Kawlram lemcang thiam lak ah mi tampi nih an uarmi le ramkhel (politics) zong ah nehnang a ngei pah mi Chit Thu Wai hi August 2015 ah khan Edulink Australia (Yangon) Mirangca cawnnak ah IELTS preparation course a hong kai ve. Ni hnih a tlai hnu ah class kai aa thawk. A rak kai hmasat bik ni ah hin kan hmuh bak in kan khuaruah har dih cio___milai actress nih zeidah a hung tuah ve hnga tiah.
Class ah mithar cu si kaw, pakhat tete in theihternak kan vun i tuahta dih than. A hnu bik ah amahte in theihternak cu a vun i tuah ve. "Ka minfak Chit Thu Wai a si. Treza tiin an ka auh. Nan sin ah Mirangca cawn ding ah ka ra ve" tiah mirh simsiam te khin a kan chimh. A mihring in hmuh hmasat bik cu si kaw first impression a tha ngai.
IELTS preparation course kai cu tinhmi ngeih bu in kai cio a si caah dinh caan a phanh in kan i timhlamhmi cio kan i chim hna. Cu ahcun Chit Thu Wai nih "kei cu thil pahnih tuah ding ka ngei. Pakhatnak cu US ah UN General Meeting ah kai ding ka si caah Mirang i holh chap ding in ka hong kai. Cun a rem ahcun Singapore ah Master in Public health kai kaa tim" a ti.
UN General Meeting cu October thla ah khan a va kai taktak. A tanglei hmanthlak zong hi meeting a kai vemi Malala he an si. Singapore ah kaa timhmi tlamtling tein ka dih khawh ahcun zapi ngandamnak lei (public health) in mi tampi bawmh khawhnak ah rian ka tuan te lai, a ti.
 |
| Chit Thu Wai and Malala at UN General Assembly |
Treza [Chit Thu Wai] hi hlasak rian he lemcang rian he a kemhmi a si. Kan cacawnti hawi Kawl nu pakhat nih aa tuar lo i,"ziah mahtluk in lemcannak le hlasaknak lei ah na hlawhtling ko nain sianginn kai than cu naa timh?" tiah a hal. "Hla cu ka sa pah rih ko lai. Lemcang rian belte hi kaa din chung rih lai. Kan pa (a van ti lawng ah pasal a rak ngeih ka theih 😛) he hin celebrity veve cu kan si le kan rian a tam, cu pin ah lemcang thiam tthangthar tete zong an hung chuak tung hna i a fawi pah ti lo" a ti.
A voi khatnak kan i tonnak hna a si nain kan halmi paoh hi fianghlang tein a kan chimh ko. Aa uah lo. Theihternak kaa tuah lio ah khan "Chin ka si" ka ti caah Chin chung in a hawikom le a theihmi kong te hna a chim hna. Cu chung ah Sung Tin Par a thatnak le a uarnak kong te hna aa tel. Kokek puicimh saling kha si kaw Chin miphun nih kan tonmi cung ah a lungthatlonak te hna zong a chim.
Anu hi Roman Catholic a si i apa hi Buddhist a si. Amah [Treza] hi a nu lei Khrifa a zul nain a pasal cu Buddhist ve thiamthiam a si. Asinain a nu le a pa an i theihthiamnak, amah le an pa an i theihthiamnak, biaknak dangdang an si hna nain an chungkhar ah hnahnawh buainak a um ballonak pawl khi cacawn kan i dinh karlak biaruahnak ahhin a chim tawn.
A pa hi Pu Zaw Win ti a si i, a hlan lio ah NLD party chungtel zong a rak si bal. Amah [Treza] zong hi ramkhel (politics) lei ah a lung um ngai ve. A pa keneh zul phun in a um i, NLD ah aa pumpe bakmi a si. Kum 2012 kum Kawlram caan karlak thimnak lio khan NLD cu a rak bawm cang hna__ NLD caah muicawl tiang an rak i thla. 2015 Thimnak zong ah khan a ttang taktakmi a si rih. "Time to Change" timi NLD faknak video zong ah khan amah hi biapi bik in a cangtu a si i, election campaign lio hrawng zong ah khan dong cat loin aa telmi a si.
An pa hi hlasak lei ah a laar ngai vemi Lin Lin khi a si. Anih [an pa] pa zong cu NLD ah aa pumpe ngai vemi a si. Kum 2015 thimnak lio le a dihka hrawng ah khan cun Aung San Suu Kyi kam hrawng ah khin a bodyguard pungsan in a um lengmang nain nai cikhua balte hmuh ding a um ti lo.
Treza cu aa uah lo lawng si loin mi tangdor, mi capo le mi panhzaar ngai a si. Cacawnnak a hung phanhka ah ''Mirang holh hi ka thiam lo tuk le nan ka bawmh hau lai hi awh" a hei i titer tawn. Nain a taktak ahcun kan lak ah a thiam cem a rak si. Amah nak ngakchia lawngte kan sinain kan sin ah naihniamte in a um i zalong emem in aa nuam kho.
Nu hmete cu si kaw a thin belte cu tawi pah ve. Voi khat cu kan cacawn hawi ngakchia bik pa (nain mi nganpi) nih a bia van al sual i, Treza nih cun biatak thlak ngai in a hun dalh hlak ve ko. Kan zate kan lau i, daidup kan um. Kan cachimtu pa um lio si hla selaw, an i sii phah men hnga.