manh cang. A aw ka hun theih cun ka lungtur a rang chin.

 “Ah-aw-ah ka hngal lo” tiah vaivuan nawn khin ka leh. Kawlholh vun i hlan ahcun ka khaloh aa tteih cang. Kei ka tlaunak aa dawhnak, anih ningzahnak bel phun dang. Ka thawpi ka hun chuah, ka hun i hrim i, tha deuh in kan vun i chawn.

Kan thutnak number kan vun i hal, a rak thutnak kha keimah thutnak, a lawngmi kha anih thutnak ding a rak si. “Mawtaw ka ri tuk i dakaw zaangfahte in mahka lei hin na ka kian kho hnga ma tiah ka rak in hngahcia ko hih” a vun ka ti. 

‘Ka rak in hngahcia’ timi biafang nih khan ka thinlung ‘zek’ tiah a peh manh hoi. A ka theihciami ma si hnga ti phun in ka hun ruat manh. 

“Si ma ngah ko e, na riit lonak ding si ahcun” tiah ka bia vun hlei. 

Kan thutnak cu kan i thleng i, siaremte in kan hun um. Naih tuk thut kan ti cu a rimthla tiang khin ka hnar ah hung lut dih manh cang. A ziihmui (perfume) rim nih an chim tawnmi snow white ngaknu ko kha a hun ka theihter.

Atu nai ka thintur kha a ziam deuh rih lo caah bia dangdang ruah ding khi ka kaa in a chuak kho rih lo. Kut vun i tlaih i theihternak vun i tuah ding ti kha ka lung ah a chuak nain ka ngamh ziar fawn lo. 

Ka mitsir khin ka pawng thu komi cu ka hei ngiat lengmang. Holh lo piin minute 5 hrawng kan um hnu ah kut tlaih ding in ka orhlei kut ka hei pek pah khin “Bawite ka si. Kei ta zeitin da kaan auh lai” tiah theihternak cun biahram ka hun domh. 

A vun i her i kan kut kan i tlaih pah in panh sirsiar te in “Hehe Dawtnu ka si” a ti. 

Mah lio ahcun a orhlei kut Laibawi ah zungbunh aa bunh ko kha ka hei hmuh. Cikhat cu khua ka ruat__nain a orhlei kut si fawn, a laibawi si fawn i a lawngmi si ko lai hih tiah keimahte in ka hna hei ngam than. 

“khoika tiang na kal lai” tiah Dawtnu nih bia a hun peh hmasa. 

“Rangoon tiang si ko lai. Nang tah?” 

“Kannih Rangoon ah kan um Hakha ka tlawng ta i ka kir lei si” 

“Aww...si ma.. sicun...” 

Mahti khan kan bia cu aa peh vima i dongcat loin bia kan i ruah thai cang.

A aw hi hlasak thiam dawhdang si lo nain zantlai hnu ah mi thlim thiam dawh phun khin um. Piangpai ngai khin nutling awchuah in a awchuah i a ngeih nuam hringhran. Kan riantuannak kan i hal, kan sianginn kainak ah kan kir, kan hun i theithiam vima i kan chuah kum tiang khin kan i hal ngam cang. 

“Kum 3 bak in kan nau hi mu, ka u na ka ti hau hih” ka ti. 

“Ka far na ka ti lo cun ka u kan ti fawn lai lo” a ka capo chin ve. 

A mui duhnun lawng si lo, mi hawikomh nuam phun a si hi caan tawite chung ah ka hmuh manh. Bia kan i ruah lio i kan mit aa ton liote khin ka celh tawn lo, ka thintur a zual. Bia a vun chim pah in a hmur cawldan khi zoh nuam ka ti. Kan i theihnak suimilam 5 tling rih lo nain dawtnak in “Nau Dawt le U Bawi” tiah kan i au kho manh cang.

Cat lo rumro cun bia kan hun i ruah i Nau Dawt a ba pah cang. “mawtaw ka ri hnik rua hi, chikhat ka vun i din ta lai mu” a ti i, thlanglangawng lei khi aa hngoh pah in a mit a ka chinhtak.

“Thlalang awng hngoh lo khan ka liang cung te hin hun it law zeitluk in da na siarem hnga mu Nau Dawt” tiah keimah tein bia kaa ruah. A rak ba deuh rua a ka hngilhtak beh cang. Aa hngilhmi zong kha ka vantha ko ka hei ti__zalongte in a hmaifang zohnak caan ka ngei cang. 

A hmaifang cu piangpai tukkaw ka zoh ahhin ka mit tha a dam hringhran. A hmur tanglei a laifangte khin dinte in a kuar. Hmur sensi thuh hau loin a hmur senciami te khi zoh ah cilkari a chuak. A mui zohnak lawng in biazai tial thiam nih cun biazai fungthum tal cu an tial khawh lai.

Zanlei ni liamlai caan a hung phan. Gankaw vun lawnhka hrawng khi sikaw fingtlang cuanh ding a um pah rih. Nau Dawt hmai hei zoh pahkhin fingtlang zong cu ka hei cuan chih kho i aa rem hringhran. A liam dengmang cangmi zanlei ninem nih lungdaite in aa hngilh liomi Nau Dawt hmai a hun cerh. Zanlei sang kik zilthli a hung hrangmi nih thlalangawng khin a sam a hun hranh i aa thui depmap, ka zohcim lo mah liote kha. Cu lio ahcun a sam fang zeimawzat nih a mit zawnte khi an hun khuh. Aa dawhnak a ka phenh, ka zoh siarem ti lo. Cu lawng lo, amah ca zong ah aa hngilh siarem dawh in ka hmu lo. Ka orhlei kut in a sam cu remhpiak ka vun i zaal.

Ka kut le a sam aa tawngh laite khin aa tthang hnikmi bang khin a thawpi a hun chuah. Ka kut cu ka lak zokzok than. Vanthat ah aa thang thai lo, i thang sehlaw a ka poh hnga i ka umtu kha zeidah ka lawh hnga mu. Ka thawpi fak nawn in ka hun chuah ve. A sam remhpiak ding vun i zalh than ding kha ka ngamh ti lo, ka duh pah fawn. Ka ti hnga maw ti lo hme tiah ka lungchungte in kaa al len. 

“Pasal a, ziah ka ralchiat lai” ka ti i, atunai bantuk cun hun remh ka vun tim than, ka orhlei kut nih a hmai zawn a vun phanh lio ahkhin kan mawtaw mawng pa nih a mawtaw brake a lamh sual ai...!

Mawtaw aa citmi pawl hmailei ah an i nok dih. Nau Dawt aa hngilh lio cu si fawn, a kut zong a zo manh lo. Aa nokning a fak khun. Kei kha Nau Dawt hmai ah ka kut ka chiah i amah ka zoh lio a si caah ka sirlei nawn in ka hnulei tu ah kaa ngal. Kaa ngalhnak cu Nau Dawt hmai bak ahcun si i Nau Dawt kha i noknak hmun dang a ngei ti lo, ka ttaang cung dah ti lo. 

A hun i nok, a hmur le ka hmur aa tong sual...

Mawtaw ah aa citmi nunau dang pawl cu an rak lau tuk ah an au len hna. Mawtaw mawngtu pa zong an hei siik len. Cu lio ahcun Nau Dawt le kei vial romantic ngai in accident phun dang kan rak tong. Movie chung i kan zoh tawnmi fidi le fitlaw ko kan hluan. A hun i nok lio ah khan ka orhlei kut in a kehlei ban kha ka hei tlaih manh caah kan hmur le kan hmur aa sukning a fak lo. Nungak tlangval nih an hmur le an hmur an tonter tawnning kel te khin a si. Nau Dawt nih a hmur aa muai, a cin lo. Kaa muai ve tlawmte a cin. Kan ning a zah caah chikhat cu chim ding kan hngal veve lo. 

Nain chikhat hnu ah Nau Dawt uar a hun um tuknak te...!

“Naa khawng ma” a hun ka ti. 

Kha hlan suimilam panga chung kan i ruahmi bia vialte nak in a hun thlum khun.

“Khawng lo Nau Dawt nangma deuh kha, naa hngilh lio si fawn i na lau tuk lai” ka hei ti.

 “Ka lau tuk hrim ta” a ti pah khin “phurut” tiah anih aa thlauh. 

“Zei na nih?” tiah ka hal. 

“Atu naite cu Ko Jung Phyu le Kim Nana bak kan si ko” a ka ti. A ruah awk ka hngalh piak lo. 

Korea zatka a rak zoh balmi ngaknu le tlangval nih an rak ton sualmi kha a hun tahchunhmi a si.

Kei nih “Awta ti, na hmai kan khap lo” ka ti. 

“Poi lo cuh, a cang sualmi pei si ko cu  i” tiah theihthiamnak in a ka leh than. 

Mahti a hun ti khan ka ningzahnak a tlau dih colh, “Si ve ko ti...nain...accident ahcun a sunglawi bik si lai. 

Mawtaw mawngtu sin ah lawmhnak bia vung chim hau men lai hehe” ka hei ti i, ka ban ah fak nawn in a hun ka sih pah khin “Kal...na thli tha” a ka ti. 

Kan biaruah thawt hram a hun i thawk ah khin mawtaw spare pa nih zanriah kan ei hna lai tiah a hun kan thanh.

Zanriah einak cabuai kau pi ah kan pahnih lawng kan thu. Aa duhmi siloah nuva ah khin ma an kan ruah hnga, kan pawng ah a hohmanh an rak thu ngam lo. Rawl kan cahmi cu a hung phan. Kan Lai nutling nih an tuah tawnning kel khin amah ei ding aa suah hlan ah buh he meh he a hun ka suah piak hmasa. Mahti a tuahmi ka zoh lio ah khin pumkhat bantuk in ka hun i ruat manh, ka thinlung a hung lumsa. Tuni lawng aa thei komi mahtluk in ka cung ah a that le a lungthianmi kha ka khuaruah a har.

A rawl ei cawlcanghning te hna ka zoh tik ah a tling khun tuk in ka hmu. Rawl ei lio cun khua zaza ka ruat pah, “Umnn... mah tluk mi zohkhenh thiam le mi thinlung thiang hi ka nunnak zalam tluan ah rung lut ai kun...” tiah khin lungthli ka hei tum. 

Kan ei dih cang, mawtaw cung kan kai than hnu ah khin “Rawl ei lio holh na duh rua lo ti, rawl ei lio kha na dai tuk i” a hun ka ti. Mah lawng khan holh lopi in rawl ka eipi ka hun i fiang. 

“Silo, umnn... na kaa thaw la lo ka ti i si” tiah chim awk hngalh lo tuk ah ka hei ti.

Zan a hung tlai ziahmah, midang vialte an i hngilh dih. Nau Dawt zong cu mi ihduh phun te si ve rua, kan biaruahmi kan hun i dinh karlak ah khin aa hngilh diam than. Kei balte mah tluk caan tawite Nau Dawt pawng um chung i, i hngilh diam ko in ka caan liamter ka siang lo. Ka mit zong ku kho lo. Asinain Mawtaw chung i meiceu a tha deuhmi kha an hmih dih i, chun bantuk khan Nau Dawt muihmai ka hmu kho ti lo. Mahti cun zei tuah awk hngal loin kaa tengtale. Zantim a hung phan, thawngpang a dai, zei a chuak hlei lo. Ka rak ba rua, kaa hngilh beh ve cang.

Kan hnu le kan hmai a thumi Kawl pawl an hun i chawnh thawngpang ka hun theih in zinglei khua a dei cang ti, ka hun i fiang. Chikhatte cu ka mit kaa au nain, ka mitkuh a cim lo caah kaa chin than. 

Zingka ka thawhkel caan a si cang caah hngilh taktak cun kaa hngilh kho hlei ti lo, ka mit kaa chinh sawhsawh khi a si. Mah lio ahcun Nau Dawt cawlcangh thawng ka hun theih ve, a zaal chung hrawng khi dap sehlaw ka dawhter, mah thawng ka theih cun aa thang cang hi ta tiah ka ruat. 

Nain piangpai deuh lawlaw in um ko ning tiah ka mit zong au ve rih loin ka um. Mah lio ahcun ruah lopi in a thlum tukmi aw-nem ka hun theih. Vanmi auhnak aw hlah maw si ti awk tluk khin ka thinglung vampang a hun suk. 

Nau dawt sin in, “kan phan deng ka dawt” timi aw a si.

Ka theih cangka khan ka mit kaa au colh lo. Ka thin khi “uurr” tiah a tur i, ka khuasik saisem a hung chuak. Movie chung ahcun si sehlaw, cangtu pa nih cangtu nu kha a hun kuh colh hnga i, “ka lungthlitum ka khen cang” tiah aa au seek len hnga. 

Movie zong si lo, Nau Dawt le Bawite kan si ko i, ka ngamh hlei fawn lo. Ka mitchinh bu cun ka hun mirh duak. Nau Dawt lei hei zoh pah in ka mit cu ka hun i au, Nau Dawt bel nih a rak ka zoh lo. 

A hnahram ah phone aa tlaih i midang he an i chawnh cuahmah ko kha ka hmuh. Zahan ah ka manhmi chungmang le zanmang vialte cu khuadawm bang in tian hram aa thawk. 

“Kan phan deng ka dawt” kha keimah sin ah a chimmi a rak si lo.

Ka ningzak pah, kaa phuhrung pah. Zeiti awk tha lo, kan i ton a tlai airi hei ti ding khi si ko nain Nau Dawt hun zoh than ah sian a um hrim lo. Phone an i chawnhmi zong  tampi ka ngai ngam ti lo. 

Ka airphone kaa chuah i “Dawtnak vanchia, ar bang vai pa kei hi” timi Herh Lian hla kha thang taktak in kaa chuah i aho hmanh theih lo in ka ngai.

“Ziah hen tlangval a ngeih ko cang ahcun zahan zanlei in, zantim tiang mahti khan ka cung ah a um kun hnga, a phone number a ka pek lio zong ah khan na duh caan paoh ah rak ka chawn te a ka ti fawn” tiah keimah le keimah biahalnak kaa tuah.

Mah lio ahcun mawtaw spare pa nih, “na tumnak ding lampial kan phan cang e” tiah a hun ka chimh. 

Mah cangka in Nau Dawt ka zoh colh, a ka zoh ve. Mawtaw cung ka kai kaa i, kan mit aa ton hmasa bik lio bantuk te khan aa dawh rih ko. Mah lio ah hin ka mit nih aa sum kho lo, dawtnak a langhter. 

Nau Dawt mit ah zaangfahnak muithlam a leng ve. “Ka tum cang lai Nau Dawt, damte in mu” ka hei ti i, “ee, sile nang zong chuntha kun, phone hna kan i chawn than te lai cu ti” a ka ti. 

“Hehe si seh mu, chun tha ve kun” tiah sian lo tuk bu in kaa nihter. Kan kut kan i tlaih hnu ah tang ah ka tum. Mawtaw aa thawh than hlan tiang khi mawtaw thlalang-awng in kan i zohta rih. 

Mawtaw duhsahte in a kal, kan kut in bye-bye kan i tuah, Nau Dawt a liam...+++